الماتى قالالىق توتەنشە جاعدايلار دەپارتامەنتى جىلىتۋ ماۋسىمىنداعى ءورت قاۋىپسىزدىگىن باقىلاۋدى قاتاڭ قولعا الدى، دەلىنگەن دەپارتامەنت باسپا ءسوز قىزمەتى تاراتقان مالىمدەمەدى.

دەپارتامەنتتىڭ مالىمەتىنشە، بيىلعى ون ايدا 480 ءورت تىركەلگەن. وقيعالار سانى الدىڭعى جىلعىمەن سالىستىرعاندا 18% ازايعان. ءتىلسىز جاۋدان 558 ادام ءقاۋىپسىز جەرگە كوشىرىلىپ، 34 ادام قۇتقارىلدى. 30-عا جۋىق ادام ءيىس ءتيىپ ۋلانعان.

وقىس وقيعالار پەشتىڭ جارىلۋىنان، قازاندىقتىڭ بىتەلىپ قالۋىنان بولعان. ونىڭ 58% جەكەمەنشىك سەكتوردا تىركەلگەن. سونىمەن قاتار، قالانى گازداندىرۋ باعدارلاماسى اياسىندا كومىرمەن جىليتىن ۇيلەردىڭ سانى 2،2 ەسە ازايعان. ياعني، 2018-2019 جىلىتۋ ماۋسىمىندا – 16 626 ءۇي، 2019-2020 جىلىتۋ ماۋسىمىندا بارلىعى 7264 ءۇي پەشپەن جىلىتىلادى.

كوگىلدىر وتىن تۇتىنۋشىلارىنىڭ سانى كوبەيۋىنە بايلانىستى ودان ۋلانۋ دەرەكتەرى دە ارتقان. بيىلدىڭ وزىندە 36 ادام ۋلانعان. بىلتىر 44 ادامعا مەديسينالىق كومەك كورسەتىلگەن بولاتىن. وقيعالار كوبىنەسە گاز قۇرالىنىڭ گەرمەتيكالىق قورعانىسىنىڭ بۇزىلۋىنان ونىڭ اۋاعا تاراۋىنان بولعان.

9 قاراشادا ناۋرىزباي اۋدانىنىڭ قاراعايلى ەلدى مەكەنىندە گاز قازاندىعىنىڭ اقاۋىنان 4 ادام ۋلانعان. بۇل ۇيدە گاز قۇبىرىندا تارتىلىس جۇيەسى جۇمىس ىستەمەگەن. ولار توكسيكولوگيا بولىمشەسىنە جەتكىزىلدى. ونىڭ ىشىندە 1 بالا بار.

وسى دەرەكتەردى نازارعا الا وتىرىپ، قالالىق تجد 2019-2020 جىلدارداعى جىلىتۋ ماۋسىمىندا ادام ءولىمى مەن جاراقاتتانۋدىڭ الدىن الۋ جوسپارىن بەلگىلەدى. جەكەمەنشىك سەكتورداعى 145 ءۇي ەسەپكە الىندى. 184 كەزدەسۋ ۇيىمداستىرىلىپ، 85 مىڭ جادىناما تاراتىلدى. اكىمدىك قىزمەتكەرلەرىمەن بىرىگە وتىرىپ، الەۋمەتتىك تۇرعىدان از قامتىلعان 593 وتباسىنىڭ ءۇيى تەكسەرىلدى. ولاردىڭ ىشىندە 404 وتباسى كومىر جاعىپ وتىر. بارلىعىنا ءيىستى گازدى انىقتايتىن قۇرىلعى تەگىن ورناتىلدى. جىل باسىنان بەرى تجد 1034 داچيك ورناتقان.

بۇدان بولەك، ماماندار ەلەكتر ەنەرگياسىمەن ءۇيىن جىلىتىپ وتىرعان تۇرعىندارعا ەسكى ەلەكتر سىمدارىن اۋىستىرۋعا كەڭەس بەرەدى. سەبەبى، توزىعى جەتكەن الليۋمينيي سىمدار دا ەلەكتر توگىنىڭ كەرنەۋىنە شىداس بەرمەي، جانۋى مۇمكىن.