قاڭتار وقيعاسى كەزىندە وققا ۇشقان ارحەولوگ ەرلان جاعىپاروۆتىڭ ولىمىنە كىنالى پودپولكوۆنيك 7 جىلعا باس بوستاندىعىنان ايىرىلدى.
7 اقپاندا ۇلتتىق ۇلاننىڭ 5571 اسكەري ءبولىمىنىڭ پودپولكوۆنيگى ايتجان اۋباكىروۆكە الماتىنىڭ اسكەري سوتى ۇكىم شىعاردى.
سوت مالىمەتىنشە، اۋباكىروۆ 2022 جىلى 6 قاڭتاردا الماتى قالاسىندا ەرلان جاعىپاروۆ پەن اۋەز قاپسالانوۆقا وق اتقان. سوت بارىسىندا مەديسينالىق ساراپتاما ناتيجەلەرى ايتىلدى. 30-دان استام كۋاگەر سۇرالدى.
اتالعان ءىس بويىنشا العاشقى سوت وتىرىسى 2024 جىلى 19 جەلتوقساندا باستالدى. الايدا بىرنەشە سوت پروسەسىنەن كەيىن سوت جابىق رەجيمدە ءوتتى. جۋرناليستەر سوت زالىنا كىرگىزىلمەدى. سوت مۇنى ۇلتتىق قاۋىپسىزدىك پەن مەملەكەتتىك قۇپيالارعا قاتىستى اقپاراتتىڭ بارلىعىمەن ءتۇسىندىردى.
الماتى گورنيزونى اسكەري سوتى ايتجان اۋباكىروۆتى قىلمىستىق كودەكستىڭ 451-بابى (بيلىگىن اسىرا پايدالانۋ) بويىنشا كىنالى دەپ تاپتى. وسىلايشا ول 7 جىلعا باس بوستاندىعىنان ايىرىلدى. سونداي-اق ارحەولوگتىڭ وتباسىنا 20 ميلليون تەڭگە، ەكىنشى جابىرلەنۋشى قاپسالانوۆتىڭ وتباسىنا مورالدىق شىعىن وتەيدى.
ايتا كەتەيىك، قاڭتار وقيعاسى كەزىندە 49 جاستاعى الماتىلىق ازاماتتىڭ دەنەسى تابىلعان. كەيىننەن ونىڭ ارحەولوگ ەرلان جاعىپاروۆ ەكەنى بەلگىلى بولدى. جاعىپاروۆتىڭ تۋىستارى ونىڭ 6 قاڭتاردا جوعالىپ كەتكەنىن مالىمدەگەن. 12 قاڭتار كۇنى ونىڭ قايتىس بولعانىن بىلگەن. ول قولىنا كىسەن سالىنعان، اياۋسىز سوققىعا جىعىلعان، جۇرەك تۇسىنان وق اتىلعان كۇيدە تابىلعان.
پىكىر قالدىرۋ