تۇركىستان وبلىسى پوليسەيلەرى كولىگىن ارتقا جۇرگىزىپ، جول ەرەجەسىن بۇزعان جۇرگىزۋشىنى جاۋاپقا تارتتى، دەپ جازادى ىشكى ىستەر مينيسترلىگىنىڭ سايتى.
بۇعان دەيىن الەۋمەتتىك جەلىدە جول بويىندا كولىگىمەن ارتقا قاراي ءجۇرىپ، جول قاۋىپسىزدىگى ەرەجەسىن بۇزعان جۇرگىزۋشىنىڭ بەينەجازباسى تارالعان بولاتىن.
"اتالعان قۇقىق بۇزۋشىلىقتى جاساعان “Volswagen GOLF” ماركالى كولىكتىڭ جۇرگىزۋشىسىن انىقتاۋ ماقساتىندا تۇركىستان قالالىق پوليسيا باسقارماسىنىڭ قىزمەتكەرلەرى شۇعىل ارەكەتكە كىرىستى. تەكسەرۋ جۇمىستارى بارىسىندا جيىرما جاستاعى جۇگەنسىز جۇرگىزۋشى انىقتالىپ، ول ق ر اكىمشىلىك قۇقىق بۇزۋشىلىق تۋرالى كودەكسىنىڭ ءۇش بابى بويىنشا جاۋاپكەرشىلىككە تارتىلدى. ناقتىراق ايتساق، 595-باپ (مانيەۆر جاساۋ قاعيدالارىن بۇزۋ)، 606-باپ (جول ءجۇرiسiنە قاتىسۋشىنىڭ جول ءجۇرiسi قاعيدالارىن اۆاريالىق جاعداي تۋعىزۋعا اكەپ سوققان بۇزۋشىلىعى)، 614-باپ (كولiك قۇرالدارىنىڭ جۇرۋىنە كەدەرگi كەلتىرۋ) بويىنشا حاتتامالار تولتىرىلدى" دەلىنگەن اقپاراتتىق حابارلامادا.
تۇركىستان وبلىسىنىڭ پوليسەيلەرى جولدا جىلدامدىقتى اسىرماۋعا، مانيەۆر جاساۋ قاعيدالارىن بۇزباۋعا، مۇمكىندىگىنشە ساقتىق شارالارىن قولدانىپ كولىك باسقارۋعا كەڭەس بەرەدى. جوعارىداعىداي تەرىس ارەكەت جاساپ، ءوز ومىرىنەن بولەك، وزگە دە كولىك جۇرگىزۋشىلەرىنە ءقاۋىپ ءتوندىرىپ، جول بويىندا كەدەرگى كەلتىرۋدىڭ سوڭى جاقسىلىققا اپارمايتىنىن ەسكەرتەدى.
پىكىر قالدىرۋ