پروكۋراتۋرا بىلتىر "مەتروپوليتەن" كمك، "الماتىمەتروقۇرىلىس" اق لاۋازىمدى تۇلعالارىنا قاتىستى بيۋدجەت قاراجاتىن جىمقىرۋ دەرەگى بويىنشا تەرگەۋدى اياقتادى، - دەپ حابارلايدى Qamshy.kz اقپارات اگەنتتىگى باس كولىك پروكۋراتۋراسىنا سىلتەمە جاساپ.
باس كولىك پروكۋراتۋراسىنىڭ كەڭەيتىلگەن القا وتىرىسىندا 2023 جىلدىڭ جۇمىسى قورىتىندىلاندى. جۇمىستار ناتيجەسىندە مەملەكەتكە 53 ميلليارد تەڭگەدەن اسا سوماعا اكتيۆتەر قايتارىلعان.
"مەتروپوليتەن" كمك، "الماتىمەتروقۇرىلىس" اق لاۋازىمدى تۇلعالارىنا جانە باسقا دا تۇلعالارعا قاتىستى 5 ملرد تەڭگەدەن استام سوماعا بيۋدجەت قاراجاتىن جىمقىرۋ جانە الماتى قالاسىنىڭ مەتروپوليتەنىن سالۋ كەزىندە جالعان شوت-فاكتۋرالار جازىپ بەرۋ دەرەكتەرى بويىنشا تەرگەۋ اياقتالدى. قىلمىستىق ىسماتەريالدارى سوتقا جولداندى"، - دەلىنگەن حابارلامادا.
پروكۋراتۋرانىڭ ۇيلەستىرۋ شارالارى بويىنشا، كەدەندىك بەكەتتەردە ("نۇر-جولى" بەكەتى، "قورعاس" شەكارا ماڭى ىنتىماقتاستىعى حالىقارالىق ورتالىعى) جۇكتەردىڭ وتكىزۋ قابىلەتى 4 ەسەگە ارتىپ، تاۋارلاردى جەتكىزۋ مەرزىمىن 2 ايدان 10 كۇنگە دەيىن قىسقارعان.
سونداي-اق، پروكۋراتۋرانىڭ تالابى بويىنشا جەرگىلىكتى اتقارۋشى ورگاندار الماتى، شىمكەنت، استانا جانە تۇركىستاننىڭ اۋەايماق ماڭىنداعى كەزدەيسوق قوقىستاردى جويعان.
قاداعالاۋشى ورگاننىڭ ۇيلەستىرۋى ناتيجەسىندە، ۇشاقتاردىڭ قۇستارمەن سوقتىعىسۋ جاعدايى اۋەجايلارعا جاقىن ماڭداردا ايتارلىقتاي جاقساردى. مۇنداي جاعدايلاردىڭ 60 پايىزعا تومەندەۋى تىركەلگەنى ايتىلدى.
پىكىر قالدىرۋ