بۇگىن، 25 قاراشادا نۇر-سۇلتاندا "نۇر وتان" پارتياسىنىڭ وڭىرلىك فيليالدارى وكىلدەرىنىڭ قاتىسۋىمەن كەڭەس وتكىزىپ جاتقان قازاقستاننىڭ ەكس-پرەزيدەنتى نۇرسۇلتان نازاربايەۆ پارتيا مۇشەلەرىنە ەلدىڭ قازىرگى پرەزيدەنتى قاسىم-جومارت توقايەۆتىڭ اينالاسىنا بىرىگۋ قاجەتتىگىن ايتتى. بۇل تۋرالى نازاربايەۆتىڭ باسپا ءسوز حاتشىسى ايدوس ۇكىباي twitter-دەگى پاراقشاسىندا جازدى.
"جيىن بارىسىندا ءسوز العان ەلباسى پارتيا مۇشەلەرىنە قازاقستان پرەزيدەنتى قاسىم-جومارت توقايەۆتىڭ اينالاسىنا بىرىگۋدىڭ قاجەتتىلىگىن جانە ساياسي باعىتتىڭ ساباقتاستىعىن جالعاستىرۋدى قايتادان ەسكە سالدى"، دەپ جازدى ۇكىباي.
قازاقستاندى 30 جىلعا جۋىق ۇزدىكسىز بيلەگەن نۇرسۇلتان نازاربايەۆ 19 ناۋرىزدا پرەزيدەنتتىك وكىلەتتىلىگىن توقتاتقانىمەن، ءالى دە ەلدەگى بيلىكتىڭ ءبىر تارماعىن ۇستاپ وتىر. ول ءقازىر بيلىكتەگى "نۇر وتان" پارتياسىن جانە ءوزى قۇرعان قاۋىپسىزدىك كەڭەسىن باسقارادى.
پىكىر قالدىرۋ