2021 جىلعى ۇلتتىق حالىق ساناعىنىڭ اياقتالۋىنا ساناۋلى كۇندەر قالدى. الدىن-الا مالىمەتتەر بويىنشا، بۇگىندە شىمكەنتتە جالپىۇلتتىق ساناقتان 1 106 637 ادام وتكەن. دەمەك، بۇعان دەيىن تىركەلگەن حالىق سانىنا شاققاندا 100،6 پايىزدى قۇرايدى. ونىڭ ىشىندە 308 660 ادام، ياعني، 28،1 پايىزى ونلاين-ساناقتان ءوتتى. 797 977 ازامات (72،6 پايىز) ءداستۇرلى ساناق بارىسىندا تىركەلىپ وتىر. 

بۇل تۋرالى بۇگىن اقپاراتتىق-كوممۋنيكاسيالىق ورتالىعىندا شىمكەنت قالاسى اكىمىنىڭ ورىنباسارى ەرعالي بىلىسبەكوۆ پەن ۇلتتىق ستاتيستيكا بيۋروسىنىڭ شىمكەنت قالاسى بويىنشا دەپارتامەنت باسشىسى سىرىم مادييەۆتىڭ قاتىسۋىمەن وتكەن بريفينگتە ءمالىم بولدى.

باسپا ءسوز جيىنىندا 15 قازاندا اياقتالعان ونلاين-ساناق كوپتەگەن وتىنىشتەرگە بايلانىستى قايتا ۇزارتىلعانى ايتىلدى. 21 قازاننان باستاپ sanaq.gov.kz سايتىندا ونلاين ساۋالناما فۋنكسياسى قايتا قوسىلعان. ساناق ساۋالدارىنا، سونداي-اق، E-Gov پورتالى نەمەسە Aitu ءموبيلدى قوسىمشاسى ارقىلى جاۋاپ بەرۋگە بولادى. ونلاين ءوتۋ مۇمكىندىگى حالىق ساناعى اياقتالعانعا دەيىن، ياعني 30 قازانعا دەيىن قولجەتىمدى بولادى. ونلاين-ساناقتان وتكەندەر سانى بويىنشا قاراتاۋ اۋدانى جەتەكشى ورىندا. اۋدان حالقىنىڭ 38،4 % جاڭا فورماتتا ساناقتان وتكەن.

- شىمكەنت قالاسىنىڭ تۇرعىندارىنا وسى ماڭىزدى ءىس-شارادا بەلسەندىلىك تانىتقاندارى ءۇشىن العىس ايتا وتىرىپ، ساناقتان ءالى دە وتپەگەن تۇرعىنداردى ساناققا بارىنشا قاتىسۋعا شاقىرامىن. ۇيگە بەيتانىس ادامداردى كىرگىزگىڭىز كەلمەسە، ينتەرنەت جەلىسى ارقىلى تىركەلۋگە بولادى. ەل ءۇشىن ايرىقشا ماڭىزدى ءارى تاريحي ناۋقانعا قاتىسىپ، قالامىزدىڭ دامۋىنا ەلەۋلى جانە قۇندى ۇلەس قوسا الاسىزدار. ساناق قورىتىندىسى ەكونوميكالىق، دەموگرافيالىق جانە الەۋمەتتىك جاعدايىمىزدى كورسەتەدى. الىنعان دەرەكتەر بارلىق دەڭگەيدەگى بيۋدجەتتەردىڭ بارىنشا وبەكتيۆتى قالىپتاسۋىنا نەگىز بولادى. ماسەلەن، تۇرعىن ءۇي سالۋ، ءبىلىم بەرۋ، دەنساۋلىق ساقتاۋ، الەۋمەتتىك سالالاردى دامىتۋعا جانە جۇمىس ورىندارىن قۇرۋعا كومەكتەسەدى، - دەدى قالا اكىمىنىڭ ورىنباسارى ەرعالي بىلىسبەكوۆ.

1-30 قازان ارالىعىندا ساناق ءداستۇرلى ادىسپەن جۇرگىزىلۋدە. شىمكەنت قالاسىندا 1400-دەن استام ساناق پەرسونالى تىكەلەي حالىق ساناعىن وتكىزىپ، ءۇي-ۇيدى ارالاۋدا. قاراشانىڭ 1-7 ارالىعىندا ساناق وتكىزۋ ادىستەمەسىنە سايكەس، باقىلاۋ ارالاۋ شارالارى قاراستىرىلعان. بۇل كەزەڭدە شامامەن 10% رەسپوندەنت قامتىلاتىن بولادى. ۇلتتىق حالىق ساناعى كەزىندە تاۋلىگىنە 24 ساعات بويى «1446» ءبىرىڭعاي call-ورتالىعى جۇمىس ىستەۋدە. اقپارات ورتالىعىنا قوڭىراۋ شالۋ تەگىن.

شىمكەنت قالاسى اكىمدىگىنىڭ باسپا ءسوز قىزمەتى