بۇگىن قازاقستاننىڭ تۇڭعىش پرەزيدەنتى نۇرسۇلتان نازاربايەۆتىڭ "اباي اماناتى" اتتى ماقالاسى جاريالاندى.
نازاربايەۆ پرەزيدەنت رەتىندەگى وكىلەتتىگىن توقتاتۋ تۋرالى شەشىم قابىلداماس بۇرىن بولاشاق ەل باسقارار ازاماتقا قاجەت قايراتكەرلىك تاجىريبە مەن تاعىلىم جايىن وي تەزىنە، كوڭىل بەزبەنىنە تارتىپ، اسىقپاي، زەر سالا قاراعانىن ايتتى.
"ابايدىڭ:
باس باسىنا بي بولعان وڭكەي قيقىم
مىنەكي، بۇزعان جوق پا ەلدىڭ سيقىن؟
... بىرلىك جوق، بەرەكە جوك، شىن پەيىل جوق،
ساپىرىلدى بايلىعىڭ، باققان جىلقىڭ.
باستا مي، قولدا مالعا تالاس قىلعان،
كۇش سىناسقان كۇندەستىك بۇزدى-اۋ شىرقىڭ، – دەگەن وكىنىشىن قايتالاماۋ قاجەتتىگى تاعى الدىمنان شىقتى.
قازاقستان تاۋەلسىزدىگىنىڭ العاشقى كۇندەرىنەن باستاپ مەنىمەن بىرگە جۇمىس ىستەگەن قاسىم-جومارت توقايەۆتىڭ ادال ءارى جاۋاپكەرشىلىگى جوعارى ازامات ەكەنىن ەسەپكە الماعاندا، ونىڭ ەلدەگى ىشكى جاعدايدى سارالاپ قانا قويماي، شىعىستىڭ دا، باتىستىڭ دا تىلدەرىن مەڭگەرگەندىگىن، بىرىككەن ۇلتتار ۇيىمى باس حاتشىسىنىڭ ورىنباسارى قىزمەتىن اتقارعانىن، الەمدىك ساياساتتاعى قازاقستاننىڭ ورنىن بايىپتاي الاتىن ديپلوماتتىق قىرىن دا ەسكەردىم. سونداي-اق، ءوزىم ايرىقشا ءمان بەرىپ كەلە جاتقان ەل بىرلىگى ماسەلەسى مەن ادامزاتتىق قۇندىلىقتاردى ۇيلەستىرۋ قابىلەتىنە سەنىم ارتتىم" دەپ جازعان ەلباسى ماقالاسىندا.
نازاربايەۆ ق.توقايەۆتىڭ ابايدىڭ 175 جىلدىق مەرەيتويىن اتاپ ءوتۋ تۋرالى شەشىمى "بولاشاققا باعدار: رۋحاني جاڭعىرۋ"، "ۇلى دالانىڭ جەتى قىرى" باعدارلامالىق ماقالالارىندا قويىلعان ماقساتتاردى جۇزەگە اسىرۋدىڭ زاڭدى جالعاسى جانە اباي مۇراسىن زامان سۇرانىستارىنا ساي قايتا زەردەلەۋدىڭ ماڭىزدىلىعىن بىلدىرەتىنىن اتاپ ءوتتى.
پىكىر قالدىرۋ