كەشە ءورت شىققان اقكەنت شاعىن اۋدانىنداعى تۇرعىن ۇيدەگى تۇتىنگە قارسى قورعانىس جۇيەسىنەن اقاۋ شىققان. بۇل تۋرالى الماتى توتەنشە جاعدايلار دەپارتامەنتى حابارلادى.
"جوعارى قاباتتى عيماراتتاردا ەدەندىك ءتۇتىن شىعارۋ جۇيەسى ارنايى قاراستىرىلعان. ەگەر جۇمىس ىستەپ تۇرسا ەدەندەردە مۇنداي قاتتى ءتۇتىن بولماس ەدى"، – دەدى الماتى تجد باستىعىنىڭ مىندەتىن اتقارۋشى ەرلان الىبەكوۆ.
سونداي-اق الەۋمەتتىك جەلىدە تۇرعىنداردىڭ تەرەزەدەن سەكىرگەن ۆيدەوسى قىزۋ تالقىلانعان بولاتىن. ەرلان الىبەكوۆ بۇعان قاتىستى پىكىر ءبىلدىردى.
"ءورت كەزىندە وتە قيىن جاعدايلار ورىن الدى. تۇرعىندار قاتتى بايبالام سالدى. ولاردى ۇرەيلەنبەۋگە شاقىرعان ەدىك. بالكونعا شىعىپ، ەسىكتەردى جاۋىپ، كومەك كۇتۋگە دە بولاتىن ەدى. ءبىز كەشە ۇيلەردىڭ ىشىندە قاتتى ءتۇتىننىڭ بولماعانىن كوردىك. مۇمكىندىك بولعاندا ەسىكتى جاۋىپ، قۇتقارۋشىلاردى كۇتۋگە بولاتىن ەدى"، – دەدى ەرلان الىبەكوۆ.
سونداي-اق تۇرعىندار ءورت سوندىرۋشىلەر كەلمەي تۇرىپ تەرەزەدەن سەكىرگەن. الىبەكوۆتىڭ ايتۋىنشا، مۇنداي كوپقاباتتى ۇيلەردە ءورت شىققان جاعدايدا تۇرعىندار سابىر ساقتاپ، ءتۇتىن شىعارمايتىن باسپالداق الاڭدارىن پايدالانۋعا تىرىسۋى كەرەك.
پىكىر قالدىرۋ