بۇگىن، 2 قىركۇيەك كۇنى شىمكەنت قالاسىندا ق ر پرەزيدەنتى ق.توقايەۆتىڭ «حالىق بىرلىگى جانە جۇيەلى رەفورمالار – ەل وركەندەۋىنىڭ بەرىك نەگىزى» اتتى قازاقستان حالقىنا جولداۋىنىڭ نەگىزگى قاعيدالارىن جۇزەگە اسىرۋ ماسەلەلەرىنە ارنالعان قالا اكتيۆىنىڭ جيىنى ءوتتى.

قالا اكىمى جولداۋدا كورىنىس تاپقان جەتى باعىتتى جانە جاريا ەتىلگەن بەس باستامانى قالا كولەمىندە جۇزەگە اسىرۋ بويىنشا ناقتى شارالار جۇزەگە اسىرىلاتىنىن ايتتى.

مۇرات ايتەنوۆ، شىمكەنت قالاسىنىڭ اكىمى
- پرەزيدەنت «بيزنەستىڭ جول كارتاسى» جانە «قاراپايىم زاتتار ەكونوميكاسى» باعدارلامالارىنىڭ مەرزىمىن 2022 جىلعا دەيىن سوزۋ تۋرالى شەشىم قابىلدادى. بيىل «بيزنەستىڭ جول كارتاسى» بويىنشا قالامىزدا بىلتىرعىمەن سالىستىرعاندا 6 ەسە كوپ قارجى قارالىپ، 4،8 ملرد. تەڭگەنى قۇرادى. جەتى ايدىڭ قورىتىندىسىمەن 970 جوبا 3 ملرد. تەڭگەگە جۋىق قارجىلاندىرىلدى. «قاراپايىم زاتتار ەكونوميكاسى» بويىنشا بيىل 80 جوبانىڭ بانك نەسيەلەرىن سۋبسيديالاۋ جانە 20 جوبانى كەپىلدەندىرۋ جوسپارلانىپ، بۇل ماقساتقا 83،4 ملرد. قارجى قارالدى. باعدارلاماعا قاتىسۋعا 84 كاسىپورىن ءوتىنىم ءبىلدىردى. ونىڭ ىشىندە 61 جوبا قارجىلاندىرىلدى.

سونىمەن بىرگە مەملەكەت باسشىسى 2025 جىلعا قاراي قايتا وڭدەۋ ەكپورتىنىڭ كولەمىن 1،5 ەسە – 24 ملرد دوللارعا دەيىن، ال ەڭبەكتىڭ ونىمدىلىگىن 30 پايىزعا كوتەرۋ مىندەتىن بەلگىلەدى. بۇل بويىنشا قالادا شيكىزات ەمەس سەكتوردا ەكسپورت كولەمىن ۇلعايتۋدا 2025 جىلعا دەيىنگى مەرزىمدە ەكسپورتقا باعدارلانعان 62 جوبا ىرىكتەلىپ، ەكسپورتتىق الەۋەتتى 608 ملرد. تەڭگەگە جەتكىزۋ جونىندە جوسپار ءتۇزىلدى. بيىلعى جەتى ايدا 10 جوبانىڭ ەكسپورتتىق كولەمى 54،5 ملرد تەڭگەنى قۇراعان.

جولداۋدا مال شارۋاشىلىعى مەن اگرارلىق سالادا ماڭىزدى مىندەتتەر بەلگىلەنگەنىپ، اۋىل شارۋاشىلىعى سالاسىنىڭ باستى مىندەتى – ەلىمىزدى نەگىزگى ازىق-تۇلىك ونىمىمەن تولىق قامتاماسىز ەتۋ ەكەندىگى باسا ايتىلدى.

قالا باسشىسى ايتىلعان مىندەتتەردى جۇزەگە اسىرۋدا شىمكەنتتە قۇرىلىسى باستالعان 2 اگرويندۋستريالدى ايماقتىڭ ەسەبىنەن قول جەتكىزۋگە بولاتىنىن اتاپ ءوتتى. ول ءوز سوزىندە اۋىلشارۋاشىلىق ونىمدەرىن تەرەڭ وڭدەۋدە «بوزارىق» تاماق ونەركاسىبى يندۋستريالدى ايماعى قۇرىلىپ، قۇنى 23 ملرد. تەڭگەنى قۇرايتىن 1 810 جۇمىس ورنىمەن 21 جوبا ىسكە اساتىنىن. ەكىنشى ايماقتا 136 گەكتارعا زاماناۋي ونەركاسىپتىك جىلىجاي̆ كەشەندەرى سالىنىپ، وندا 30 ملرد. تەڭگەگە 2 000 جۇمىس ورنىمەن 20 جوبا جۇزەگە اساتىنىن ءمالىم ەتتى.

قازاقستان حالقىنا ارناعان جولداۋىندا پرەزيدەنت زاماناۋي سيفرلىق تەحنولوگيالار ترانسفەرتىن ايرىقشا ماڭىزدى ەكەنىن ايتتى. مەملەكەتتىك ورگانداردىڭ اقپاراتتىق جۇيەلەرىنىڭ ءوزارا ءتيىمدى كىرىكتىرىلۋى تەزىرەك شەشىمىن تابۋى كەرەك دەگەن باسىمدىق ايقىندالدى. بۇل باعىتتا قالامىزدا گەوپورتال جۇيەسىن ازىرلەۋدى قولعا الدىق. جەر قاتىناستارى، ساۋلەت، قالا قۇرىلىسى، ينجەنەرلىك جەلىلەر سالالارى بويىنشا جۇيەلى اقپاراتتىق دەرەكتەر قالىپتاستىرىلۋدا. كورسەتىلەتىن مەملەكەتتىك قىزمەتتەر تولىق اۆتوماتتاندىرىلاتىن بولادى.

مەملەكەت باسشىسى وتاندىق دارى-دارمەك پەن قۇرال-جابدىقتىڭ ۇلەسىن بۇگىنگى 17 پايىزدان 50 پايىزعا جەتكىزۋ مەجەسىن بەلگىلەدى. قالادا فارماسيەۆتيكالىق كلاستەر دامىعان. مەديسينا جابدىقتارىنىڭ ءوندىرىسى دە جولعا قويىلعان. ال، بۇقارالىق سپورتتى دامىتۋ بويىنشا مەگاپوليستە بيىلدان باستاپ شالعاي ەلدى مەكەندەردە 115 سپورت الاڭشاسىن ورنالاستىرۋ باستاماسى ىسكە اسىرىلۋدا. سپورت سەكسيالارىنا جان باسىنا قارجىلاندىرۋ جۇيەسى ەنگىزىلدى. بۇل باعىتتاعى جۇمىستار الداعى ۋاقىتتا دا جالعاسىن تاباتىن بولادى.

ءوزىنىڭ قورىتىندى سوزىندە مۇرات ايتەنوۆ پرەزيدەنت بەلگىلەگەن جۇمىستى ءوز دەڭگەيىندە اتقارۋعا بارلىق مۇمكىندىكتەر بار ەكەنىن ايتىپ، بۇل مىندەتتەردى جۇزەگە اسىرۋدا بىرلەسە جۇمىس ىستەۋگە شاقىردى.

قالا باسشىسى مەگاپوليس ەكونوميكاسىنىڭ دامۋىنا وڭ اسەرىن تيگىزەتىن ساياسي قۇجاتتا ايتىلعان مىندەتتەردى جۇزەگە اسىرۋ ءۇشىن ءوزىنىڭ ورىنباسارلارى مەن سالالىق باسقارمالارعا ءبىرقارات ناقتى تاپسىرمالار جۇكتەدى.

قالا اكتيۆىنىڭ وتىرىسىندا قالالىق ءماسليحات دەپۋتاتى، ارداگەرلەر كەڭەسىنىڭ ءتوراعاسى، وزبەك ەتنومادەني بىرلەستىگىنىڭ ءتوراعاسى مەن قوعامدىق ۇيىم وكىلدەرى جولداۋداعى العا قويىلعان مىندەتتەردى جۇزەگە اسىرۋعا قاتىستى پىكىرلەرىن ءبىلدىردى.

جيىنعا قالامىزدىڭ زيالى قاۋىم وكىلدەرى، ارداگەرلەر،قالالىق ءماسليحات دەپۋتاتتارى، پارتيالار مەن قوعامدىق ۇيىمداردىڭ جەتەكشىلەرى، قۇقىق قورعاۋ ورگاندارىنىڭ باسشىلارى، اۋدان اكىمدەرى مەن باسقارمالاردىڭ باسشىلارى،جاستار جانە ب ا ق وكىلدەرى قاتىستى.