سولتۇستىك قازاقستان وبلىسىنداعى بەسكول قۇس فابريكاسىندا ءبىر تاۋلىكتە 180 مىڭ مەكيەن تاۋىقتار قىرىلىپ قالدى. بۇل تۋرالى پەتروپاۆلوۆسك.news حابارلادى.

باسىلىمنىڭ حابارلاۋىنشا، الداعى ۋاقىتتا دا وسى جاعداي قايتالانۋى مۇمكىن دەپ جوسپارلانىپ وتىر. قۇستاردىڭ قىرىلۋىنان فابريكا قىزمەتكەرلەرى جۇمىسسىز قالۋى مۇمكىن. قىركۇيەك ايىنىڭ باسىندا 320 مىڭعا جۋىق تاۋىق پەن 6 مىڭعا جاۋىق قاز بولعان.

–  بۇگىندە مەكيەن تاۋىقتاردىڭ جارتىسىنان ازى قالدى. كەشە 180 مىڭنان اسا قۇس قىرىلدى. ەندى 30-40 مىڭعا جۋىق قۇس قىرىلۋى مۇمكىن. انالىق قازدان ەشتەڭە قالمادى دەۋگە بولادى. بىرنەشە تاۋلىكتە ونداعان مىڭ قۇس قىرىلدى. ءوز قولىمىزبەن شۇڭقىر قازىپ، ورتەپ، شۇڭقىرلاردى بالشىقپەن جاۋىپ، جويىپ جاتىرمىز، – دەدى بەسكول قۇس فابريكاسىنىڭ تەحنولوگى تاتيانا كوستەنكو كاسىپورىنعا اۋىل شارۋاشىلىعى ۆيسە-مينيسترى گۇلميرا يسايەۆا ارنايى ساپارمەن كەلگەن  كەزىندە.

كوستەنكونىڭ حابارلاۋىنشا، زاۋىت قۇس تۇماۋىنا قارسى جاپپاي ۆاكسينا ەگۋگە دايىن ەمەس. قىركۇيەك ايىنىڭ باسىندا انالىق ۇيرەكتەردىڭ 15 مىڭىنا ەكپە ەگىلگەن.

– ءبىز سولتۇستىك قازاقستانمەن شەكارالاس اۋماقتاردا بۇل ىندەتتىڭ ءورشىپ بارا جاتقانىن بىلگەن كەزدە قولدا بار ۆاكسينالاردى انالىق ۇيرەكتەرگە بەگۋدى شەشتىك. ويتكەنى مەكيەن تاۋىقتارعا ۆاكسينا جەتپەيتىن ەدى. ۇيرەكتەردى امان الىپ قالادى دەگەن ويدامىز، – دەيدى تەحنولوگ.

ول قۇس تۇماۋىنا قارسى ۆاكسينانىڭ مىڭ دوزاسى ورتاشا ەسەپپەن 50 مىڭ تەڭگە تۇراتىنىن اتاپ ايتتى. ءبىراق قۇس فابريكالارى سۋبسيديا المايتىندىقتان، كاسىپورىندا مۇنداي قىمبات ۆاكسيناسيانى الۋعا قوسىمشا قاراجات بولماعان.

– كەلەسى كوكتەمدە نە بولاتىنىن ەلەستەتۋدىڭ ءوزى قورقىنىشتى، ادامدار قۇسسىز قالادى. تاۋىقتاردىڭ ءبىر بولىگى امان قالسا دا، بۇكىل قۇستى جويۋعا تۋرا كەلەدى. ويتكەنى ول قۇس تۇماۋىن تاسىمالداۋشى بولىپ ەسەپتەلەدى. وسى ايماقتاعى بارلىق قۇس فابريكالارىنىڭ جۇمىسى توقتاپ قالۋى مۇمكىن. ءبىز ۇلكەن تراگەديا كەلگەنىن ءتۇسىنىپ وتىرمىز: قۇس فابريكاسىندا 170 ادام جۇمىس ىستەيدى، ياعني 170 وتباسى قىستىڭ الدىندا جۇمىسسىز قالادى، – دەدى تاتيانا كوستەنكو.

گۇلميرا يسايەۆانىڭ ايتۋىنشا، ۆاكسيناسيا دياگنوز قويىلعان كەزدە باستالاتىنىن اتاپ ءوتتى.

– دياگنوز 16 قىركۇيەكتە ساعات 21.00-دە بەلگىلەندى. 17 قىركۇيەكتە شەكتەۋلەر مەن ۆاكسيناسيا تۋرالى شەشىم قابىلداندى، 19 قىركۇيەك كۇنى تاڭەرتەڭ ۆاكسينا ايماققا ارنايى كولىكپەن جەتكىزىلىپ، اۋداندارعا تاراتىلدى. ۆاكسينانى جەتكىزىپ، تاراتۋ ءۇشىن بىزگە ەكى كۇن قاجەت بولدى، – دەدى ول.