بۇگىن، 7 اقپاندا نۇر-سۇلتان قالاسىندا وتكەن قازاقستان مۇسىلماندارى ءدىني باسقارماسىنىڭ كەزەكتەن تىس ءىح قۇرىلتايىندا سەرىكباي قاجى وراز قمدب ءتوراعاسى، باس ءمۇفتي قىزمەتىنە ناۋرىزباي قاجى تاعان ۇلىنىڭ كانديداتۋراسىن ۇسىندى، دەپ جازادى muftyat.kz.

قۇرىلتايعا جينالعان 300 دەلەگات سەرىكباي قاجى ورازدىڭ ۇسىنعان كانديداتۋراسىنا ءبىراۋىزدان داۋىس بەرىپ، قولداۋ كورسەتىپ، ناۋرىزباي قاجى تاعانۇلىن باس مۇفتيلىككە سايلادى.

– ناۋرىزباي قاجى تاعان ۇلى مەنىڭ ءبىرىنشى ورىنباسارىم رەتىندە كوپتەگەن يگى جوبالاردى جۇزەگە اسىردى. ءدىني سالادا تاجىريبەسى مول. ناۋرىزباي قاجى تاعان ۇلىنىڭ ءدىني باسقارما جۇمىسىن جانداندىرىپ، جاڭا باستامالارعا ۇيىتقى بولاتىنىنا سەنەمىن، – دەپ اتاپ ءوتتى.

قۇرىلتايعا قاتىسقان ق ر اقپارات جانە قوعامدىق دامۋ ءمينيسترى داۋرەن ابايەۆ سەرىكباي قاجى ورازدىڭ 2017-2020 جىلدارى اتقارعان جۇمىسىنا وڭ باعا بەرىپ، قمدب ءتوراعاسى، باس ءمۇفتي ناۋرىزباي قاجى تاعان ۇلىنىڭ جاڭا قىزمەتىنە ساتتىلىك تىلەدى. سونىمەن قاتار، ءدىني سالاداعى ورتاق شارالاردى بىرلەسە جۇزەگە اسىرۋعا نيەتتەستىك ءبىلدىردى.

قمدب ءتوراعاسى، باس ءمۇفتي ناۋرىزباي قاجى تاعان ۇلى جۋرناليستەرگە بەرگەن سۇحباتىندا: – قۇرىلتايعا ەلىمىزدىڭ ءار وبلىسىنان كەلگەن 300 دەلەگات مەنىڭ كانديداتۋراما داۋىس بەرىپ، سەنىم ءبىلدىرىپ، باس ءمۇفتي لاۋازىمىنا سايلادى. بۇل سەنىمدى ابىرويمەن اقتاۋعا بار كۇش-جىگەرىمدى جۇمسايمىن. جوسپارلاپ وتىرعان ءبىرقاتار جۇمىستارىمىز بار. وزدەرىڭىز بىلەسىزدەر، 2020 جىلدىڭ 12 قاڭتارىندا قازاقستان مۇسىلماندارى ءدىني باسقارماسىنىڭ قۇرىلعانىنا 30 جىل تولدى. وسى مەرەيتوي اياسىندا 30 مەشىتكە ەل يگىلىگى جولىندا قىزمەت ەتكەن تۇلعالاردىڭ، سونىڭ ىشىندە ءال-فارابي مەن ابايدىڭ ەسىمىن بەرۋدى، 30 ەلدى-مەكەننىڭ اۋىز سۋ، جول-كوپىر ماسەلەسىنە وڭ ىقپال ەتۋدى، 30 وتباسىعا قايىرىمدىلىق جاساۋدى، 30 ستۋدەنتكە گرانت تاعايىنداۋدى، 30 مەشىتكە كۇردەلى جوندەۋ جۇرگىزۋدى، ت.ب. يگى ءىس-شارالاردى جۇزەگە اسىرۋدى جوسپارلاپ قويدىق. بارشا جاماعاتتى ساۋاپتى ءىستى بىرلەسە اتقارۋعا شاقىرامىن، – دەپ اتاپ ءوتتى.    

ناۋرىزباي قاجى تاعان ۇلى وسىعان دەيىن قمدب ءتوراعاسىنىڭ ءبىرىنشى ورىنباسارى، «ازىرەت سۇلتان» مەشىتىنىڭ باس يمامى قىزمەتىن اتقارعان.

ناۋرىزباي تاعان ۇلى وتپەنوۆ 1977 جىلدىڭ 13 ناۋرىزىندا دۇنيەگە كەلگەن. 

1993-1997 جىلدارى تاشكەنتتەگى «يمام ءال-بۇحاري» اتىنداعى يسلام ينستيتۋتىندا وقىپ جوعارى ءدىني ءبىلىم العان.

1999-2001 جىلدارى قمدب جانىنداعى يسلام ينستيتۋتىندا وقىعان.

2009 جىلى مىسىر اراب رەسپۋبليكاسىندا قىسقا مەرزىمدە ءدىني ءبىلىمىن جەتىلدىرگەن.

2010 جىلى اباي اتىنداعى الماتى مەملەكەتتىك ۋنيۆەرسيتەتىنىڭ «تاريح» فاكۋلتەتىن سىرتتاي وقىپ ءبىتىرىپ، جوعارى ءبىلىم العان. 2011-2013 جىلدارى اتالعان ۋنيۆەرسيتەتتىڭ «ءدىنتانۋ» ماماندىعى بويىنشا ماگيستراتۋراسىن بىتىرگەن.

2017 جىلدان باستاپ «نۇر-مۇباراك» ەگيپەت يسلام مادەنيەتى ۋنيۆەرسيتەتىندە «يسلامتانۋ» ماماندىعى بويىنشا PhD دوكتورانتۋراسىندا وقۋدا.

ەڭبەك جولى:

1997-2006 جىلدارى رەسپۋبليكانىڭ ءتۇرلى مەشىتتەرىندە يمامدىق قىزمەتتەردى اتقارۋمەن باستاۋ العان.

2006-2011 جىلدارى قمدب-نىڭ قاراعاندى وڭىرىندەگى وكىلى، قاراعاندى قالالىق №1 ورتالىق مەشىتىنىڭ باس يمامى.

2011-2013 جىلدارى قازاقستان رەسپۋبليكاسى ءدىن ىستەرى اگەنتتىگىنىڭ ءدىني بىرلەستىكتەرمەن بايلانىستار جونىندەگى باسقارماسىنىڭ باس ساراپشىسى.

2013-2018 جىلدارى قمدب ءتوراعاسىنىڭ ءبىرىنشى ورىنباسارى، نايب ءمۇفتي، قمدب-نىڭ استانا قالاسى بويىنشا وكىلى، «نۇر استانا» ورتالىق مەشىتىنىڭ باس يمامى.

2018 جىلدىڭ شىلدە-قازان ايلارى قمدب ءتوراعاسىنىڭ ءبىرىنشى ورىنباسارى، نايب ءمۇفتي، قمدب-نىڭ تۇركىستان قالاسىنداعى كەڭسە باسشىسى، تۇركىستان وبلىسى بويىنشا وكىلى يمامى.

2018 جىلدىڭ قازان ايىنان باستاپ قمدب ءتوراعاسىنىڭ ءبىرىنشى ورىنباسارى، نايب ءمۇفتي، قمدب-نىڭ نۇر-سۇلتان قالاسى بويىنشا وكىلى، رەسپۋبليكالىق «ازىرەت سۇلتان» مەشىتىنىڭ باس يمامى.

وتباسىلى، 4 بالانىڭ اكەسى.