مەملەكەت باسشىسى قازاقستان حالقىنا جولداۋىندا مال شارۋاشىلىعى مەن اگرارلىق سالادا ماڭىزدى مىندەتتەر بەلگىلەدى. اۋىل شارۋاشىلىعى سالاسىنىڭ باستى مىندەتى – ەلىمىزدى نەگىزگى ازىق-تۇلىك ونىمىمەن تولىق قامتاماسىز ەتۋ ەكەندىگىن باسا ايتتى.

بۇل باعىتتا شىمكەنتتە 2 اگرويندۋستريالدى ايماقتىڭ قۇرىلىسى باستالدى. ونىڭ ءبىرى اۋىلشارۋاشىلىق ونىمدەرىن تەرەڭ وڭدەۋدە «بوزارىق» تاماق ونەركاسىبى يندۋستريالدى ايماعى قۇرىلىپ، قۇنى 23 ملرد. تەڭگەنى قۇرايتىن 1 810 جۇمىس ورنىمەن 21 جوبا ىسكە اسادى.

ەكىنشى ايماقتا 136 گەكتارعا زاماناۋي ونەركاسىپتىك جىلىجاي̆ كەشەندەرى سالىنادى. مۇندا 30 ملرد. تەڭگەگە 2 000 جۇمىس ورنىمەن 20 جوبا جۇزەگە اساتىن بولادى.

اكتيۆ وتىرىسىندا قالا اكىمى مۇرات ايتەنوۆ اگرارلىق يندۋستريانى جولعا قويۋدا كەشەندى جۇمىستاردى جالعاستىرۋ قاجەت ەكەندىگىن ايتتى. قالالىق اۋىلشارۋاشىلىعى جانە ۆەتەريناريا باسقارماسىنا مال جايىلىمدىق جەرلەرگە تالداۋ جۇرگىزىپ، مال باسىنىڭ ساۋلىعىن، ونىمدىلىگىن ارتتىرۋدا جۇيەلى جۇمىستار اتقارۋدى تاپسىردى. سونىمەن بىرگە، سيفرلاندىرۋ باسقارماسىمەن بىرگە ۆەتەريناريا سالاسىن اۆتوماتتاندىرۋ پروسەسىن زەردەلەۋدى جۇكتەدى.

سونىمكەن قاتار، پرەزيدەنت سيفرلاندىرۋ جونىندەگى ۇلتتىق جوبانىڭ اياسىندا كەمىندە 100 مىڭ جوعارى بىلىكتى ءىت-مامان دايارلاۋدى تاپسىردى. وسىعان وراي شىمكەنت قالاسىنىڭ اكىمى ءوزىنىڭ ورىنباسارلارىنا ءبىلىم بەرۋ ۇيىمدارىنداعى STEM كابينەتتەرىنىڭ ءتيىمدى جۇمىس ىستەۋىن قاداعالاۋدى، ءىت-ماماندار دايارلاۋدىڭ قالالىق كەشەندى جوسپارىن ازىرلەۋدى جۇكتەدى.

ايتا كەتەيىك، مەملەكەتتىك ورگانداردىڭ اقپاراتتىق جۇيەلەرىنىڭ ءوزارا ءتيىمدى كىرىكتىرىلۋىن شەشۋ ماقساتىندا گەوپورتال جۇيەسىن بەكىتىلگەن مەرزىمدە ىسكە قوسۋدى تاپسىردى. ناتيجەسىندە جەر قاتىناستارى، ساۋلەت، قالا قۇرىلىسى، ينجەنەرلىك جەلىلەر سالالارى بويىنشا جۇيەلى اقپاراتتىق دەرەكتەر قالىپتاستىرىلىپ، كورسەتىلەتىن مەملەكەتتىك قىزمەتتەر تولىق اۆتوماتتاندىرىلاتىن بولادى.

مەملەكەت باسشىسى ينفلياسيا دەڭگەيىن 6-4 پايىزدىق دالىزدە ۇستاپ تۇرۋ جونىندە تالاپ قويدى. باعا تۇراقتىلىعىن ساقتاۋدا كوتەرمە ۇيلەستىرۋ جەلىسىن قۇرىپ، ۇساق اۋىل شارۋاشىلىعى تاۋار وندىرۋشىلەردى سول جەلىمەن قامتاماسىز ەتۋدى جۇكتەدى.
شىمكەنتتە بۇل باعىتتا باعا تۇراقتىلىعىنا قول جەتكىزۋدە الەۋمەتتىك ماڭىزى بار ازىق-تۇلىك تاۋارلارىنىڭ 19 پوزيسياسى بويىنشا ءىرى ازىق-تۇلىك ساۋدا جەلىلەرىمەن كەلىسىم جاسالعان. ساۋدا ورتالىقتارىنا قايتارىمدى شارتپەن قارجى بەرىپ، الەۋمەتتىك 19 ءتۇرلى ازىق-تۇلىك تاۋارى شەكتى باعامەن ساتىلۋدا.

شاھار باسشىسى م.ايتەنوۆ وسى ماقساتقا بولىنەتىن قارجىنى جىل سايىن ۇلعايتاتىن بولامىز دەدى. ورىنباسارىنا اۋىل شارۋاشىلىعى تاۋار وندىرۋشىلەرىنىڭ كوتەرمە جەلىلەرمەن دەلدالسىز جۇمىس ىستەۋىن ۇيلەستىرۋ جونىندە شارالار قابىلداۋدى، كاسىپكەرلىك جانە وڭدەۋ ونەركاسىبى سالالارىنداعى جۇمىستاردى ۇيلەستىرۋدى جۇكتەدى.

سونىمكەن قاتار، پرەزيدەنت جولداۋىندا ەلىمىزدە ۆاكسينا قورى جەتكىلىكتى، ازاماتتارىمىزدىڭ تاڭداۋ مۇمكىندىگى بار ەكەنى ايتىلدى. ۆاكسينا جونىندە ءتۇرلى قاۋەسەت تاراتۋشى ازاماتتار، وزدەرى اداسقانىمەن قويماي، جۇرتتى اداستىرىپ وتىرعانىنا نازار اۋدارىلدى.

«حالىق دەنساۋلىعىن ساقتاۋدا ىندەتكە قارسى ۆاكسينا سالۋ جالعاسادى. بۇل باعىتتا جۇيەلى اقپارات جۇمىستارىن جالعاستىرۋىمىز قاجەت. قالانىڭ دەنساۋلىق ساقتاۋ سالاسىن تۇراقتى ەكپە الۋ جۇيەسىنە دايىنداۋىمىز كەرەك» - دەدى شىمكەنت اكىمى قالا اكتيۆىنىڭ وتىرىسىندا.

حالىقتىڭ جالپى اۋرۋشاڭدىق كورسەتكىشىن ناشارلاتىپ الماۋ ءۇشىن جوسپارلى سكرينينگتەر، ستاندارتتى ەكپەلەر مەرزىمدەرىندە اتقارىلۋى ءتيىس ەكەندىگىن ايتتى. ىندەتپەن كۇرەسكە تىكەلەي قاتىسپايتىن مەديسينا پەرسونالى جوسپارلى جۇمىستارىن اتقارىپ، پروفيلاكتيكالىق شارالارعا باسىمدىق بەرۋىن قامتاماسىز ەتۋ جونىندە دەنساۋلىق ساقتاۋ باسقارماسىنا تاپسىرما بەردى.

وتاندىق دارى-دارمەك پەن قۇرال-جابدىقتىڭ ۇلەسىن ارتتىرۋ ماقساتىندا قالاداعى مەديسينا ونىمدەرىن وندىرەتىن كاسىپورىنداردىڭ وندىرىستىك الەۋەتىن زەردەلەپ، كەشەندى جوسپار ازىرلەۋدى قالالىق كاسىپكەرلىك جانە يندۋستريالدى-يننوۆاسيالىق دامۋ باسقارماسىنا جۇكتەدى.