"ەير استانا" اۋە كومپانياسىنىڭ ۇشاعىندا قازاقستان ازاماتىنىڭ قاراجاتىن ۇرلاعان قىتايلىق ۇستالدى. بۇل تۋرالى نۇر-سۇلتان قالاسى كولىكتەگى پوليسيا دەپارتامەنتى حابارلادى. 

دەپارتامەنتتىڭ مالىمدەۋىنشە، 40 جاستاعى قازاقستاندىق ايەلدىڭ "ەير-استانا" اۋە كومپانياسىنىڭ "بەيجىڭ-نۇر-سۇلتان" باعىتىنداعى ۇشاعىندا قولدى بولعان اقشاسى 1993 جىلى تۋعان قىتايلىقتىڭ سومكەسىنەن تابىلعان. 

"نۇر-سۇلتان قالاسى اۋەجايىنىڭ جەلىلىك پوليسيا بولىمىنە 40 جاستاعى قازاقستان ازاماتشاسى جۇگىنىپ، «ەير استانا» اۋە كومپانياسىنىڭ «بەيجىڭ-نۇر-سۇلتان» باعىتىنداعى اۋە كەمەسىمەن ۇشىپ كەلە جاتقاندا قول سومكەسىندەگى 4 500 اقش دوللارىنىڭ (1 744 290 تەڭگە) جوعالعانىن ايتىپ شاعىمداندى. كولىك پوليسيەيلەرى جەدەل ىزدەۋ بارىسىندا وسى رەيسپەن ۇشىپ كەلگەن 1993 جىلى تۋعان قحر ازاماتشاسىن انىقتاپ، ۇستادى. جۇڭگو ازاماتشاسىنىڭ سومكەسىن تەكسەرىپ قاراۋ بارىسىندا جوعالعان 1 744 290 تەڭگە تابىلدى" - دەلىنگەن دەپارتامەن حابارلاماسىندا.

دەپارتامەنتتىڭ مالىمدەۋىنشە، قىتايلىق ازامات ءوز كىناسىن تولىقتاي مويىنداعان. 

"قحر ازاماتشاسى كىناسىن تولىقتاي مويىندادى. ۇرلانعان اقشا تاركىلەنىپ، يەسىنە قايتارىلدى. نۇر-سۇلتان قالاسى ەسىل اۋداندىق سوتىنىڭ ۇكىمىمەن قحر ازاماتشاسى قىلمىستىق كودەكستىڭ 188-بابى 3-تارماعى 1-تارماقشاسىندا كوزدەلگەن قىلمىستى جاساعانى ءۇشىن كىنالى دەپ تانىلدى. وعان شارتتى تۇردە 3 جىلعا باس بوستاندىعىن ايىرۋ، ءماجبۇرلى تۇردە قازاقستان رەسپۋبليكاسىنان تىسقارى شىعارۋ، 5 جىل مەرزىمگە قازاقستان رەسپۋبليكاسىنىڭ اۋماعىنا كەلۋگە تىيىم سالۋ جازاسى تاعايىندالدى" دەلىنگەن دەپارتامەنت تاراتقان اقپاراتتا.