وكق-داعى بريفينگتە الماتى اكىمى باقىتجان ساعىنتايەۆ ق ر پرەزيدەنتى قاسىم-جومارت توقايەۆتىڭ اعىمداعى جىلدىڭ 29 قازانداعى جۇمىس ساپارى كەزىندە مەكتەپتەر مەن بالاباقشالارداعى ورىن تاپشىلىعى پروبلەمالارىن شەشۋ جونىندە بەرگەن تاپسىرماسىنىڭ قالاي جۇزەگە اساتىنى تۋرالى ايتتى.

بۇگىنگى كۇنى الماتى مەكتەپتەرىندەگى ورىن تاپشىلىعى 30 مىڭدى قۇرايدى. بالاباقشالاردا ورىن تاپشىلىعى – 20 مىڭنان استام.

«بۇل پروبلەمالاردى شەشۋ ءۇشىن مەملەكەتتىك-جەكە ارىپتەستىك قاعيداسى بويىنشا مەكتەپتەر سالۋ باعدارلاماسى ازىرلەندى. تاياۋ اراداعى ەكى جىل ىشىندە شامامەن 13 مىڭ ورىندى سەگىز مەكتەپ سالىناتىن بولادى»، – دەدى ب. ساعىنتايەۆ.

ونىڭ ايتۋى بويىنشا، 2020 جىلدىڭ باسىندا 790 ورىندى بەس بالاباقشا پايدالانۋعا بەرىلەدى، جاڭا وقۋ جىلىندا 1800 ورىندى ەكى مەكتەپ جانە بۇرىننان بار مەكتەپتەردىڭ جانىنان 2017 ورىندى بەس قوسالقى نىسان ىسكە قوسىلادى.

بۇدان وزگە، بۇل ىسكە مەملەكەتتىك ءبىلىم بەرۋ تاپسىرىسىن ورنالاستىرۋ جولىمەن جەكە بيزنەس تارتىلۋدا. 2020-2022 جىلدارى جەكە ينۆەستيسيالىق ەسەبىنەن 2240 ورىندى ءتورت مەكتەپتى، 8000 ورىندى 300 بالاباقشانى اشۋ جوسپارلانۋدا.

«وسىلايشا اتالعان شارالار ەكى اۋىسىمدا ءبىلىم الاتىن مەكتەپتەردەگى تاپشىلىقتى 30 مىڭ ورىنعا قىسقارتادى، سونىمەن قاتار، بالاباقشا كەزەگىن 10 مىڭ ورىنعا ازايتادى»، – دەپ اتاپ ءوتتى الماتى اكىمى ب. ساعىنتايەۆ.