كەشە، 22 قاڭتاردا قازاقستاننىڭ بۇرىنعى پرەزيدەنتى نۇرسۇلتان نازاربايەۆتىڭ جيەن نەمەرەسى، قازاقستان پارلامەنتى سەناتىنىڭ قازىرگى سپيكەرى داريعا نازاربايەۆانىڭ ۇلى ايسۇلتان راحات Facebook-تاعى پاراقشاسىنا بىرنەشە پوست جاريالادى. ايسۇلتان راحات پوستارىندا ءقازىر لوندوندا ەكەنىن، وزىنە ءقاۋىپ ءتونىپ تۇرعانىن، نۇرسۇلتان نازاربايەۆ ونىڭ اتاسى ەمەس، تۋعان اكەسى ەكەنىن ايتتى.

ايسۇلتان راحاتتىڭ بۇل جازبالارىنان كەيىن قازاقستاندىق ءبىرقاتار جۋرناليستەر مەن بەلسەندىلەر ونىمەن بايلانىسقا شىعىپ، جازعاندارىنىڭ راس، يا جالعان ەكەنىن سۇرادى. ايسۇلتان راحات جازبالارىندا ايتىلعان اقپارتتىڭ بارلىعى راس ەكەنىن جانە ونى ەشكىمنىڭ بۇيرىعىنسىز جازىپ وتىرعانىن مالىمدەدى.

ول 22 قاڭتار كەشكە قاراي Youtube جەلەسىندەگى "Silk Road" ارناسىنا بەرگەن سۇحباتىندا نۇرسۇلتان نازاربايەۆ ءوزىنىڭ اتاسى ەمەس، بيولوگيالىق اكەسى ەكەنىن جاقىندا بىلگەنىن ايتتى. ونىڭ ايتۋىنشا، بۇل اقپاراتتاردى كوپشىلىككە ايتۋىنا شەشەسى داريعا نازاربايەۆانىڭ وعان ءقاۋىپ ءتوندىرۋى سەبەپ بولعان.

"مەنىڭ انامنىڭ ءبىر عانا ماقساتى بار: قازاقستان پرەزيدەنتى بولۋ. مەنىڭ بۇل ومىردە بولۋىم وعان كەدەرگى بولىپ تۇر. ويتكەنى اتام (نۇرسۇلتان نازاربايەۆ - رەد.) ءاردايىم ماعان بيلىكتى بەرگىسى كەلەتىن. مەن ءبىر-اق نارسەنى ايتقىم كەلەدى: ولەرىمنىڭ الدىندا اتاممەن كەزدەسكىم كەلەدى" دەدى ايسۇلتان راحات. 

سونداي-اق، سۇحبات بارىسىندا ايسۇلتان راحات ءوزىنىڭ تۋعان اكەسى نۇرسۇلتان نازاربايەۆ بولسا دا، ول اكەسى رەتىندە ءوزىن تاربيلەگەن راحات الييەۆتى مويىندايتىن جەتكىزدى. 

وتكەن جىلى قازاننىڭ 18ء-ى كۇنى لوندون سوتى ايسۇلتان راحاتقا ءبىر جىل شارتتى جازا كەستى. بريتانيالىق باق-تاردىڭ جازۋىنشا، ول 2019 جىلى ماۋسىم ايىندا بريتان پوليسياسىنا قارسىلىق كورسەتكەنى ءۇشىن جاۋاپقا تارتىلعان. نازاربايەۆتار وتباسى ايسۇلتان راحاتتىڭ ۇلىبريتانيادا ۇستالعانى جانە سوتتالعانى جايلى ەشقانداي مالىمدەمە جاساعان جوق.

1990 جىلى 26 تامىزدا ومىرگە كەلگەن ايسۇلتان نازاربايەۆ – قازاقستاندى 30 جىلعا جۋىق ۇزدىكسىز بيلەپ، 2019 جىلى ناۋرىزدا ءوز ەركىمەن پرەزيدەنتتىك قىزمەتتەن كەتكەن (ءبىراق ەلدەگى بيلىكتىڭ ءبىر تارماعىن ۇستاپ وتىرعان)  نۇرسۇلتان نازاربايەۆتىڭ ۇلكەن قىزى داريعا نازاربايەۆا مەن اۆستريا تۇرمەلەرىنىڭ بىرىندە كوز جۇمعان قازاقستاندىق شەنەۋنىك راحات الييەۆتىڭ ۇلى.

قازاقستاندىق اقپارات قۇرالدارىنىڭ جازۋىنشا، ايسۇلتان راحات بالا كەزدەن فۋتبولعا قىزىققان. 2006 جىلى قازاقستاننىڭ جاسوسپىرىمدەر قۇراماسىنىڭ ساپىندا ەۋروپا چەمپيوناتىنىڭ ىرىكتەۋ تۋرنيرىنە قاتىسقان. "چەلسي" جانە "پورتسمۋت" جاستار كوماندالارى مەن قازاقستاندىق "استانا" كومانداسىندا ويناعان.

ول ۇلىبريتانيا كورولدىگىنىڭ "ساندحەرست" اسكەري اكادەمياسىنىڭ ءتامامداعان. ايسۇلتان وقۋىن ءبىتىرىپ، قازاقستانعا ورالعان سوڭ ەلدىڭ قورعانىس مينيسترلىگىنىڭ بارلاۋ باسقارماسىندا قىزمەت ەتتى. 2017 جىلى 7 ايداي قازاقستان فۋتبول فەدەراسياسىنىڭ ۆيسە-پرەزيدەنتى قىزمەتىن اتقاردى. 

ايسۇلتان راحات 2013 جىلى "قازرومگاز" اق باسشىسى، الماتىلىق "قايرات" فۋتبول كلۋبىنىڭ قوجايىنى قايرات بورانبايەۆتىڭ قىزى اليما بورانبايەۆعا ۇيلەندى. 2016 جىلدىڭ جازىندا ولاردىڭ امەلي ەسىمدى قىز دۇنيەگە كەلدى.