الماتى قالالىق ءبىلىم بەرۋ باسقارماسىنىڭ باسشىسى گۇلنار قوجابەرگەنوۆا بريفينگتە قالا مەكتەپتەرىندەگى اجەتحانا ماسەلەسى تۋرالى ايتتى.

– تارازدا وكىنىشتى جاعداي بولدى. الماتى قالاسىندا 3 مەكتەپتىڭ اجەتحانالارى سىرتتا ورنالاسقان. قالاعا ناۋرىزباي، الاتاۋ اۋداندارىنىڭ تەرريتوريالارى قوسىلعاندا كوپتەگەن مەكتەپتەردە وسىنداي احۋال بولدى. ءقازىر جاعدايدى تۇزەدىك، كوپتەگەن مەكتەپتىڭ سانيتارلىق تورابىن عيماراتتىڭ ىشىنە كىرگىزدىك. توسپا سۋ كەتەتىن شۇڭقىرلار قازىلدى. ءقازىر راحات مادەنيەت اۋىلىندا ورنالاسقان ءبىر مەكتەپتە بۇل ءالى ءوز شەشىمىن تاپقان جوق. 5 جىل بويى جاڭا مەكتەپ سالۋ ماسەلەسىن كوتەرىپ كەلەمىز. ول كەزدە مەكتەپتىڭ سىرتتاعى اجەتحاناسىنىڭ ءوزى سىن كوتەرمەيتىن جاعدايدا بولاتىن. كەلەسى جىلى الماتىدا 8 جاڭا مەكتەپ سالىناتىن بولسا، ونىڭ ءبىرى وسى اۋداندا بوي كوتەرەدى. ەكىنشى مەكتەپ شاپاعات شاعىن اۋدانىندا ورنالاسقان. بۇل مەكتەپ تە 1958 جىلى سالىنعان بولاتىن. سانيتارلىق توراپتى ىشكە ەنگىزۋ ءۇشىن قاجەتتى ينفراقۇرىلىم بولمادى. «توميريس» شاعىن اۋدانىنداعى №156 مەكتەپكە دە وسىنداي وزگەرىستەر كەرەك»، - دەدى ول.

ونىڭ ايتۋىنشا، مەكتەپتەردەگى اجەتحانا ماسەلەسى 1-1،5 جىلدا ءوز شەشىمىن تاباتىن بولادى.