بەسىنشى قىركۇيەك كۇنى قازاقستاندا تىلدەر مەرەكەسى تويلانادى. بۇل ايتۋلى داتا - ۇلتتىڭ رۋحاني كوسەمى احمەت بايتۇرسىن ۇلىنىڭ تۋعان كۇنىنە ورايلاستىرىلعان.

1928-1929 جىلدارى ۇلى احاڭ تاريحى تەرەڭدە جاتقان اباي ۋنيۆەرسيتەتىندە ءدارىس بەرىپ، شاكىرت تاربيەلەگەن. ونى قازاق ۇلتتىق پەداگوگيكالىق ۋنيۆەرسيتەتىنىڭ ۇجىمى ءارقاشان ماقتان تۇتادى. اراعا ءجۇز جىلعا جۋىق ۋاقىت سالىپ، ۇلت ۇستازىنىڭ تۋعان كۇنى قارساڭىندا ءبىرتۋار پەرزەنتىمىز ءدارىس وقىعان كابينەت قايتا جاڭعىرتىلىپ، قاسيەتتى قارا شاڭىراقتا «احمەت بايتۇرسىن ۇلى اتىنداعى ءدارىسحاناعا» اينالدى.

ءدارىسحانانىڭ اشىلۋىمەن قاتار ۇلت ۇستازىنىڭ ەڭبەكتەرىن دارىپتەۋ ماقساتىندا كەشە عانا ۋنيۆەرسيتەت قابىرعاسىندا «احمەت بايتۇرسىن ۇلى وقۋلىقتارىنىڭ بيبليوگرافياسى مەن تەكستولوگياسى» اتتى عىلىمي-تاجىريبەلىك كونفەرەنسيا ءوتتى. وندا احمەت بايتۇرسىن ۇلىنىڭ «وقۋ قۇرالى» مەن «ءتىل جۇمسار» باسىلىمدارىنىڭ گرافيكالىق پروەكسيالارى زاماناۋي ادىسپەن قايتا ۇسىنىلىپ، جاڭا فورماتتاعى ەكى كىتاپتىڭ تۇساۋى كەسىلدى.

احمەت بايتۇرسىن ۇلى - قازاق جازۋىنىڭ رەفورماتورى، العاشقى ءالىپبيدىڭ اۆتورى، قازاق ءتىلىن عىلىمعا اينالدىرعان تۇلعا. ول ءتىل ۇيرەتۋ سالاسىندا «وقۋ قۇرالى»، «ءتىل - قۇرال» ەڭبەكتەرىمەن عانا شەكتەلمەي، قولدانبالى گرامماتيكانى دا جاساپ شىققان. 1928 جىلى جارىق كورگەن «ءتىل جۇمسار» اتتى ەكى ءبولىمدى ەڭبەگى - قازاق ءتىل بىلىمىندەگى ىرگەلى زەرتتەۋلەردىڭ ءبىرى. ول سونىمەن قاتار «قازاق» گازەتىنىڭ ۇيىمداستىرۋشىسى رەتىندە دە قازاق ءباسپاسوزىنىڭ نەگىزىن قالاۋشىلاردىڭ ءبىرى سانالادى.

اباي اتىنداعى قازۇپۋ-دىڭ وقىتۋشى-پروفەسسورلار قۇرامى ءۇشىن قازاق ءتىل ءبىلىمىنىڭ نەگىزىن قالاۋشى، ادەبيەتتانۋشى، اعارتۋشى رەتىندە ۇلتتىق عىلىمنىڭ دامۋىنا ولشەۋسىز ۇلەس قوسقان احمەت بايتۇرسىن ۇلىنىڭ ورنى ەرەكشە. ونىڭ ەڭبەكتەرى ءتىل عىلىمى عانا ەمەس، بۇكىل قازاق رۋحانياتى ءۇشىن باعا جەتپەس قازىنا بولىپ قالا بەرەدى.

اباي ۋنيۆەرسيتەتى احاڭنان قالعان ۇلى جول - قازاق ءتىلىنىڭ مارتەبەسىن ارتتىرۋ باعىتىندا دا ىرگەلى جۇمىستاردى جۇزەگە اسىرىپ وتىر. قازىردە ۋنيۆەرسيتەتتىڭ باسقارما توراعاسى-رەكتور بولات تىلەپ حالىقارالىق «قازاق ءتىلى» قوعامى الماتى قالالىق فيليالىنىڭ ءتوراعاسى، ۋنيۆەرسيتەت اپپارات جەتەكشىسى جاناتبەك ىشپەكبايەۆ ءتوراعا ورىنباسارى قىزمەتتەرىن اتقارىپ كەلەدى.

ۇلت ۇستازىنىڭ تۋعان كۇنى - تەك مەرەكە ەمەس، ۇلتتىق رۋحتىڭ جاڭعىرۋى، ۇرپاققا ىزگى مۇرانىڭ جەتكىزىلۋ كۇنى. قازىرگى تاڭدا ۋنيۆەرسيتەتىمىزدە احمەت بايتۇرسىن ۇلىنىڭ ەڭبەكتەرىن زەرتتەپ جۇرگەن جاس عالىمدار مەن ولارعا جول كورسەتىپ جۇرگەن تاجىريبەلى زەرتتەۋشى ۇستازداردىڭ كوپ ەكەنى قۋانتادى.