قازىرگى تاڭدا شىمكەنت قالاسى تۇرعىندارىنىڭ سانى 1 090 200 ادامعا جەتتى. ولاردىڭ ىشىندە جاستاردىڭ ۇلەسى جالپى حالىق سانىنىڭ 22،2%-ىن قۇرايدى. ياعني، ءۇشىنشى مەگاپوليستە 239 986 جاس بار. شىمكەنتتە 9 جوعارى جانە 38 ارناۋلى وقۋ ورنى بولسا، وندا جالپى 113 881 ستۋدەنت ءبىلىم الادى.

100-دەن استام ەتنوس وكىلدەرى مەكەن ەتەتىن وڭىرىمىزدە 17 ەتنومادەني بىرلەستىكتىڭ جانىنان جاستار قاناتتارى قۇرىلعان. جوعارى جانە ورتا ارناۋلى وقۋ ورىندارىندا  29 «دوستىق» كلۋبى اشىلىپ، جۇمىس جاسايدى.

شىمكەنت قالاسىنداعى  «جاڭعىرۋ جولى» جاستار قوزعالىسى   2018 جىلى قۇرىلىپ، بۇگىندە قارقىندى جۇمىس جاساپ كەلەدى.

«جاڭعىرۋ جولى» جاستار قوزعالىسىنىڭ نەگىزگى ماقساتى – قازاقستاندا قوعامدىق كەلىسىم مەن جالپىۇلتتىق بىرلىكتى نىعايتۋ جۇمىستارىنا جاستاردى تارتۋ بولىپ تابىلادى.

قازىرگى تاڭدا ۇيىمنىڭ قالالىق شتابىنا 35 جاس مۇشەلىك ەتەدى. ولاردىڭ قاتارىندا مەملەكەتتىك مەكەمە قىزمەتكەرلەرى، جاستار قاناتتارىنىڭ، «دوستىق» كلۋبتارىنىڭ مۇشەلەرى، ت.ب. ەتنوس جاستارى بار.

جىل باسىنان بەرى قازاقستان حالقى اسسامبلەياسى «جاڭعىرۋ جولى» جاستار قوزعالىسى مۇشەلەرىنىڭ قاتىسۋىمەن 22 ءىس-شارا ۇيىمداستىرىلدى. ونىڭ ىشىندە:

«جاڭعىرۋ جولى» رجق وڭىرلىك شتابى مەن «Jas Otan» جق شىمكەنت قالالىق فيليالى اراسىندا ءوزارا ىنتىماقتاستىق تۋرالى مەموراندۋم ءتۇزىلدى.

جاستار باستامالارىنا قولداۋ ءبىلدىرۋ، ولاردى جالپىمەملەكەتتىك ماقساتتار مەن مىندەتتەرگە جۇمىلدىرۋ، بەيرەسمي جاستار كوشباسشىلارىمەن جۇمىس جۇرگىزۋ باعىتىندا 16 كەزدەسۋ وتكىزىلدى.

جاستارعا ارنالعان مەملەكەتتىك باعدارلامالاردى ءتۇسىندىرۋ، كاسىپكەرلىك نەگىزدەرىنە وقىتۋ، تەرىس ءدىني اعىمداردىڭ ىقپالىنان ساقتاۋ باعىتىندا ارنايى لەكتورييلەر، دارىستەر، سەمينارلار، شەبەرلىك ساباقتارى، اكسيالار ۇيىمداستىرىلدى.

شىمكەنت قالاسىنداعى يۋۆەنالدى پوليسيا قىزمەتكەرلەرىمەن بىرلەسە «شىمكەنت – ءقاۋىپسىز قالا!» تاقىرىبىندا ورتا ارناۋلى وقۋ ورنىنىڭ ستۋدەنتتەرى اراسىندا تۇسىندىرمە جۇمىستارى جۇرگىزىلدى.

مەملەكەت باسشىسىسىنىڭ «حالىق بىرلىگى جانە جۇيەلى رەفورمالار – ەل وركەندەۋىنىڭ بەرىك نەگىزى» جولداۋىنىڭ باسىم باعىتتارىن ءتۇسىندىرۋ باعىتىندا جاستار اراسىندا كەزدەسۋلەر ۇيىمداستىرىلدى.   

قالالىق اسسامبلەيا الاڭىندا ۇزدىك كاسىپكەرلەردىڭ «قالاي تابىستى بولامىن؟» تاقىرىبىندا جاستارعا ارنالعان 2 بيزنەس شەبەرلىك دارىستەرى وتكىزىلدى.

ق ر تاۋەلسىزدىگىنىڭ 30 جىلدىعىنا وراي باستاۋ العان «تاۋەلسىزدىك مەن ءۇشىن نەنى بىلدىرەدى؟» جوباسى اياسىندا قالالىق ەتنومادەني بىرلەستىكتەر جانىنداعى جاستار قاناتىنىڭ مۇشەلەرى ت.پاك پەن ك.بويكو مەملەكەتتىك تىلدە تاۋەلسىزدىكتىڭ 30 جىلدىعىمەن قۇتتىقتاپ، بەينەۇندەۋ جولدادى.

مەملەكەتتىك رامىزدەر كۇنىنە ارنالعان رەسپۋبليكالىق #مەنىڭتۋىم پاتريوتتىق اكسياسى ءوتىپ، مەملەكەتتىك رامىزدەردىڭ قاسيەتى مەن ماڭىزدىلىعى، تاريحى مەن اۆتورى جونىندە كەڭىنەن ايتىلدى.

شىمكەنت قالالىق اسسامبلەيانىڭ تاپسىرىسىمەن «Ontustik» تەلەارناسىنىڭ ەفيرىنەن بەرىلەتىن «بىرلىگى بەكەم ەل» تەلەباعدارلاماسىنىڭ «بۇل ءبىزدىڭ ءرامىز!» (مەملەكەتتىك رامىزدەر كۇنىنە وراي ەتنومادەني بىرلەستىكتەر جانىنداعى جاستار قاناتتارى وكىلدەرىنىڭ مەملەكەتتىك رامىزدەرگە كورسەتكەن سىي-قۇرمەتى تۋرالى) شىعارىلىمى   دايىندالىپ، ەفيردەن بەرىلدى.

جاستاردى بۇقارالىق سپورتقا باۋلۋ، ولاردىڭ بوس ۋاقىتىن ءتيىمدى پاي̆دالانۋىنا جانە بەلسەندى ءومىر سالتىن ۇستانۋىنا ىقپال ەتۋ ماقساتىندا «13 Legion» ۇيىمى مەن جاستار قوزعالىسىنىڭ ۆولونتەرلىق توبى «Street-workout» كوشە سپورتىنان ءنۇرسات اللەياسىندا قالا تۇرعىندارىنا ارناپ شەبەرلىك ساعاتىن ۇيىمداستىردى.

ەتنومادەني بىرلەستىكتەر جانىنداعى جاستار قاناتتارىنىڭ وكىلدەرى، ۆولونتەرلار جالپىحالىقتىق تازالىق كۇنى اكسياسىنا قاتىسىپ، قالا اۋماعىنداعى كولدەردىڭ، وزەندەردىڭ جاعالاۋلارىندا سانيتارلىق تازالىق جۇمىستارىن جۇرگىزدى.

سونداي-اق، رەسپۋبليكالىق «BizBirgemiz» اكسياسىن قولداۋ ماقساتىندا پاندەميا كەزىندە قالامىزداعى قوعامدىق  جۇمىستارعا 100-گە جۋىق شىمكەنت قالاسىنىڭ ۆولونتەرلارى جۇمىلدىرىلىپ، 20 مىڭعا جۋىق بەتپەردەلەر،  مەديسينالىق  قولعاپتار مەن  اسكوربيندى قىشقىل دارۋمەندەر تاراتىلدى.

شىمكەنت قالالىق قازاقستان حالقى اسسامبلەياسىنىڭ مۇشەلەرى مەن جاستار وكىلدەرى «ريددەر، ءبىز بىرگەمىز!» قايىرىمدىلىق اكسياسىن وتكىزىپ، جيىنتىعى 8 توننانى قۇرايتىن، قۇنى 12 ملن. تەڭگە بولاتىن گۋمانيتارلىق كومەك جونەلتتى.

سونىمەن قاتار، «ءبىز بىرگەمىز!» دونورلىق قايىرىمدىلىق اكسياسى وتكىزىلىپ، ناتيجەسىندە  45 ەرىكتى جاستاردان 15 ليترگە جۋىق قان الىندى. جينالعان قاجەتتى قان اۋىر حالدەگى ناۋقاستار مەن ونكولوگيالىق اۋرۋلاردى ەمدەۋگە باعىتتالدى.

قازاقستان حالقى اسسامبلەياسىنىڭ «جاڭعىرۋ جولى» رجق  شىمكەنت قالالىق شتابىنىڭ ءتوراعاسى ن.ءابدىرايىم مەن «دوستىق» كلۋبىنىڭ مۇشەلەرى «Ontustik» تەلەارناسىنىڭ «تاڭ نۇرى»،  «Zhastar LIFE» تەلەباعدارلامالارىنا قاتىسىپ،  جاستار تاراپىنان وڭىردە اتقارىلىپ جاتقان جانە الداعى ۋاقىتتا اتقارىلاتىن جۇمىستار جونىندە سۇحبات بەردى.

وسكەمەن جانە نۇر-سۇلتان قالالارىندا قحا ەتنومادەني بىرلەستىكتەر جانە جاستار ۇيىمدارى وكىلدەرىنىڭ قاتىسۋىمەن ەتنومادەني بىرلەستىكتەرگە ارنالعان پراكتيكالىق سەمينار-ترەنينگ ۇيىمداستىرىلىپ، ولارعا قحا «جاڭعىرۋ جولى» رجق شىمكەنت قالالىق شتابىنىڭ 7 وكىلى قاتىستى.

اتقارىلىپ جاتقان جۇمىستار تۋرالى اقپارات تۇراقتى تۇردە وڭىرلىك ب ا ق پەن الەۋمەتتىك جەلىلەردە جاريالانۋدا.  

جالپى، قازىرگى تاڭدا «جاڭعىرۋ جولى» قوزعالىسىنىڭ جۇمىسىن جانداندىرۋعا ەرەكشە نازار اۋدارىلىپ كەلەدى.

الداعى ۋاقىتتا، جاستاردى ەكونوميكالىق، الەۋمەتتىك سالانى نىعايتۋ، ەلدەگى قوعامدىق-ساياسي تۇراقتىلىقتى، كەلىسىمدى ساقتاۋ پروسەستەرىنە تارتۋ، جاستار مادەنيەتىن قالىپتاستىرۋ، ولاردىڭ جان-جاقتى دامۋىنا، ءبىلىم، زياتكەرلىك جانە كاسىبي-دەڭگەيىن ارتتىرۋ ماقساتىندا بىرنەشە جوبالار جۇزەگە اسىرىلاتىن بولادى.

سونداي-اق،  اسسامبلەيانىڭ جاستار باعىتىنداعى قىزمەتىن ودان ءارى جەتىلدىرۋ ءۇشىن «قازاقستان حالقى اسسامبلەياسى» عيماراتىندا جاستار وكىلدەرى مەن ەرىكتىلەرگە ارنالعان كابينەتپەن جانە قحا باستامالارىن ىسكە اسىرۋ ءۇشىن كوۆوركينگ-ايماقپەن قامتاماسىز ەتىلۋى جوسپارلانۋدا.