Үндістанда билік Нипах вирусының таралуын шұғыл түрде тежеу шараларын күшейтті. Ресми мәліметтерге сәйкес, расталған жағдайлар саны бес адамға жеткен. Ауру жұқтырғандардың арасында дәрігерлер мен мейірбикелердің болуы мамандардың алаңдаушылығын күшейтіп отыр. Бұл туралы The Independent басылымы хабарлады.

Медицина қызметкерлерінің індетке шалдығуы аурудың ауруханаішілік таралу қаупін арттырады. Сарапшылардың пікірінше, бұл вирус тығыз байланыс кезінде оңай жұғуы мүмкін екенін көрсетеді. Әсіресе медициналық мекемелерде бақылау шараларын қатаңдату қажеттігі туындап отыр.

Нипах вирусы (Nipah virus, NiV) – жоғары қауіпті зооноздық инфекция. Ол алғаш рет 1999 жылы Малайзияда тіркелген. Вирус адамға жануарлардан, сондай-ақ адамдар арасында тікелей байланыс арқылы, оның ішінде медициналық көмек көрсету барысында да берілуі мүмкін.

Дүниежүзілік денсаулық сақтау ұйымының мәліметінше, Нипах вирусы арнайы емі мен вакцинасы жоқ аса қауіпті патогендердің қатарына жатады және жаһандық денсаулық сақтау жүйесіне елеулі қауіп төндіреді.