9 مامىر – جەڭىس كۇنى قارساڭىندا الماتىلىق وقۋشىلار رەسەيلىك زامانداستارىمەن بىرلەسىپ مۋزىكالىق كليپ جازدى. ايتۋلى مەرەكەمەن قۇتتىقتاۋدىڭ بۇل فورماتى ەلدەردەگى كوروناۆيرۋستىق ينفەكسيانىڭ تارالىپ وتىرعان سىن ساعاتىندا تاڭدالعان وڭتايلى قادام بولىپ وتىر.

سونىمەن، الماتى قالاسىنداعى م. مامەتوۆا اتىنداعى №28 مەكتەپتىڭ ي. ۆ. پانفيلوۆ اتىنداعى №54 قازاق – رەسەي مامانداندىرىلعان مەكتەپ-ليسەيىنىڭ جانە ب.مومىش ۇلى اتىنداعى №131 مەكتەپ-ليسەيدىڭ وقۋشىلارى مەن ولاردىڭ ۆولوكولامسك قالاسىنداعى (رەسەي) قۇربىلارى تىلەك، نيەت بىرىكتىرىپ، م. بەرنەستىڭ «جۋراۆلي» انىنە كليپ جازدى. مۋزىكالىق جوبادا قازاقستاندىق جانە رەسەيلىك كينوفيلمدەردەن سوعىس تۋرالى كادرلار پايدالانىلعان.

جاس ورىنداۋشىلار اراسىندا ءار ءتۇرلى حالىقارالىق بايقاۋلاردىڭ لاۋرەاتتارى مەن جۇلدەگەرلەرى بار. بۇل ءان كەزدەيسوق تاڭدالماعان. تانىمال كومپوزيسيا كورەرمەندەردىڭ جان دۇنيەسىن ەلجىرەتىپ، مايدان دالاسىنداعى سۇراپىل شايقاستاردى كوز الدارىنا اكەلەدى. كوك اسپان تورىندەگى الىسقا ۇشىپ بارا جاتقان تىرنالار سوعىستان قايتپاي قالعان ساربازداردى بەينەلەيدى.

سونىمەن قاتار، م. مامەتوۆا اتىنداعى №28 مەكتەپ-ليسەيىنىڭ 1-11 سىنىپ وقۋشىلارى اتا-انالارىمەن بىرگە «ۇلى دالا باتىرلارى» اكسياسىنا ءۇن قوستى.
ولار ۇلى وتان سوعىسىنا قاتىسقان وزدەرىنىڭ اتالارى تۋرالى اڭگىمەلەيتىن بەينەروليكتەر سەرياسىن جاساپ، بارلىق ارداگەردى ۇلى جەڭىستىڭ 75 جىلدىعىمەن قۇتتىقتادى.

وسى ورايدا ايتا كەتەيىك، كوروناۆيرۋس پاندەمياسى كەزىندە كوپتەگەن وقۋشىلار ۇيدە قاراپ وتىرماي، ۇلى جەڭىستىڭ مەرەيتويىنا ارنالعان وسىنداي بايقاۋلارعا، چەللەندجدەرگە، اكسيالارعا قاشىقتان بەلسەندى تۇردە اتسالىسۋدا.