پاۆلودار وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا پوليسيا دەپارتامەنتىنىڭ بۇرىنعى باستىعى نۇرلان ماسىموۆكە، ونىڭ ەكس-ورىنباسارى دامير سيرازيديموۆكە جانە كاسىپكەر ەۆگەنيي ەۆكوۆيچكە قاتىستى ءىستى تىڭداۋ كەزىندە پروكۋرور سوتتالۋشىلاردىڭ ءارقايسىسىنا جازا قولدانۋدى سۇرادى.
مەملەكەتتىك ايىپتاۋشى ازامات عاريفوللا سوتتالۋشىلارعا پارا الدى جانە اقشا جىمقىردى دەگەن ايىپ تاعىلىپ، كىناسى تولىق دالەلدەنگەنىن ايتتى.
ول پاۆلودار وبلىسى پوليسيا دەپارتامەنتىنىڭ بۇرىنعى باسشىسى نۇرلان ءماسىموۆتى 13 جىلعا باس بوستاندىعىنان ايىرۋدى سۇرادى. سونداي-اق، زاڭ وكىلىنىڭ ايتۋىنشا، ونىڭ الاكول جاعاسىنداعى ءۇيىن تاركىلەپ، پارا تۇرىندە العان 16 ميلليون تەڭگەنى قايتارۋ كەرەك.
سونىمەن قاتار ول سوتتالۋشىنى "پوليسيا گەنەرال-مايورى" ارنايى اتاعى مەن ءىى دارەجەلى "ايبىن" وردەنىنەن ايىرۋدى، مەملەكەتتىك قىزمەتتە لاۋازىم اتقارۋعا تىيىم سالۋدى سۇرادى.
پروكۋرور ونىڭ بۇرىنعى ورىنباسارى دامير سيرازيديموۆتى 11 جىلعا، كاسىپكەر ەۆگەنيي ەۆكوۆيچتى كولىگىن تاركىلەي وتىرىپ، 5 جىلعا باس بوستاندىعىنان ايىرۋدى سۇرادى.
نۇرلان ءماسىموۆتىڭ ءوزى دە، ادۆوكاتتارى دا كىناسىن مويىنداماي، جارىسسوزدە قاڭتار وقيعاسىنان كەيىن فاميلياسىنا بولا جاپا شەككەنىن مالىمدەدى.
پىكىر قالدىرۋ