شقو اكىمى دانيال احمەتوۆ «ازاماتتاردى قابىلداۋدىڭ ءبىرىڭعاي كۇنى» جالپى رەسپۋبليكالىق ءىس-شاراسى اياسىندا وبلىس تۇرعىندارىن قابىلدادى. ايماق باسشىسىنا جەكە شاعىمدارىمەن 31 ازاماتتىڭ ارىزى ءتۇسىپ، بارلىعىنا تولىققاندى جاۋاپ بەرىلدى.

تۇسكەن ساۋالداردىڭ باسىم بولىگى دەنساۋلىق ساقتاۋ سالاسىنا، الەۋمەتتىك كومەك كورسەتۋ، باسپانامەن قامتاماسىز ەتۋ ماسەلەلەرىن قامتىدى. اسىرەسە، وسكەمەن، سەمەي قالاسىنان كەلگەن ازاماتتار ايماق باسشىسىنا تۇرعىن ءۇي كەزەگىن ىلگەرلەتۋ، جالدامالى پاتەر بەرۋ تۋرالى وتىنىشتەرىن جەتكىزدى.

 – كوپبالالى جانە الەۋمەتتىك جاعدايى تومەن وتباسىلاردى باسپانامەن قامتۋ ماسەلەسى بۇگىنگى تاڭدا وتە وزەكتى. ءبىز بارلىعىن ەرەجەگە سايكەس ارنايى جۇمىس توبىنىنىڭ شەشىمىمەن شەشەتىن بولامىز. ارينە، بۇل ساناتتاعى ازاماتتار باسپانامەن ەڭ ءبىرىنشى كەزەكتە قامتىلادى. ءبىراق بارلىعى زاڭعا سايكەس جۇرگىزىلەدى، – دەدى وبلىس اكىمى دانيال احمەتوۆ.

سونىمەن قاتار، ايماق باسشىسى سەمەي قالاسىنىڭ تۇرعىنى نازگۇل چاكەنوۆانىڭ مەملەكەتتەن ەستۋ قابىلەتى ناشار ازاماتتارعا بەرىلەتىن تەگىن قۇرىلعىنىڭ ساپاسىنا قاتىستى سۇراقتىڭ ماڭىزدىلىعىنا توقتالىپ ءوتتى. ارىزدانۋشىنىڭ ايتۋىنشا ون جاسار بالاسىنا ءوزىنىڭ دياگنوزى بويىنشا ارنايى زاماناۋي 16 كانالدى ەستۋ اپپاراتى قاجەت. ماسەلەنى وبلىستىق جۇمىسپەن قامتۋ جانە الەۋمەتتىك باعدارلامالاردى ۇيلەستىرۋ باسقارماسى باسشىسىنا تىكەلەي زەرتتەۋ جۇكتەلدى.

– بالالار – ءبىزدىڭ بولاشاعىمىز. سوندىقتان ولاردىڭ دەنساۋلىعى ءاردايىم الدىڭعى كەزەكتە. جالپى، 2019 جىلى كۇتىمدى قاجەت ەتەتىن ازاماتتارعا 200 ەستۋ اپپاراتتارىمەن قامتىلدى. بۇل بالانىڭ دياگنوزىن ەسكەرە وتىرىپ، قاجەتتى اپپاراتتى الۋعا تاپسىرما بەرەمىن، – دەدى دانيال احمەتوۆ.

جالپىعا ورتاق ماسەلەنى كوتەرە كەلگەن ازاماتتار ىشىندە وبلىس ورتالىعىنداعى ەسەنبەرلين 23 ءۇيدىڭ تۇرعىنى دا بولدى. ونىڭ ايتۋىنشا، مەردىگەر مەكەمە «ۆكتەحنوگرۋپپ» 9 ءۇيدىڭ قابىرعالارىن ءالى كۇنگە دەيىن قاپتاماعان. ساپاسىز جاساعان جۇمىستاردىڭ سالدارىنان ءۇي قابىرعالارىن قاپتاۋى ءتيىس كومپانيا ءىستى ءبىر جارىم جىل بويى ۇزىنسونارعا سالىپ كەلەدى. ناتيجەسىندە، پاتەر ىشىنە جاڭبىرلى كۇنى سۋ كىرىپ، قىس بويى اياز قارىپ كەلەدى. ايماق باسشىسى مەردىگەر كومپانيا مەن وبلىستىق قۇرىلىس باسقارماسى باسشىسىنا تەزارادا جوندەۋ جۇرگىزىپ، 9 ءۇيدىڭ سىرتىن قاپتاۋدى تاپسىردى.

شقو اكىمىنىڭ باسپا ءسوز قىزمەتى