كاسىپكەردى قاقپانىنا تۇسىرمەك بولعان ەكى پوليسەيدىڭ ماسقاراسى شىقتى. بۇل تۋرالى كتك حابارلادى.
ءتارتىپ ساقشىلارى الدىن الا اقىلداسىپ ماسكۇنەم ارقىلى "رۇقسات ەتىلمەگەن ۋاقىتتا اراق ساتتىڭ" دەپ دۇكەن ساتۋشىسىنا ايىپپۇل ارقالاتپاق بولعان. الايدا ايلاسىن جۇزەگە اسىراي الماعان پوليسەيلەردىڭ باسى داۋعا قالدى.
قۋلىق جاساپ تۇرعان جەرىنەن بەينەباقىلاۋ كامەراسىنا ءتۇسىپ قالعان پوليسيا قىزمەتكەرلەرىن ەندى ىشكى ىستەر مينيسترلىگى ىزدەستىرىپ جاتىر.
– وسىندايدىڭ كەرەگى نە؟! ارامزالىق، ماسقارا عوي! ەگەر مەندە كامەرا بولماسا، ايىپپۇل سالىپ كەتەتىن ەدى. سوتتا دا ونى دالەلدەي المايسىڭ. بۇلار سويتەدى دە، حاتتاما تولتىرىپ، ماعان ايىپپۇل سالىپ كەتەتىن ەدى. ءبىزدىڭ نە جازىعىمىز بار؟ بالا-شاعامىزدى اسىراپ وتىرمىز، – دەيدى دۇكەن قىزمەتكەرى.
تاسپادا كورىنىپ تۇرعانداي، اۆتوتۇراققا توقتاعان كولىكتەردىڭ بىرىنەن قولىندا سومكەسى بار قاڭعىباس ەركەك تۇسەدى. سودان دۇكەنگە كىرىپ اراق سۇرايدى. الايدا ءالى تاڭعى ۋاقىت بولعاندىقتان، ساتۋشى وعان اراق ساتپايدى. ءبىراز تۇرعان سوڭ، ماسكۇنەم دالاعا شىعىپ كەتەدى. وسى ۋاقىتتا قاڭعىباس تۇسكەن كولىكتەن ەكى پوليسەي دە شىعادى. ءبىرى توقتاپ، قاڭعىباسپەن سويلەسىپ تۇرادى. ال ەكىنشىسى اينالىپ بارىپ، بىردەن دۇكەنگە كىرەدى. ارتىنشا قالعان ەكەۋى كىرەدى.
كاسىپكەردىڭ ايتۋىنشا، ءبىرىنشى كىرگەن پوليسەي بىردەن "رۇقسات ەتىلمەگەن ۋاقىتتا اراق ساتتىڭ" دەپ، دۇكەن يەسىن قىسپاققا الا باستاپتى. سومكەسىندە جاتقان اراقتى كورسەتىپ، ماسكۇنەم دە ساقشىنىڭ ءسوزىن راستايدى. الايدا دۇكەن ىشىندە دە كامەرا ورناتقان كاسىپكەر ءوزىنىڭ اراق ساتپاعانىن كورسەتىپ قۇتىلادى.
ايلاسى اسپاي قالعانىنا كوزى جەتكەن ەكەۋى ماسكۇنەمدى ەرتىپ، قايتادان ءبىر كولىككە ءمىنىپ كەتەدى. بۇل جاعداي ءۇش كۇن بۇرىن بولعان ەكەن. كاسىپكەردى قاقپانعا تۇسىرمەك بولىپ ماسقاراسى شىققان قىزمەتكەرلەرىنىڭ كىم ەكەنىن ىشكى ىستەر مينيسترلىگىندەگىلەر انىقتاپ جاتىر.
پىكىر قالدىرۋ