مينيسترلەر سىرداريا وزەنىندەگى سۋ بەكەتتەرىن اۆتوماتتاندىرۋ مەن سۋدى ەسەپكە الۋدى سيفرلاندىرۋ جونىندە سويلەستى. بۇگىنگى تاڭدا قازاقستان مەن وزبەكستان زاماناۋي سۋدى ەسەپكە الۋ جۇيەسى ورناتىلاتىن 10 بەكەت تۋرالى كەلىسىمگە كەلدى. نۇرجان نۇرجىگىتوۆ حالىقارالىق قارجى ۇيىمدارىمەن جانە كومپانيالارمەن جوبانى بىرلەسىپ ىسكە اسىرۋ بويىنشا كەلىسسوز جۇرگىزىلىپ جاتقانىن اتاپ ءوتتى.

سونداي-اق، تاراپتار كەلەسى جىلعى سۋارۋ ماۋسىمىنا دەيىن نارىن-سىرداريا سۋ قويمالارى كاسكادىنىڭ جۇمىس ءتارتىبىن تالقىلادى.

ورتالىق ازيانىڭ مەملەكەتارالىق سۋ شارۋاشىلىعىن ۇيلەستىرۋ كوميسسياسىنىڭ الداعى وتىرىسىندا سۋ قويمالارى جۇمىسىنىڭ بولجامدى كەستەسى جاسالىپ، سۋ بەرۋ كولەمى بەكىتىلەتىن بولادى.

«حالىقارالىق ارالدى قۇتقارۋ قورىنىڭ وتىرىسىنا بەلسەندى قاتىسقان جانە ۇسىنىستارىمەن بولىسكەن وزبەكستاندىق ارىپتەستەرىمىزگە ۇلكەن راقمەت ايتامىن. ءبىر جىل ىشىندە ءبىز بىرلەسكەن جۇمىسىمىزدىڭ وڭ ناتيجە بەرەتىنىنە كوز جەتكىزدىك. سوندىقتان ەكىجاقتى تىعىز ىنتىماقتاستىقتى جالعاستىرۋعا نيەتتىمىز. كوپتەگەن ماسەلە بويىنشا ءبىز ورتاق كەلىسىمگە كەلدىك. بۇل بىزگە كۇن تارتىبىندەگى ماسەلەلەردىڭ كوپشىلىگىن ءوزارا ءتيىمدى نەگىزدە شەشۋگە مۇمكىندىك بەرەدى»، – دەدى سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆ.

شاۆكات حامرايەۆ وزبەكستان حاقق اياسىندا دا ءوزارا ءىس-قيمىلدى نىعايتۋعا نيەتتى ەكەنىن دە مالىمدەدى.

«وزبەكستان قازاقستاننىڭ حالىقارالىق ارالدى قۇتقارۋ قورىنا ءتوراعالىعىن تولىق قولدايدى. ءبىز وسى باعىتتاعى ءوزارا ءىس-قيمىلدى كۇشەيتىپ، بىرلەسكەن جوبالارمەن جۇمىس ىستەگىمىز كەلەدى. مىسالى، سىرداريا جانە امۋداريا وزەندەرى باسسەيندەرىنىڭ ەكوجۇيەسىن ساقتاۋ، جەرگىلىكتى تۇرعىنداردى ساپالى اۋىز سۋمەن قامتاماسىز ەتۋ، شاعىن جانە جەرگىلىكتى سۋ ايدىندارىن قالپىنا كەلتىرۋ جانە ت.ب. ءىس-شارالاردى ىسكە اسىرۋعا نيەتتىمىز، – دەدى وزبەكستان سۋ شارۋاشىلىعى ءمينيسترى شاۆكات حامرايەۆ.

بۇدان بولەك، تاراپتار سۋ رەسۋرستارىن ۇتىمدى پايدالانۋدىڭ وڭىرلىك ستراتەگياسىن ازىرلەۋ ماسەلەسىن تالقىلادى. كەلىسسوز قورىتىندىسى بويىنشا مينيسترلەر كەزدەسۋ حاتتاماسىنا قول قويدى.