قازاقستاننىڭ ءبىلىم جانە عىلىم ءمينيسترى اسحات ايماعامبەتوۆ مينيسترلىكتىڭ اپپاراتتىق وتىرىسىندا جوو ۇستازدارى قاجەتسىز جۇمىستاردىڭ بارىنەن بوساپ، ءوز مىندەتىمەن اينالىسۋى كەرەكتىگىن مالىمدەدى. 

– قازىرگى ۋاقىتتا ءبىز اكادەميالىق جانە باسقارۋشى قۇزىرەتتەردىڭ ءبارىن ۋنيۆەرسيتەتتەرگە بەرىپ جاتىرمىز. سونىڭ شەڭبەرىندە مينيسترلىك رەتتەپ وتىرعان ءارتۇرلى قۇجاتتىڭ ءبارىن الىپ تاستادىق. 2 قىركۇيەك كۇنى بۇيرىققا قول قويىپ، ونى ادىلەت مينيسترلىگىنە تىركەدىك. ەندى وسى بۇيرىقتىڭ شەڭبەرىندە جۇمىس ىستەۋ كەرەك. ءبىلىم جانە عىلىم مينيسترلىگى ۋنيۆەرسيتەتتەردەن ەشقانداي قۇجاتتاردى تالاپ ەتپەيدى.

مويىنداۋ كەرەك ءقازىر ميعا سىيمايتىن ەسەپ تۇرلەرى بار. كاسىپتى ايقىنداۋ جۋرنالى، جۇمىسقا ورنالاسقانى تۋرالى انىقتاما تالاپ ەتىلەدى. جوو-لاردىڭ ءبارى دەمەيمىن، ءبىراق ءبىرازى ءالى كۇنگە دەيىن وسى انىقتامانى تالاپ ەتىپ ءجۇر. ونىڭ نە كەرەگى بار؟ ءبىلىم جانە عىلىم مينيسترلىگىنە ول قۇجات مۇلدە كەرەك ەمەس. جۇمىسقا ورنالاسۋ كورسەتكىشىن ءبىز باسقا مەملەكەتتىك ورگانداردىڭ ەلەكتروندى بازاسىنان الا سالامىز. مالىمەتتەر جەتەدى. ءتىپتى پەداگوگتارعا ويعا سىيمايتىن تالاپتى قوياتىندار بار. اسىرەسە جازدا كەيبىر جوو-لارداعى پەداگوگتاردىڭ جۇمىسى قانشاما ابيتۋريەنتتى وقۋ ورنىنا تارتا الاتىنىنا بايلانىستى باعالانادى. بۇل ءتىپتى نونسەنس. شىن مانىندە پەداگوگ ءوز ىسىمەن اينالىسۋى كەرەك، – دەدى مينيستر.