گەرمانيانىڭ بادەن-بادەن قالاسى ماڭىنداعى قۇنى 71 ملن دوللار تۇراتىن Schloss Seelach – زەەلاح سارايى تيمۋر قۇلىبايەۆقا تيەسىلى بولىپ شىقتى.

بۇل تۋرالى Deutsche Welle مالىمدەدى. ICIJ جانە Paper Trail Media باسىلىمدارى جۇرگىزگەن زەرتتەۋگە سايكەس، تيمۋر قۇلىبايەۆ – ءحىح عاسىردا نيكولاي جانە الەكساندر ءىى پاتشالار جازدا دەمالىسىن وتكىزگەن سارايدىڭ قوجايىنى دەپ وتىر. ال تالايعا ارمان بولعان ءزاۋلىم سارايدى ناعىز مۋلتيميلليونەر، ورىس ەلشىسى، پاتشا اۋلەتىنە جاقىن بولعان قۇپيا كەڭەسشى ميحايل حرەپتوۆيچ سالعان. سارايعا زەەلاح دەگەن اتاۋ بەرىلگەن. اقسۇيەكتەر اۋلەتى تۇرعىزعان الىپ سارايدى قۇلىبايەۆتار 2014 جىلى 19،3 ملن دوللارعا ساتىپ العان. 

مۇنداي تۇجىرىمدى جاساۋعا كورپوراتيۆتىك جانە جەر قۇجاتتارىنىڭ جازباسى نەگىز بولىپ وتىر. ونىڭ ۇستىنە، عيمارات قۇلىبايەۆتىڭ ءىرى بيزنەستەرىنىڭ ءبىرى بولىپ سانالاتىن Kipros LLP قازاقستاندىق كومپانياسى Verus Praedium International LLP-عا تيەسىلى نەمىستىڭ Schloss Seelach Invest GmbH ارقىلى ساتىلعان.

جاڭا قوجايىندار تاريحي ۆيللانى قايتا جاڭارتىپ، ساراي اۋماعىنا سۋبۇرقاق بار ساياباق سالدىرىپ، ونىڭ استىنا اۋماعى مىڭ شارشى مەتر بولاتىن سالتاناتتى سپا-ايماق جاساتقان. 25 مەترلىك باسسەيننىڭ ۇستىندەگى شىنى كۇمبەز ءتىپتى، عارىشتاعى سۋرەتتەن دە كورىنەدى.

ەليتالىق عيماراتتىڭ قۇرىلىسىنا قوجايىنداردىڭ قاراجاتتارىن دا اياماعانى ايتىلدى.

ولار اقشالارىن اياعان جوق. قۇرىلىسشىلار جۇمىستىڭ ءار ساتىنە ەسەپ بەرىپ، فوتوسۋرەت جىبەرىپ وتىردى. ءبىر كۇنى تاپسىرىس بەرۋشىلەرگە فرەسكالار (عيمارات قابىرعاسىنداعى سۋرەت – رەد.) ۇناماي قالىپ، سۋرەتشىگە 150 مىڭ ەۋرو اقى تولەنىپ قويعان جۇمىستى قايتا جاساتۋعا تۋرا كەلدى، - دەپ جازدى DW.

نەمىس باق-تارى زەەلاح سارايىنان باسقا، اۋلەتتىڭ يەلىگىندە اتالعان وڭىردە بىرنەشە جىلجىمايتىن مۇلىكتىڭ بارىن انىقتاعان. ولارعا جالپى سوماسى 100 ملن ەۋرودان استام قاراجات سالىنعانى ايتىلدى.