شىعىس قازاقستان وبلىسى ريددەر قالالىق تۇرعىن ءۇي كوممۋنالدىق شارۋاشىلىعى ءبولىمىنىڭ بۇرىنعى باسشىسى قۋات مۇحامەدچينوۆ 4 جىلعا باس بوستاندىعىنان ايىرىلدى. ونىمەن ىستەس بولعان ەكى ازاماتقا دا ۇكىم شىقتى، دەپ حابارلادى 24.kz تەلەارناسى.
بەلگىلى بولعانداي، قۋات مۇحامەدچينوۆ شىعىس قازاقستان وبلىسى اكىمىنىڭ ورىنباسارى ازامات مۇحامەدچينوۆتىڭ تۋعان باۋىرى.
ەكس-شەنەۋنىككە "ەلەكتر جەلىسى قۇرىلىس نىسانىن سالۋ كەزىندە" مەملەكەتكە 146 ميلليون تەڭگەگە جۋىق شىعىن كەلتىردى دەگەن ايىپ تاعىلعان.
تەلەارنا مالىمەتىنشە، ەكس-شەنەۋنىك مەردىگەر كاسىپورىننىڭ ىستەمەگەن جۇمىس اكتىسىنە قول قويىپ، قابىلداعان. سالدارىنان قىرۋار قارجى مەردىگەرگە ءوتىپ كەتكەن. اكتىدە كورسەتىلگەن قۇرىلىس ماتەريالدارى شىن مانىندە جوق بولىپ شىققان.
قۋات مۇحامەدچينوۆمەن بىرگە ونىڭ ەكى سىبايلاسى "ەڭبەك-وسكەمەن" رەسپۋبليكالىق مەملەكەتتىك كاسىپورىنىنىڭ جەتەكشىسى اسحات قۇدايبەرگەنوۆ پەن "ەليزور-م" ءجشس-نىڭ ديرەكتورى الەكسەي بەحتولد تا قىلمىستىق جاۋاپكەرشىلىككە تارتىلدى. الدىڭعىسى قىلمىستىق توپ جۇمىسىنا بولىستى دەپ ايىپتالىپ، 4 جىلعا باس بوستاندىعىنان ايىرىلسا، سوڭعىسى وسىنداي ايىپپەن 3 جىلعا سوتتالعان.
ايىپتالۋشىلار بۇعان دەيىن ريددەردە وتكەن العاشقى سوتتا اقتالىپ شىققان. الايدا پروكۋراتۋرا شاعىمى بويىنشا ءىس وبلىستىق سوتتا قايتا قارالىپ، كۇدىكتىلەر كىنالى دەپ تانىلعان.
– ولار ەندىگى ورتا قاۋىپسىزدىكتەگى تۇزەتۋ مەكەمەلەرىندە جازاسىن وتەپ جاتىر. ەلەكتر جەلىسى سالىنبادى، ال قارجى تالان تاراجعا ءتۇسىپ كەتكەن. العاشقى سوتتا دالەلدەر ءتيىستى دەڭگەيدە ەسكەرىلمەدى. دەگەنمەن وبلىستىق سوت ونىڭ بارلىعىن تۇزەپ، بارلىق دالەل-دايەكتى ايقىندادى. سوتتالۋشىلار ەندى جوعارعى سوتقا شاعىمدانا الادى، – دەدى وبلىستىق سوت سۋدياسى.
داۋلى ەلەكتر جەلىسىنىڭ قۇرىلىسى 2017 جىلى باستالعان. جوبا بويىنشا ەلەكتر جەلىسى ريددەردەن باتىس التاي قورىعىنا دەيىن تارتىلۋى كەرەك بولعان. الايدا جوبا اياقسىز قالىپ وتىر.
پىكىر قالدىرۋ