ءماجىلىس ءتوراعاسى ەرلان قوشانوۆ قازاقستاننىڭ ءحى ازاماتتىق فورۋمىنىڭ جۇمىسىنا قاتىسىپ، مەملەكەت باسشىسى قاسىم-جومارت توقايەۆتىڭ فورۋم قاتىسۋشىلارىنا ارنالعان قۇتتىقتاۋ ءسوزىن وقىپ بەردى.

مەملەكەت باسشىسى ءوز ۇندەۋىندە قاتىسۋشىلاردى قۇتتىقتاپ، 20 جىل ىشىندە بۇل فورۋمنىڭ تيىمدىلىگى مەن قاجەتتىلىگى دالەلدەنىپ، سالماقتى ويلار مەن ساليقالى پىكىرلەر ايتىلاتىن الاڭعا اينالعانىن اتاپ ءوتتى.

قازاقستاندا جۇرگىزىلىپ جاتقان اۋقىمدى وزگەرىستەر قوعامدا جاڭا ەتيكا قالىپتاستىرۋدى تالاپ ەتەدى. وسى ورايدا ادىلدىك پەن گۋمانيزم، ءوزارا سەنىم مەن جاۋاپكەرشىلىك، زاڭ مەن ءتارتىپ، ەڭبەكقورلىق پەن ءبىلىمپازدىق جاڭا ەتيكانىڭ وزەگى بولۋعا ءتيىس. مەملەكەت پەن ۇكىمەتتىك ەمەس سەكتوردىڭ تىعىز ىنتىماقتاستىعى ەلىمىزدى جان-جاقتى دامىتۋعا ىقپال ەتىپ، ادىلەتتى قازاقستاندى قۇرۋعا جول اشادى دەپ سەنەمىن، – دەلىنگەن پرەزيدەنتتىڭ قۇتتىقتاۋىندا.

ءماجىلىس سپيكەرى پرەزيدەنتتىڭ باستاماسىمەن ەلىمىزدە مەملەكەتتىك بيلىك ينستيتۋتتارىن جەتىلدىرۋگە جانە ازاماتتىق قوعامنىڭ دامۋىنا باعىتتالعان رەفورمالار جۇزەگە اسىرىلىپ جاتقانىن اتاپ ءوتتى. ول ۇكىمەتتىك ەمەس ۇيىمدار مەملەكەت باسشىسىنىڭ بارلىق ماڭىزدى باستامالارىنىڭ درايۆەرى جانە ەلدەگى دەموكراتيالىق وزگەرىستەردىڭ باياندى بولۋىنىڭ كەپىلى بولۋعا ءتيىس ەكەنىن اتاپ ءوتتى.

– پرەزيدەنت ازاماتتىق قوعامدى مەملەكەتتىڭ ەڭ وزەكتى مىندەتتەرىن تالقىلاۋعا تارتۋ قاجەتتىگىن بىرنەشە رەت اتاپ ءوتتى. سوندىقتان ءبىزدىڭ ماقساتىمىز – قوعامدى تولعاندىراتىن بارلىق پىكىرتالاستاردى پارلامەنت قابىرعاسىندا تالقىلاۋ. ءماجىلىس جانىندا ۇكىمەتتىك ەمەس ۇيىمدار، ساراپشىلار مەن عالىمدارعا ءتۇرلى ماسەلە بويىنشا ءوز ۇستانىمدارىن تانىستىرۋعا مۇمكىندىك بەرەتىن قوعامدىق پالاتا جۇمىس ىستەيدى. وتىرىستاردىڭ ءبىرىن ەلىمىزدەگى ازاماتتىق سەكتوردى دامىتۋعا ارناعان ءجون دەپ سانايمىن، – دەدى ءماجىلىس ءتوراعاسى.

سونداي-اق  ەرلان قوشانوۆ بۇگىندە ماجىلىستە زاڭ شىعارۋ جۇمىسى بارىسىندا قوعامدىق پىكىر ەسكەرىلەتىنىن ايتتى. پالاتا سپيكەرى مىسال رەتىندە ازاماتتارعا مەملەكەت باسقارۋ ىسىنە قاتىسۋعا جاڭا مۇمكىندىكتەر بەرىپ، پەتيسيالار ينستيتۋتىن ەنگىزگەن قوعامدىق باقىلاۋ تۋرالى زاڭنىڭ قابىلدانعانىن اتاپ ءوتتى.

ءماجىلىس ءتوراعاسى بارلىق زاڭ شىعارۋ پروسەسىنىڭ اشىقتىعى بۇگىندە دەپۋتاتتار جۇمىسىنىڭ باستى ءپرينسيپى جانە ونسىز قوعامنىڭ سەنىمىنە قول جەتكىزۋ مۇمكىن ەمەس ەكەنىنە نازار اۋداردى. سونىمەن قاتار ازاماتتىق بەلسەندىلەردى ءماجىلىستىڭ زاڭ شىعارۋ جۇمىسىنا اتسالىسۋعا شاقىردى.

قازاقستاننىڭ XI ازاماتتىق فورۋمى استانادا 600-دەن استام ادامدى، ونىڭ ىشىندە ورتالىق ازيا ەلدەرىنەن كەلگەن دەلەگاتتاردىڭ باسىن قوستى. ءىس-شارادا بەلسەندىلەر، ۇكىمەتتىك ەمەس ۇيىمداردىڭ كوشباسشىلارى، مەملەكەتتىك ورگاندار مەن بيزنەس-قوعامداستىقتاردىڭ وكىلدەرى ەل دامۋىنىڭ جانە جاھاندىق سىن-قاتەرلەردى ەڭسەرۋدىڭ وزەكتى ماسەلەلەرىن تالقىلايدى.