تۋىستارى مەن ارىپتەستەرى الماتىداعى جانجال كەزىندە قازا تاپقان پوليسەي تۋرالى ايتىپ بەردى.

پوليسەي نۇرسۇلتان نەسىپبايەۆ الماتىداعى تۇنگى نىسانداردىڭ بىرىندە ايەلگە اراشا تۇسكەن. ايەلدىڭ جانىنداعى ەر ادام ونى موينىنان ۇستاپ، تۇنشىقتىرا باستاعان. توبەلەس بارىسىندا نۇرسۇلتان نەسىپبايەۆ ىشىنەن جانە جۇرەك تۇسىنان پىشاق جاراقاتىن العان. 31 جاستاعى پوليسيا قىزمەتكەرىنىڭ ارتىندا ايەلى مەن ءتورت بالاسى قالعان: ەكى قىزى جانە ەكى ۇلى. كەشە تۋىستارى نۇرسۇلتانمەن قوشتاستى. ول تۋعان جەرى بايقوڭىردا جەرلەندى.

"جولداسىم بالالارىمىزعا قامقور اكە، ماعان ادال جار بولدى. ول وتباسىمىز ءۇشىن ءبارىن جاسادى. ول ءوز جۇمىسىن جان-تانىمەن سۇيەتىن جانە وعان بەرىلگەن جان ەدى. ءبىز ۇلكەن جوسپارلار قۇرىپ ەدىك. ءبىراق تاعدىرى باسقاشا بولدى،" – دەپ ءبولىستى مارقۇمنىڭ جۇبايى باقىت جەتىگەن.

"ۇلىم ادال بولدى، ءوز قىزمەتىن ابىرويمەن اتقاردى. ول ءارقاشان كومەككە دايىن تۇراتىن. ءوز جۇمىسىن جانە وتباسىن قاتتى جاقسى كورەتىن. بالالارى اكەسىز قالدى. ول ايەلدى قورعاعىسى كەلىپ ەدى، وسىنداي جاعداي بولدى،" – دەپ قوستى مارقۇمنىڭ اناسى.

قايتىس بولعان قۇقىق قورعاۋشى بايقوڭىردا تۋىپ-وسكەن. ول زاڭ فاكۋلتەتىن ءبىتىرىپ، قۇقىق قورعاۋ ورگاندارىندا 10 جىل جۇمىس ىستەگەن. الماتى مەدەۋ اۋدانى پوليسيا باسقارماسىندا جەدەل ۋاكىل قىزمەتىن اتقارعان.

"ول مەنىڭ جەتەكشىم بولعان: جەدەل قىزمەتتىڭ قىر-سىرىن ۇيرەتتى. ءبىز بىرگە كوپتەگەن قىلمىستى اشتىق. نۇرسۇلتان ءوز وتانىنىڭ ناعىز پاتريوتى بولدى. ءوز جۇمىسىنىڭ جانكۇيەرى ەدى. ادىلدىك ءۇشىن ءاردايىم كۇرەسەتىن. ءبىز ءۇشىن بۇل – ۇلكەن قايعى. تۋىستارىنا كوڭىل ايتامىن،" – دەدى مەدەۋ اۋدانى پب-نىڭ اعا جەدەل ۋاكىلى رۇستەم عالىموۆ.

قىلمىسكەر تۋرالى مالىمەت از. ول 41 جاستاعى وزبەكستان ازاماتى. ەر ادام قىلمىس بولعان جەردە ۇستالدى. ءقازىر ول ۋاقىتشا ۇستاۋ يزولياتورىندا.