قازاقستاننىڭ ەكس-پرەزيدەنتى نۇرسۇلتان نازاربايەۆ ۇكىمەت باسشىسى اسقار مامينمەن كەزدەستى، دەپ حابارلايدى Qamshy.kz اقپارات اگەنتتىگى.  elbasy.kz سايتىنىڭ دەرەگىن نەگىزگە الىپ. 

كەزدەسۋ بارىسىندا قازاقستاننىڭ تۇڭعىش پرەزيدەنتى ەلىمىزدە قابىلدانعان شارالاردىڭ ارقاسىندا كوروناۆيرۋس ينفەكسياسىنىڭ تارالۋ قارقىنى تومەندەگەنىن ايتىپ ءوتتى.

«مەديسينا قىزمەتكەرلەرىنىڭ كەلىسىلگەن جۇمىسىن ەرەكشە اتاپ وتكىم كەلەدى. قيىن جاعدايدا قۇقىق قورعاۋ ورگاندارى دا ءوز جۇمىسىنىڭ تيىمدىلىگىن كورسەتۋدە. ۇكىمەت پەن جەرگىلىكتى اتقارۋشى ورگاندار دا بەلسەندى جۇمىس ىستەپ جاتىر»، دەدى نۇرسۇلتان نازاربايەۆ.

ەلباسى مەملەكەت باسشىسىنىڭ تاپسىرمالارىن ساپالى ورىنداۋدىڭ ماڭىزدىلىعىن اتاپ ءوتتى.

«پرەزيدەنتتىڭ بارلىق باستاماسىن جەرگىلىكتى حالىققا جەتكىزۋدىڭ ماڭىزى زور. مەن بۇل تۋرالى وبلىس اكىمدەرىمەن تەلەفون ارقىلى سويلەسكەن كەزدە دە ايتتىم»، - دەدى نۇرسۇلتان نازاربايەۆ. 

سونىمەن بىرگە نۇرسۇلتان نازاربايەۆ وسى جاعدايدا ەكونوميكالىق قاۋىپسىزدىكتى قامتاماسىز ەتۋ قاجەتتىلىگىنە نازار اۋداردى.

«الەمدەگى ەكونوميكالىق احۋال كۇردەلى. ءبىراق ءبىرىنشى توقساننىڭ قورىتىندىسى بويىنشا ءبىزدىڭ ەلدىڭ كورسەتكىشتەرى جامان ەمەس. الايدا كارانتيننىڭ اسەرى ءالى كۇنگە دەيىن ەلدىڭ ەكونوميكالىق كورسەتكىشتەرىنە تولىق اسەر ەتپەگەنىن ەسكەرگەن ابزال. شاعىن جانە ورتا بيزنەستى قولداۋ جانە حالىقتى ازىق-تۇلىكپەن قامتاماسىز ەتۋ ماسەلەلەرى ماڭىزدى بولىپ قالا بەرەدى. ەندى داعدارىستان كەيىنگى كەزەڭدە نە ىستەيتىنىمىزدى ويلاستىرۋىمىز كەرەك. ەكونوميكا قۇلدىرايدى. ونىڭ سالدارى 2008 جىلعى داعدارىستان كەيىنگى كەزەڭگە قاراعاندا اناعۇرلىم اۋىر بولاتىن سەكىلدى»،  دەدى ەكس-پرەزيدەنت.

نۇرسۇلتان نازاربايەۆ ۇلتتىق قور مەن ۇكىمەتتىڭ رەزەرۆىنەن وتاندىق ەكونوميكانى قولداۋ ءۇشىن 10 ميلليارد دوللاردىڭ ۋاقتىلى بولىنگەنىن جەتكىزدى.

ءوز كەزەگىندە پرەمەر-مينيستر قازاقستاننىڭ ەكس-پرەزيدەنتىنە كوروناۆيرۋس ينفەكسياسىنىڭ تارالۋىن بولدىرماۋ جانە الەۋمەتتىك-ەكونوميكالىق تۇراقتىلىقتى قامتاماسىز ەتۋ بويىنشا قابىلدانعان شارالار تۋرالى اقپارات بەردى.

كەزدەسۋ سوڭىندا نۇرسۇلتان نازاربايەۆ ەكونوميكانىڭ شيكىزاتتىق ەمەس سەكتورلارىن دامىتۋعا باعىتتالعان باعدارلامالاردى ىسكە اسىرۋدىڭ وزەكتىلىگىنە توقتالدى.

«ءبىزدىڭ ەلدە بۇدان دا قيىن كۇندەر وتكەن. ءبىز بۇل قيىندىقتاردى دا جەڭەمىز. ەڭ باستىسى - حالقىمىزدىڭ بىرلىگى مەن تىنىشتىعى. ۇكىمەت ءتيىمدى جۇمىس ىستەيدى دەپ سانايمىن. ەرتەڭ مەن قازاقستان حالقىنا ارنالعان ماقالامدى جاريالايمىن. ءقازىر بۇكىل الەمگە وڭاي ءتيىپ تۇرعان جوق. اۋرۋدىڭ شىرقاۋ شەگىنەن ءالى وتپەدىك. سوندىقتان ءبىز ءبىر-بىرىمىزدى قۇرمەتتەي وتىرىپ، سابىر پەن شىدامدى تانىتۋىمىز كەرەك»، - دەدى نازاربايەۆ.