الماتى اكىمى باقىتجان ساعىنتايەۆ بۇگىن جۇمىس كەڭەسى بارىسىندا فارميندۋستريا وكىلدەرىمەن مەگاپوليسكە دارى-دارمەكتەردى جەتكىزۋ ماسەلەسىن تالقىلادى. بۇل تۋرالى قالا اكىمدىگىنىڭ باسپا ءسوز قىزمەتى حابارلادى.

«دارىلىك پرەپاراتتارعا سۇرانىستى قامتاماسىز ەتۋ جانە جەدەل جاعداي بويىنشا قاجەتتى شارالاردى تالقىلاۋ ءۇشىن فارميندۋستريا وكىلدەرىمەن كەزەكتى كەزدەسۋ وتكىزدىم. كەلىپ تۇسكەن دارى-دارمەكتەر ءدارىحانا سورەلەرىنە ءبىر تاۋلىكتىڭ ىشىندە جەتكىزىلەدى. بۇگىن رەسەيدەن پرەپاراتتاردىڭ ءىرى پارتياسى كەلەدى. شامامەن 55 توننا دارىلىك زاتتار، سونىڭ ىشىندە COVID-19-عا قارسى – ىستىقتى تۇسىرەتىن جانە انتيكواگۋليانتتار بار. شىلدە ايىنىڭ سوڭىنا دەيىن الەۋمەتتىك ماڭىزى بار دارى-دارمەكتەردىڭ 4،2 ملن قاپتاماسى جەتكىزىلەدى دەپ كۇتىلۋدە»، – دەدى ب. ساعىنتايەۆ.

قول قويىلعان مەموراندۋم اياسىندا قالانىڭ بارلىق اۋداندارىنداعى 105 ءدارىحاناعا وتە قاجەت پرەپاراتتاردىڭ 41 ءتۇرى تۇراقتى جەتكىزىلۋدە. 1 شىلدەدەن باستاپ ءدارىحانالار الەۋمەتتىك ماڭىزى بار 581 مىڭ دارى-دارمەك قاپتاماسىن الدى.

جالپى، بۇگىنگى كۇنى 105 ءدارىحانا مەن جەتكىزۋشىلەردىڭ قويمالارىندا 1،8 ملن قاپتاماداعى قاجەتتى دارى-دارمەكتەر بار. سونىمەن قاتار، قالا اكىمى دارىلىك پرەپاراتتاردىڭ تۇراقتى قورىن جاساۋ جونىندەگى جوبانى جۇزەگە اسىرۋ تۋرالى ايتتى.

«كەلەسى قادام – دارىلەردىڭ تۇراقتاندىرۋ قورىن قۇرۋ. دارى-دارمەك جەتكىزۋشىلەردى 6-8 اي مەرزىمگە پايىزسىز نەسيەلەندىرۋ ءۇشىن 5 ملرد تەڭگە ءبولىندى. بۇل – دارى-دارمەكتەردى اعىمداعى باعا بويىنشا ساتىپ الىپ، نارىقتىڭ قۇبىلمالى جاعدايىنا بايلانىستى بىرتىندەپ پايدالانۋعا بەرۋ ءۇشىن جاسالدى»، - دەدى قالا اكىمى.

سونداي-اق، اتالعان 105 ءدارىحاناعا كۇن سايىن مونيتورينگ جۇرگىزىلەدى.