شىمكەنتتە ەكى جىل بۇرىن بولعان قىلمىستىڭ بەتى اشىلدى، دەپ حابارلايدى Polisia.kz. ەڭبەكشى اۋدانىنىڭ تۇرعىنى 2 جىل بۇرىن 32 جاستاعى ۇلىنىڭ جوعالىپ كەتكەنىن ايتىپ، پوليسياعا شاعىمدانعان.
"اناسى ەر ادامنىڭ ەكى اپتا بۇرىن ۇيدەن شىعىپ، قايتىپ ورالماعانىن ايتتى. حابار-وشارسىز كەتكەن ازاماتتىڭ جۇرگەن جەرىن انىقتاۋ ماقساتىندا كريمينالدىق پوليسيا قىزمەتكەرلەرى كەشەندى شارالار جۇرگىزدى. ەر ادامنىڭ سىرتقى كەلبەتىن سيپاتتايتىن باعدارلار قالالىق پوليسيا دەپارتامەنتىنىڭ باسقارمالارىنا، سونداي-اق ەلىمىزدىڭ بارلىق ايماقتارىنداعى پوليسيا بولىمدەرىنە جولداندى"، - دەيدى ۆەدومستۆو.
الايدا ىزدەۋ جۇمىستارى ناتيجە بەرمەگەن. تەك 2 جىلدان كەيىن عانا قىلمىستىڭ بەتى اشىلعان.
"كەزدەيسوق كۋاگەردىڭ جاۋابىنا سايكەس، ازاماتتىڭ جوعالىپ كەتۋىنە ءىنىسىنىڭ قاتىسى بارى انىقتالدى. وتباسىلىق جانجال كەزىندە ول وگەي باۋىرىن ارماتۋرامەن بىرنەشە رەت ۇرىپ، ولتىرگەنى انىقتالدى. وگەي اعاسىنىڭ ماس كۇيىندە اناسىمەن جانجالداساتىنى ونى وسىنداي ارەكەتكە يتەرمەلەگەن. اسا اۋىر قىلمىستىڭ ءىزىن جاسىرۋ ءۇشىن قاسكۇنەم ءمايىتتى سىرتتاعى دارەتحاناعا تاستاپ، شۇڭقىردى بەتونمەن تولتىرىپ، ۇستىنە شاعىن ساراي تۇرعىزعان"، - دەيدى پوليسيا.
كۇدىكتى قاماۋعا الىندى. ەڭبەكشى اۋداندىق پوليسيا ءبولىمىنىڭ تەرگەۋشىلەرى قىلمىستىق ءىستى سوتقا جولدادى.
پىكىر قالدىرۋ