الماتى اۋەجايى جۇك تاسىمالداۋ قىزمەتىنىڭ بۇرىنعى قىزمەتكەرلەرى ءوز ەركىمەن جۇمىستان كەتۋ تۋرالى ارىز جازۋعا ءماجبۇر بولعاندارىن ايتىپ شاعىمداندى، دەپ حابارلادى كتك ارناسى.

الماتى اۋەجايى جۇك تاسىمالداۋ قىزمەتى قىزمەتكەرلەرى ءبىرىنىڭ ايتۋىنشا، جۇمىستان شىعارۋ تۋرالى شەشىم ولار ءۇشىن كۇتپەگەن جاعداي بولعان.

– بىزگە كادر بولىمىنەن قوڭىراۋ شالىپ، بارلىعىمىزدى شاقىرىپ الدى. ءبىز 7 ادام ەدىك، ءبارىمىزدى بىردەي شاقىردى. كادر بولىمىنە كەلگەن كەزدە ءبىزدىڭ ءوز ەركىمىزبەن كەتكەنىمىز جونىندەگى ءمور باسىلعان ەڭبەك كىتاپشالارىمىز بەن جۇمىستان بوساتۋ تۋرالى بۇيرىق دايىن تۇردى. ءبىز قۇجاتتارعا "ءبىزدى قانداي نەگىزدە بوساتىپ جاتىر؟" دەگەن سۇراقپەن قول قويدىق، ال ولار بىزگە "سەندەرگە ەشكىم كومەكتەسە المايدى. ءوز جۇمىس ورىندارىڭدى بوساتۋلارىڭ قاجەت دەپ جاۋاپ بەردى، – دەيدى جۇمىسشىلاردىڭ ءبىرى گالينا تاكوبايەۆا.

ونىڭ سوزىنشە، كادر بولىمىندە ولاردى ءوز ەركىمەن كەتۋدەن باس تارتسا، "ارنايى باپپەن جۇمىستان قۋامىز" دەپ قورقىتقان. ال اۋەجاي باسشىلىعى قىزمەتكەرلەردى جۇمىستان شىعارۋعا ماجبۇرلەگەنىن جوققا شىعارادى.

– الماتى حالىقارالىق اۋەجايىنىڭ بۇرىنعى جۇمىسشىلارى "الماتى حالىقارالىق اۋەجايى" اق-عا قاتىستى ايىپتاۋلارى نەگىزسىز ەكەنىن حابارلايمىز. ولار ءوز باستامالارى بويىنشا جۇمىستان بوساتىلدى جانە قازاقستان ەڭبەك كودەكسىنىڭ 49-بابى 5-تارماقشاسى بويىنشا ەڭبەك كەلىسىمشارتى بۇزىلدى، – دەدى "الماتى حالىقارالىق اۋەجايى" اق باسپا ءسوز قىزمەتىنىڭ جەتەكشىسى نايليا جاباگينا.

سوعان قاراماستان ءبىر مەزەتتە بىرنەشە جۇمىسشىنىڭ قىزمەتتەن بوساتىلۋى كۇدىك تۋدىرىپ وتىر. اۋەجايدىڭ بۇرىنعى قىزمەتكەرلەرى ولاردىڭ كوبى بۇل نىساندا 10 جىلدان استام ۋاقىتتان بەرى ەڭبەكتەنىپ كەلە جاتقانىن ايتتى. بارلىعىنىڭ اۆياسيا سالاسىندا ءبىلىمى بار. كەيبىرى ءتىپتى زەينەتكە شىعاتىن جاسقا جەتىپ قالعان.

"ءوز ەركىمەن جۇمىستان بوساتىلعاندار" قايتا جۇمىسقا قابىلداۋدى نەمەسە باسقا جۇمىس ورنىن ۇسىنۋدى تالاپ ەتىپ وتىر. جۇمىسسىز قالعاندار وسى ماسەلەنىڭ اق-قاراسىن انىقتاۋ ءۇشىن اۆياسيالىق كولىك پروكۋراتۋراسىنا شاعىمدانعان.