سپورت نىساندارىندا كورسەتىلەتىن قىزمەتتەردىڭ باعاسى تۇرعىندارعا قولايلى بولۋى ءتيىس. بۇل تۋرالى ۇكىمەت وتىرىسىندا پرەمەر-مينيستر ولجاس بەكتەنوۆ ءمالىم ەتتى.

- ازيا ويىندارى – وڭىردەگى ەڭ ءىرى سپورتتىق شارالاردىڭ ءبىرى. سونىمەن قاتار بۇل – سپورتشىلارىمىزدىڭ وليمپياداعا دايىندىق دەڭگەيىن تەكسەرۋگە ارنالعان جاقسى مۇمكىندىك. بايراقتى باسەكەنى نەبارى ءبىر جىلدان كەيىن ميلاندا وتەتىن قىسقى وليمپيادا قارساڭىنداعى ەڭ باستى جارىس الاڭى دەۋگە بولادى. سوندىقتان ازيا ويىندارىندا جاقسى ناتيجە كورسەتىپ قانا قويماي، الداعى وليمپياداعا دا ساپالى دايىندىق جۇرگىزۋ قاجەت. ەلىمىزدىڭ كليماتتىق جاعدايى قىسقى سپورت تۇرلەرىن دامىتۋعا قولايلى. قاجەتتى ينفراقۇرىلىم دا بار. قازاقستاندا قىسقى ازيا ويىندارى، كۋبوك كەزەڭدەرى مەن الەم چەمپيوناتتارى سياقتى حالىقارالىق جارىستار ءساتتى وتكىزىلدى. مۇنىڭ بارلىعى حالىقتىڭ قىسقى سپورت تۇرلەرىمەن اينالىسۋعا دەگەن قىزىعۋشىلىعىن ارتتىرا تۇسەدى. سپورتتىق تۋريزمگە تىڭ سەرپىن بەرەدى، - دەدى و.بەكتەنوۆ.

ونىڭ ايتۋىنشا، ەلىمىزدەگى شاڭعى تراسسالارى تۋريستەرگە تولى. بۇل رەتتە سپورتتىق ينفراقۇرىلىم نىساندارىن دارىپتەۋ جۇمىسىن جانداندىرا ءتۇسۋ قاجەت.

- مىسالى، بىلتىر شىمبۇلاق بوكتەرىنە كەلگەن شاڭعىشىلاردىڭ سانى 1،5 ميلليوننان اسىپ كەتتى. شاڭعى تەۋىپ، تازا اۋامەن تىنىستاپ قايتۋشىلاردىڭ قاتارى ونىڭ تاۋلىكتىك قۋاتىنان الدەقايدا كوپ بولىپ وتىر. سوندىقتان كۋرورتتى ودان ءارى دامىتىپ، الماتىمەن قاتار الماتى وبلىسىندا، شىعىس قازاقستان وڭىرىندە جانە باسقا دا ايماقتاردا جاڭادان تاۋ شاڭعىسى تراسسالارىن جاساۋ قاجەت. تۋريزم جانە سپورت مينيسترلىگى مەن اكىمدىكتەر ينۆەستورلاردى تارتىپ، سپورت ينفراقۇرىلىمىن سالۋ ءۇشىن قولايلى جاعدايلار جاساۋى كەرەك. سونىمەن بىرگە، بارلىق سپورت وبەكتىلەرى قالىڭ كوپشىلىككە قولجەتىمدى بولىپ قالۋعا ءتيىس. بۇل سپورتپەن شۇعىلدانۋشىلار سانىن ۇلعايتىپ، وسى وبەكتىلەردىڭ اينالاسىندا بيزنەستىڭ دامۋىنا جول اشادى. اكىمدىكتەر مەن كاسىپكەرلەر اتالعان باعىتتا بەلسەندى جۇمىس ىستەۋى كەرەك، - دەدى ۇكىمەت باسشىسى.

ونىڭ پايىمىنشا، كورسەتىلەتىن قىزمەتتەردىڭ باعاسى دا كەلۋشىلەر ءۇشىن قولجەتىمدى بولۋعا ءتيىس. تەك سوندا عانا حالىقتى كوپتەپ تارتۋعا مۇمكىندىك تۋادى. ول بيزنەس پەن سپورت-تۋريستىك وبەكتىلەردىڭ اينالاسىنداعى ەلدى مەكەندەرگە مۋلتيپليكاتيۆتى اسەر بەرەدى.

بۇدان بۇرىن حابارلانعانداي، بۇگىن ۇكىمەت وتىرىسىندا ق ر تۋريزم جانە سپورت ءمينيسترى ەربول مىرزابوسىنوۆ ەلىمىزدە قىسقى سپورت تۇرلەرىنىڭ دامۋىنا قاتىستى تۇسىنىك بەردى.