قىسقى كونكۋرس قورىتىندىسى بويىنشا ماگيستراتۋراعا ءبىلىم گرانتتارى يەگەرلەرىنىڭ ءتىزىمى جاريالاندى. مەملەكەتتىك گرانتتاردى 945 قازاقستاندىق جەڭىپ الدى. ونىڭ ىشىندە عىلىمي-پەداگوگيكالىق ماگيستراتۋراعا 837 ادام، بەيىندىك ماگيستراتۋراعا 108 ادام وقۋعا ءتۇستى. بۇل تۋرالى ءبىلىم جانە عىلىم مينيسترلىگىنىڭ باسپا ءسوز قىزمەتى ءمالىم ەتتى.

مينيسترلىك مالىمەتىنشە، ۇمىتكەرلەردىڭ اراسىندا "ينجەنەرلىك، وڭدەۋ جانە قۇرىلىس سالالارى"، "جاراتىلىستانۋ عىلىمدارى، ماتەماتيكا جانە ستاتيستيكا"، "الەۋمەتتىك عىلىمدار، جۋرناليستيكا جانە اقپارات" سىندى باعىتتار سۇرانىسقا يە بولدى.

بيىل مينيسترلىك ماگيستراتۋرا مەن دوكتورانتۋراعا گرانتتار بەرۋ ءۇشىن كونكۋرستى ەكى رەت ءداستۇرلى تۇردە جازدا جانە العاش رەت قوسىمشا قىستا ۇيىمداستىردى. وسىلايشا، ءتۇرلى سەبەپتەرگە بايلانىستى ماگيستراتۋراعا تۇسە الماعان ۇمىتكەرلەر ءبىلىم بەرۋ گرانتتارىن تاعايىنداۋ كونكۋرسىنا قاتىسۋعا ەكىنشى مۇمكىندىك الدى.

بارلىق گرانت يەگەرلەرى 10 قاڭتارعا دەيىن قۇجاتتارىن ۋنيۆەرسيتەتتەردىڭ ۆيرتۋالدى قابىلداۋ كوميسسيالارى ارقىلى تاپسىرۋى ءتيىس. وقۋ جوعارى وقۋ ورىندارىنىڭ اكادەميالىق كۇنتىزبەسىنە سايكەس باستالادى.

مينيسترلىك ىرىكتەۋ ساپاسىن جاقسارتۋ ءۇشىن اقىلى بولىمگە ماگيستراتۋراعا ءتۇسۋ ءۇشىن شەكتى بالل كوتەرىلگەنىن، اتاپ ءوتتى. مەملەكەتتىك ءبىلىم بەرۋ تاپسىرىسى بويىنشا جانە اقىلى نەگىزدە عىلىمي-پەداگوگيكالىق ماگيستراتۋراعا ءتۇسۋ ءۇشىن شەكتى بالل – 75، بەيىندى ماگيستراتۋراعا ءتۇسۋ ءۇشىن 50 بالدى قۇرايدى.

گرانت يەگەرلەرىنىڭ تولىق ءتىزىمىن مىنا جەردەن كورۋگە بولادى