الماتى وبلىسىنداعى شارىن شاتقالىندا سەل ءجۇرۋىنىڭ سالدارىنان 2 ادامنىڭ ءومىرىن قيعان وقيعانىڭ جاي-جاپسارى حابارلاندى.
29 مامىر كۇنى الماتىداعى دارىندى بالالارعا ارنالعان مامانداندىرىلعان №199 گيمنازيانىڭ 5 "ءا" سىنىبىندا وقيتىن 8 وقۋشى، 5 اتا-انا، 3 مۇعالىمنەن تۇراتىن توپ شارىن شاتقالىنا ەكسكۋرسياعا شىعادى.
سول كۇنى ءتۇس كەزىندە، ياعني 13:35-تە الماتى وبلىسى توتەنشە جاعدايلار دەپارلامەنتىنە شاتقالدىڭ تومەنگى جاعىندا سەل جۇرگەنى تۋرالى حابار تۇسەدى. بەلگىلى بولعانداي، كەنەتتەن 15 مينۋت بويى بۇرشاق ارالاسقان نوسەر جاۋعان. وسى ۋاقىتتا وقۋشىلار مەن ەرەسەكتەردەن قۇرالعان توپ شاتقال ىشىندە جۇرگەن.
وقىس وقيعا سالدارىنان مەرەي يبراگيموۆ ەسىمدى ءمۇعالىم مەن رانيا قاسەن ەسىمدى وقۋشى قازا تاپتى. 11 جاستاعى زەرە بەيسەنبەي ۇشتى-كۇيلى جوعالىپ، ونى كەلەسى كۇنى تاڭعى 6-لار شاماسىندا وقيعا بولعان تۇستان بىرنەشە شاقىرىم جەردەن تاپتى. ىزدەۋگە 100-گە جۋىق ادام قاتىستى.
– جاۋىن باستالدى، ءبىز جاسىرىنىپ قالدىق. ءبىراق جاۋىن ۇدەي ءتۇستى، نايزاعاي وينادى. سۋ كوپتەپ جينالا باستادى. ءبىز تاستاردى ۇستانىپ تۇرعانبىز. ءبىر مەزەتتە مەن قولىمدى جىبەردىم. ويتكەنى اعىس قاتتى ەدى. كوزىمدى جۇمدىم دا، جاتا كەتتىم. ءبىر مەزەتتە تاستان ۇستانىپ، تىرمىسىپ جاعاعا شىقتىم. قۇرعاق جەردە وتىرىپ، كومەك كۇتتىم، – دەيدى زەرە بەيسەنبەي. ءقازىر ونىڭ جاعدايى ورتاشا تۇراقتى دەپ باعالانۋدا.
قازا تاپقان ءمۇعالىم مەرەي يبرايموۆ 26 جاستا بولعان. گيمنازيادا 3 جىل جۇمىس ىستەگەن. گيمنازيا ديرەكتورى ساندۋعاش نىشانوۆا قىزمەتكەرى چەحيادا، يتاليادا وقىعانىن، مىنەزى اشىق، اقجارقىن، بالالاردىڭ سۇيىكتى ءمۇعالىمى بولعانىن ايتادى.
– ول قىزداردى قۇتقارماق بولعان. ءبىرىن قۇتقاردى، ەكىنشىسىن قۇتقارا المادى. ءوزى دە بىرگە كەتتى، – دەيدى ساندۋعاش نىشانوۆا.
قايتىس بولعان وقۋشى رانيا قاسەن 5-سىنىپتا وقىعان.
بۇگىندە 4 ادام اۋرۋحانادا جاتىر. ونىڭ ەكەۋى وقۋشى. 2009 جىلى تۋعان وقۋشىنىڭ جاعدايى اۋىر. ونىڭ باسسۇيەگى مەن ميىنا زاقىم كەلگەن، دەنەسىندە كوپتەگەن جاراقات بار. قالعان ناۋقاستاردىڭ جاعدايى تۇراقتى.
الماتى قالاسى ءبىلىم باسقارماسى شاتقالعا قىدىرۋ دەمالىستا ۇيىمداستىرىلعانىن، بۇل تۋرالى گيمنازيا باسشىلىعى بىلمەگەنىن ءمالىم ەتتى.
دەرەككوز: informburo.kz
