قازاقستان رەسپۋبليكاسىنىڭ پرەزيدەنتى قاسىم-جومارت توقايەۆتىڭ الماتىنى دامىتۋ جونىندەگى كەڭەيتىلگەن كەڭەستە بەرگەن تاپسىرماسىن ورىنداۋ ماقساتىندا قالا اكىمىنىڭ ورىنباسارى ەرجان باباقۇماروۆ شتابتىڭ كەزەكتى وتىرىسىن وتكىزدى، دەپ جازادى اكىمدىكتىڭ رەسمي سايتى.

جيىندا قان اينالىمى جۇيەسى اۋرۋلارىنان، جاراقاتتار مەن جازاتايىم وقيعالاردان بولاتىن ءولىم-جىتىم كورسەتكىشتەرىن تومەندەتۋ، سونداي-اق حيرۋرگيالىق قىزمەتتىڭ ساپاسىن ارتتىرۋ ماسەلەلەرى قارالدى. قالالىق اۋرۋحانالار مەن ەمحانالاردىڭ باس دارىگەرلەرىنىڭ ەسەبىن تىڭداعان شاھار باسشىسىنىڭ ورىنباسارى ە.باباقۇماروۆ ينسۋلت، ينفاركت، سونداي-اق ومىرگە ءقاۋىپ توندىرەتىن جاراقاتتارمەن كۇرەسۋ جۇمىستارىن كۇشەيتۋ قاجەتتىگىن اتاپ ءوتتى.

«ءولىم دەڭگەيىن تومەندەتۋ بويىنشا جوسپارلى جانە جۇيەلى جۇمىس ىستەۋ قاجەت. ءار باس دارىگەر اۋرۋدىڭ ورشۋىنە اسەر ەتەتىن فاكتورلاردى انىقتاپ، ءولىم-جىتىمنىڭ الدىن الۋعا ىقپال ەتەتىن شەشىمدەردى تابۋى ءتيىس»، – دەدى ەرجان باباقۇماروۆ.

جيىنعا قاتىسۋشىلاردىڭ پىكىرىنشە، مەديسينالىق جابدىقتاردى جاڭارتۋ ارقىلى كورسەتىلەتىن قىزمەتتىڭ ساپاسىن كوتەرۋگە بولادى. ەستەرىڭىزگە سالا كەتەيىك، قالا اكىمى ب.ساعىنتايەۆتىڭ تاپسىرماسىنا سايكەس الداعى ءۇش جىلدا الماتىنىڭ مەديسينالىق مەكەمەلەرىن 90% زاماناۋي جابدىقتارمەن قامتاماسىز ەتۋ كوزدەلگەن.

بۇدان وزگە مەدقىزمەتكەرلەردىڭ ءبىلىم ساپاسى مەن بىلىكتىلىگىن ارتتىرۋ، سونداي-اق بولاشاق دارىگەرلەردى دايارلاۋ ماسەلەسى تۋرالى ايتىلدى. كەڭەسكە قوعامدىق دەنساۋلىق باسقارماسى باسشىسىنىڭ م.ا. ا.مادەيەۆا، «الەۋمەتتىك مەديسينالىق ساقتاندىرۋ قورى» كەاق الماتى بويىنشا فيليالىنىڭ ديرەكتورى ت.ابىلدايەۆ، قدسب باسشىسىنىڭ ورىنباسارى ا.بيسەنبايەۆا، قدسف ديرەكتورىنىڭ ورىنباسارى ج.كەنجەبايەۆا قاتىستى. جوعارىدا اتالعان ماسەلەلەردى شەشۋ بويىنشا جۇرگىزىلگەن جۇمىستارى تۋرالى №7 قالالىق كلينيكالىق اۋرۋحانانىڭ باس دارىگەرلەرى م.رامازانوۆ، قالالىق جەدەل جاردەم اۋرۋحاناسى س.بەيسەنبەكوۆ، №12 قالالىق ەمحانادان ر.سۇلەيمەنوۆ، ۇوس باس دارىگەرى ن.داۋرەنبەكوۆا، «مەديتتەرا» ج ش س ديرەكتورى س.قوسپانوۆ، №21 قالالىق ەمحانا باس دارىگەرىنىڭ م.ا. د.تاپالوۆا جانە №18 قپ باس دارىگەرىنىڭ م.ا. ب.سماعۇلوۆا بايانداما جاسادى.