قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ «سىندارلى قوعامدىق ديالوگ-قازاقستاننىڭ تۇراقتىلىعى مەن وركەندەۋىنىڭ نەگىزى» اتتى قازاقستان حالقىنا جولداۋىندا ەكونوميكانى دامىتۋعا، شاعىن جانە ورتا كاسىپكەرلىكتى وركەندەتۋگە، اۋىل شارۋاشىلىعى سالاسىن العا باستىرۋعا، ينۆەستيسيا تارتىپ، سالىقتىق تۇسىمدەردى ارتتىرۋعا باسىمدىق بەردى. مۇنىڭ ءمان-ماڭىزى تۇپتەپ كەلگەندە جۇمىس ورىندارىنىڭ سانىن كوبەيتىپ، الەۋمەتتىڭ الەۋەتىن ارتتىرۋمەن ۇشتاسىپ جاتىر.

بۇل تۇرعىدا مەملەكەت باسشىسى: «ازاماتتاردىڭ بارلىق سىندارلى وتىنىش-تىلەكتەرىن جەدەل ءارى ءتيىمدى قاراستىراتىن «حالىق ۇنىنە قۇلاق اساتىن مەملەكەت» تۇجىرىمداماسىن ىسكە اسىرۋ – بارىمىزگە ورتاق مىندەت.

بيلىك پەن قوعام اراسىندا تۇراقتى ديالوگ ورناتۋ ارقىلى عانا قازىرگى گەوساياسي احۋالعا بەيىمدەلگەن ۇيلەسىمدى مەملەكەت قالىپتاستىرۋعا بولادى.

سوندىقتان ازاماتتىق قوعامعا قولداۋ كورسەتىپ، ونىڭ الەۋەتىن نىعايتا ءتۇسۋ كەرەك. سونداي-اق، اسا ماڭىزدى جالپى مەملەكەتتىك مىندەتتەردى شەشۋ ءۇشىن تالقىلاۋ جۇمىستارىنا ازاماتتىق قوعامنىڭ مۇمكىندىكتەرىن كەڭىنەن قولدانۋ قاجەت.

وسى ماقساتپەن ءبىز بەلگىلى قوعام وكىلدەرىن قامتيتىن ۇلتتىق قوعامدىق سەنىم كەڭەسىن قۇردىق. بۇل كەڭەس روتاسيالىق تارتىپپەن جۇمىس ىستەيدى»،-دەپ اتاپ كورسەتىپ، بۇقارا مەن بيلىكتىڭ بايلانىسى بەكي تۇسەتىندىگىن جەتكىزدى.

الەۋمەتتىڭ الەۋەتىن ارتتىرۋدىڭ ءتيىمدى جولى-جۇمىسپەن قامتۋ شارالارىن جانداندىرۋ. وسى ورايدا جامبىل وبلىسىنداعى جۋالى اۋدانىندا تىندىرىمدى تىرلىكتەر تىكتەلۋدە.

ايتا كەتۋ كەرەك، اتالمىش اۋداندا جۇمىسسىزدىق ازايىپ كەلەدى. ماسەلەن، قازىرگى ۋاقىتتا جۇمىسسىز رەتىندە 654 ادام رەسمي تىركەۋدە تۇر. وتكەن جىلدىڭ وسى مەرزىمىندە 787 ادام تىركەۋدە بولعان ەكەن. بۇل تۋرالى اۋدان اكىمى نارباي ەرگەبەكوۆ اڭگىمەلەپ بەردى. نارباي ءابىلقاسىم ۇلى اتالمىش ايماقتىڭ الەۋمەتتىك-ەكونوميكالىق دامۋى جانە الدا تۇرعان مىندەتتەمەلەر تۋرالى دا تىلگە تيەك ەتتى.

– اۋدانىمىزدا وسى 9 اي ىشىندە قۇرىلىس جۇمىستارىنىڭ كولەمى 3 ميلليارد 543،3 ميلليون تەڭگەنى قۇراپ، بىلتىرعى جىلدىڭ وسى كەزەڭىمەن سالىستىرعاندا 74،8 پايىزعا ورىندالدى. جەكە تۇرعىن ءۇي سالۋشىلاردىڭ ەسەبىنەن جالپى الاڭى 8 906 شارشى مەتردى قۇرايتىن تۇرعىن ۇيلەر اۋلا قۇرىلىستارىمەن بىرگە قابىلداندى.

جالپى وڭىرلىك ءونىمنىڭ كولەمى ەسەپتى مەرزىمگە 36 ميلليارد 020،2 ميلليون تەڭگەنى قۇراپ، وتكەن جىلعىدان 17،7 پايىزعا ارتتى.

ونەركاسىپ ونىمدەرىنىڭ كولەمى 7 ميلليارد 495،4 ميلليون تەڭگە، نەگىزگى كاپيتالعا سالىنعان ينۆەستيسيا كولەمى 4 ميلليارد 015،4 ميلليون تەڭگە، بولشەك ساۋدا اينالىمى 1 ميلليارد 857،2 ميلليون تەڭگە، اۋىل شارۋاشىلىعى ءونىمىنىڭ جالپى شىعارىمى 21 ميلليارد 866،2 ميلليون تەڭگەنى قۇرادى، – دەگەن نارباي ءابىلقاسىم ۇلى اۋداننىڭ الەۋمەتتىك-ەكونوميكالىق كورسەتكىشتەرى جىلدان-جىلعا جاقسارىپ كەلە جاتقانىن جەتكىزدى.