وبلىس ورتالىعىنداعى بوبروۆكا، مۇرات ساياجايلارىنداعى تۇيتكىلدى ماسەلەلەر ايماق باسشىسىنىڭ تىكەلەي باقىلاۋىنا الىنعان. تۇرعىنداردى تولعاندىرعان سۇراقتاردى شەشۋ ماقساتىندا نۇرلان ۇرانحايەۆ حالىقپەن كەزدەسۋلەر وتكىزىپ كەلەدى. بۇگىنگى جيىندا مامىر ايىنداعى العاشقى كەزدەسۋدەن كەيىنگى اتقارىلعان جۇمىستار پىسىقتالدى.

ەسكە سالساق، جىلدار بويى قوردالانعان ماسەلەلەردى شەشۋ ءۇشىن وڭىرلىك اكىمدىك تاراپىنان «جول كارتاسى» ازىرلەنگەن بولاتىن. سوعان سايكەس ساياجايلاردا جول بەلگىلەرى مەن 4 «سەرگەك» كامەراسى ورناتىلىپ، 60-تان استام رۇقسات ەتىلمەگەن قوقىس الاڭدارى جويىلدى (4370 م3 قوقىس شىعارىلدى). سونداي-اق 11 ايالداما ورناتىلىپ، تاعى ۇشەۋىن الداعى 15 كۇننىڭ ىشىندە قۇرۋ جوسپارلانىپ وتىر. بۇدان بولەك شىلدە ايىنىڭ سوڭىندا بوبروۆكا جانە مۇرات تۇرعىن القاپتارىندا بالالارعا ارنالعان ويىن، ودان بولەك سپورت، جەڭىل اتلەتيكا الاڭدارى سالىنادى. ءقازىر تۇرعىن ۇي-كوممۋنالدىق شارۋاشىلىق ءبولىمى تاراپىنان جەر تەلىمىن ءبولۋ جۇمىستارى جۇرگىزىلىپ جاتىر.

جيىن بارىسىندا حالىق «جول كارتاسى» اياسىندا اتقارىلىپ جاتقان جۇمىستارعا ءوز ريزاشىلىقتارىن ءبىلدىردى. دەسەكتە، حالىقتىڭ باسىم بولىگى «سەمەي.مۇرات.دوۆەريە» جانە «بوبروۆكا» ابتك جەرگىلىكتى قوعامدىق بىرلەستىكتىڭ قىزمەتىنە قاتىستى شاعىمدارىن اشىق جەتكىزدى. تۇرعىنداردىڭ ايتۋىنشا، كووپەراتيۆ ءتوراعالارى قىزمەتتىك وكىلەتتىكتەرىن قولدانىپ، بيلىكتى اسىرا پايدالانعان.

وبلىس اكىمى ەكى كووپەراتيۆكە قاتىستى جۇمىستىڭ بارلىعى زاڭ اياسىندا ىسكە اساتىنىن جانە بارلىق قۇزىرلى ورگاندار بىرلەستىككە قاتىستى ماسەلەنى شەشۋ باعىتىندا جۇمىستار جۇرگىزىپ جاتقانىن ايتتى. 

ءبىر ساعاتقا سوزىلعان جيىندى قورىتىندىلاي كەلە نۇرلان ۇرانحايەۆ جانە تۇرعىندار 2 تامىز كۇنى قايتا كەزدەسۋ وتكىزۋگە كەلىستى.