دەموكراتيالىق پارتيا باستاماشىل توبىنىڭ جەتەكشىسى جانبولات مامايدى قاماۋ مەرزىمى تاعى ۇزارتىلدى. بۇل تۋرالى بەلسەندىنىڭ زايىبى ينگا يمانباي ءمالىم ەتتى.

"سوت جانبولات مامايدىڭ تۇرمەدە قامالۋىن تاعى ءبىر ايعا سوزدى. جاڭا سوت قاۋلىسى بويىنشا ەندى Zhanbolat Mamay 12 ماۋسىمعا دەيىن تۇرمەدە وتىرادى. بۇل ارينە ساياسي قىسىم! جانبولاتتىڭ تۇرمەدە وتىراتىنداي ەش جازىعى جوق" دەپ جازدى ينگا يمانباي Facebook پاراقشاسىندا.

سونداي-اق ول ەرتەڭ الماتىداعى شوقان ءۋاليحانوۆ اتىنداعى الاڭعا جانبولاتتىڭ، باسقا دا ساياسي تۇتقىنداردىڭ بوستاندىعىن تالاپ ەتىپ ميتينگكە شىعاتىندارىن جەتكىزدى.

سوڭعى ۋاقىتتا "دەمپارتيا" جاقتاستارىن اڭدۋ، قاماۋ، ايىپپۇل سالۋ ارەكەتتەرى جيىلەگەن. وسىعان دەيىن مەيىرحان جولايەۆ پەن ارۋجان دۇيسەبايەۆا "بەيبىت جيىن وتكىزۋ ءتارتىبىن بۇزدى" دەگەن ايىپپەن 15 تاۋلىككە قامالسا، بىرنەشە بەلسەندىگە ايىپپۇل سالىنعان.

بەلسەندىلەر مۇنى بيلىكتىڭ 7 مامىر كۇنگى ميتينگكە شىعارماۋعا تىرىسۋ ارەكەتى دەپ باعالايدى.

قوعام بەلسەندىسى جانبولات ماماي اقپان ايىنان بەرى قاماۋدا وتىر. ول الدىمەن قاڭتار وقيعاسى قۇرباندارىنا ارنالعان قارالى ميتينگتى ۇيىمداستىرعانى ءۇشىن 15 تاۋلىككە، ارتىنشا ەكى قىلمىستىق ءىس بويىنشا ەكى ايعا قاماۋعا الىنعان. وعان  "قارابەت" دەگەنى ءۇشىن قۇقىققورعاۋ ورگانى قىزمەتكەرىن قورلادى، نەسيە امنيستياسىنا بايلانىستى "جالعان اقپارات" تاراتتى دەگەن ايىپ تاعىلىپ وتىر. اتالعان ايىپتارعا سايكەس، سوت كىنالى دەپ تاپسا، بەلسەندى 3 جىلعا باس بوستاندىعىنان ايىرىلۋى مۇمكىن.