اۋىل شارۋاشىلىعى – ەل ەكونوميكاسىنىڭ وزەگى ەكەندىگى اقيقات. سوندىقتان دا بولار، مەملەكەت باسشىسى ق.توقايەۆ قازاقستان حالقىنا العاشقى جولداۋىندا وسى سالانى دامىتۋعا ايرىقشا نازار اۋداردى. وسى ورايدا وبلىس اكىمى اسقار مىرزاحمەتوۆ اۋىل تۇرعىندارىنىڭ تۇرمىستىق تابىسىن جاقسارتۋ ماقساتىندا ايماقتا پيلوتتىق جوبانى ىسكە قوسقان بولاتىن. ۇكىمەت قولداۋ بىلدىرگەن پيلوتتىق باستاما اياسىندا ءقازىر اۋداندارداعى بەلگىلەنگەن ەلدى مەكەندەردە تىرشىلىك قىزا ءتۇستى. اتالعان جوبا بويىنشا تالاس اۋدانىنان ءۇشارال اۋىلى تاڭدالىنىپ الىنعان. اۋدان ورتالىعى قاراتاۋ قالاسىنان سولتۇستىككە قاراي 76 شاقىرىم جەردە ورنالاسقان اۋىلدىڭ نەگىزگى شارۋاشىلىعى – مال شارۋاشىلىعى. ىرگەسى 1930 جىلى اسىل تۇقىمدى قاراكول قويىن وسىرەتىن «تالاس» كەڭشارىنىڭ ورتالىعى رەتىندە قالانعان اۋىلدىق وكرۋگتە ارال، قايىر ەلدى مەكەندەرى ورنالاسقان.

اتالعان ءۇش ەلدى مەكەندە 326 اۋلادا 2207 ادام تۇرادى ەكەن. وكرۋگتەگى بۇل 326 اۋلانىڭ ءۇي ىرگەسىندەگى جەر كولەمى 44،17 گەكتار. ونىڭ ىشىندە تولىق سۋمەن قامتىلعانى 22،34 گەكتار بولسا، 21،8 گەكتارى سۋدىڭ جوقتىعىنان پايدالانۋسىز جاتىر. وسى ورايدا جوبانىڭ العاشقى باعىتى بويىنشا 270 اۋلا يەلەرى باقشاسىنا كوكونىس تۇرلەرىن وسىرۋگە ءوتىنىم بەرگەن. قاربىز بەن قاۋىن ەگىپ، تابىسقا كەنەلسەك دەۋشىلەر دە جوق ەمەس.

سونداي-اق اتالمىش اۋىلدا مال شارۋاشىلىعى بويىنشا دا ءتورت تۇلىگىن ەسەلەپ، ونىمدىلىكتى ارتتىرۋعا نيەتتەنىپ وتىرعاندار از بارشىلىق. ولاردىڭ سانى – 170 اۋلا. بۇگىندە بۇل باعىتتا «تاراز» الەۋمەتتىك كاسىپكەرلىك كورپوراسياسىنا وتىنىمدەرى جىبەرىلىپ، ونىڭ قۇجاتتارى قابىلدانۋ ۇستىندە. وسىعان دەيىن اتالعان اۋىلدا ىس-ساپارمەن بولعان ءوڭىر باسشىسى، جوبانىڭ ەكىنشى باعىتى – مال شارۋاشىلىعىمەن اينالىسام دەۋشىلەردىڭ قاراسى قالىڭ ەكەندىگىن تىلگە تيەك ەتىپ، اتا-كاسىپتى جانداندىرىپ، تۇرمىسىن تۇزەگىسى كەلەتىندەردىڭ سالىن سۋعا كەتىرمەۋگە اسا كوڭىل بولگەن بولاتىن. سونداي-اق تۇگەل ءبىر باعىتتا ەمەس، قوسالقى شارۋاشىلىقتى جان-جاقتى تابىس كوزىنە اينالدىرۋ كەرەكتىگىن ەسكەرتىپ كەتكەن-تىن.

– بۇل پيلوتتىق جوبا وڭىردەگى ون اۋىلدا جەمىستى جۇزەگە اسسا، وبلىستىڭ بارلىق وكرۋگتەرىندە، ودان كەيىن ەل كولەمىندە قولعا الىنباق. سوندىقتان بىزگە جۇكتەلىپ وتىرعان جاۋاپكەرشىلىك زور. تۇرعىندار دا ءوز كەزەگىندە جوبانىڭ اۋىل بولاشاعى ءۇشىن باياندى باستاما بولىپ وتىرعانىن ايتىپ وتىر. ولاردىڭ اراسىندا بۇگىندە قوسالقى شارۋاشىلىقتى ءتيىمدى تابىس كوزىنە اينالدىرىپ، باقشاسىنان جىلىنا ەكى مارتە ءونىم الىپ وتىرعان تاجىريبەسىن وزگەلەرمەن بولىسۋگە دايىن ەكەندىكتەرىن ءبىلدىرىپ جاتقاندار دا كەزدەسەدى. جۇرتشىلىق بۇگىندە جوبانىڭ بارىسىن جەتە ءتۇسىنىپ، ءاۋ باستاعى كۇدىكتەن تولىقتاي ارىلعان، – دەيدى اۋىل اكىمى راحىمجان ايتۋوۆ.