ەلوردادا كارانتين اياقتالعانعا دەيىن سەرۋەندەۋ كەمەسىنىڭ جۇمىسىنا، كوشە ساۋداسىنىڭ كەز كەلگەن تۇرىنە، وتباسىلىق ەسكە الۋ، ادەت-عۇرىپ جانە وزگە دە ءىس-شارالار وتكىزۋگە، كەيتەرينگ جانە مەرەكەلەردى ۇيىمداستىرۋ قىزمەتىن كورسەتۋگە تىيىم سالىندى. بۇل تۋرالى نۇر-سۇلتان قالاسىنىڭ باس مەملەكەتتىك سانيتارلىق دارىگەرى جاننا پىراييەۆانىڭ قاۋلىسىندا كورسەتىلدى، دەپ حابارلايدى قازاقپارات.

قاۋلىدا ايتىلعانداي، جوبامەن 50 ادام وتىراتىن ورنى بار ءدامحانا مەن مەيرامحانالاردىڭ جۇمىسىنا رۇقسات ەتىلگەن، ءبىراق ۇجىمدىق ءىس-شارالار وتكىزۋگە جانە بانكەت پەن سالتاناتتى زالداردىڭ جۇمىسىنا تىيىم سالىنادى.

"سانيتارلىق-ەپيدەميولوگيالىق تالاپتار مەن كارانتيندىك رەجيمدى ساقتاي وتىرىپ، ءبىلىم بەرۋ ورتالىقتارىنىڭ، ءارتۇرلى سالا ماماندارىن دايارلاۋ كۋرستارىنىڭ، سەمينار ساباقتارىنىڭ، ەرەسەكتەرگە ارنالعان ۇيىرمەلەردىڭ قىزمەتىنە رۇقسات ەتىلسىن. تەك جەكە ساباقتار بولۋى كەرەك نەمەسە توپتاعى ادام سانى بەسەۋدەن اسپاۋى شارت" دەلىنگەن قۇجاتتا.

سونداي-اق، سەرۋەندەۋ كەمەسىنىڭ جۇمىس ىستەۋىنە، كوشە ساۋداسىنىڭ كەز كەلگەن تۇرىنە تىيىم سالىنعان.

ق ر دەنساۋلىق ساقتاۋ مينيسترلىگىنىڭ تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ كوميتەتىنىڭ نۇر-Cۇلتان قالاسىنداعى دەپارتامەنتى قالادا كوروناۆيرۋس ينفەكسياسى تارالۋىنىڭ الدىن الۋ جونىندەگى قوسىمشا شارا قابىلدادى.

"قالا تۇرعىندارىنا كارانتين اياقتالعانعا دەيىن 2 جانە ودان دا كوپ ادامنىڭ بىرلەسىپ سەرۋەندەۋى كەزىندە مىندەتتى تۇردە ماسكا كيۋ جانە 2 مەتردەن كەم ەمەس الەۋمەتتىك قاشىقتىقتى ساقتاي وتىرىپ، ۇيىنەن ەركىن شىعۋعا رۇقسات ەتىلەدى. اۋلا، ساياباق، الاڭ، سكۆەر، جاعالاۋدا سەرۋەندەگەندە ماسكانى مىندەتتى تۇردە كيۋ كەرەك، 3 ادامنان ارتىق توپتاسى جۇرمەۋى كەرەك. بۇل ءبىر وتباسى مۇشەلەرىنە قاتىسى جوق. سونداي-اق ساياجاي ۋچاسكەسىنە (قالا سىرتىنداعى ۇيلەرگە) بارۋ ءۇشىن قالادان كىرۋگە/شىعۋعا رۇقسات ەتىلەدى" دەلىنگەن قاۋلىدا.

سونداي-اق، قوعامدىق ورىندا، قوعامدىق كولىكتە جانە رۇقسات ەتىلگەن وبەكتىلەرگە بارعان كەزدە ماسكا، قولعاپتى كيىپ ءجۇرۋ جانە انتيسەپتيك پايدالانۋ تالاپتارىن قاتاڭ ساقتاۋ قاجەت. ۇيگە قوناق شاقىرۋ، بولماسا تابيعات اياسىندا مەرەكەلىك شارا وتكىزۋگە بولمايدى.

"وتباسىلىق ەسكە الۋ، ادەت-عۇرىپ جانە وزگە دە ءىس-شارالار وتكىزۋگە، كەيتەرينگتىك قىزمەتتەر كورسەتۋگە جانە مەرەكەلەردى ۇيىمداستىرۋ جونىندە قىزمەتتەر كورسەتۋگە تىيىم سالىنادى" دەلىنگەن قۇجاتتا.

كاسىپكەرلەر مەن ۇيىمدارعا قىزمەتكەرلەرىنىڭ، كەلۋشىلەردىڭ كارانتين تالاپتارى، شەكتەۋ شارالارىن ساقتاۋىن قاتاڭ باقىلاۋى مىندەتتەلگەن.