Búgin Úkimet 2016 jylǵa arnalǵan áleýmettik-ekonomıkalyq damý boljamdaryn qaıta qarady, - dep habarlaıdy «Qamshy» portaly.

Onda álemdik naryqtaǵy jaǵdaı, munaı baǵasynyń kóterilmeýi syndy birneshe sebepterge baılanysty Úkimettiń biraz josparlaryna ózgerister engizý jaıy qarastyrylyp, aǵymdaǵy jylǵa arnalǵan jańa boljam bekitildi.

Ulttyq ekonomıka mınıstri Erbolat Dosaev bıylǵy jyly josparlanyp otyrǵan ishki jalpy ónim kóleminiń 0,5 paıyzǵa kemıtinin aıtty.

«Biz 2016 jylǵa arnalǵan áleýmettik-ekonomıkalyq damýdyń jańa  boljamdaryn bekittik. Soǵan saı, munaıdyń baǵasy barreline 40 dollar kezinde İJÓ ósimi 2,1 paıyz dep josparlansa, munaı baǵasynyń 30 dollarlyq senarıine qarap otyryp, ol 0,5 paıyz bolady dep oılaımyz. Soǵan qaramastan bizdiń jaǵdaıymyz jaman bolmaıdy», - dedi Úkimet jıynynan soń jýrnalıserge suhbat bergen E. Dosaev.

Mınıstr sondaı-aq, Ulttyq bank boljamdary boıynga ınflásıa deńgeıi de burynǵysha saqtalatynyn aıtady.

«Bul shamamen 6-8 paıyz aınalasynda bolady. Ónerkásip salasynda, árıne, taý-ken ónerkásibinde óndiris kóleminiń shamamen 5 paıyzǵa tómendeýi bolady. Óńdeýshi ónerkásipte de shamamen 1,4 paıyz, aýyl sharýashylyǵynda 3,5 paıyz óndiris kóleminiń qysqarýy baıqalatyn bolady. Osy aıtylǵandar jańa josparlarǵa ózek boldy. Endi 2016 jylǵa arnalǵan respýblıkalyq búdjetke engiziledi», - deıdi ulttyq ekonomıka mınıstri.

Úkimet aǵymdaǵy jyldyń búdjetine dollar baǵamynyń da boljamyn ózgertip otyr. Soǵan saı, byltyr qarasha aıynda búdjetke 300 teńge bolady delingen dollar baǵamy 360 teńgege ózgertildi. Sondaı-aq, barreline 40 dollar bolady dep josparlanǵan munaı baǵasy da 30 dollarǵa tómendetildi.