Qazaqstandyq programmıst jigit Álibek Datbaevty álemdik Booking.com. kompanıasy óziniń bas keńsesine jumysqa shaqyryp otyr, - dep habarlaıdy «Qamshy» portaly Tengrinews.kz-ke silteme jasap.

Álibek qonaqúılerdi brondaý boıynsha álemdegi eń iri saıt sanalatyn Booking.com-ǵa jumysqa ornalasý múmkindigine qalaı ıe bolǵany týraly aıtyp berdi. Aıtýynsha, Álibek jumysqa turar aldynda úsh ret suhbattasý kezeńinen ótken.

Al, jalpy bul kompanıaǵa qazaq-túrik lıseıiniń túlegi 2015 jyldyń qarashasynda tehnıkalyq qyzmetkerler úshin uıymdastyrylǵan ǵalamdyq jarysqa qatysqan kezde tap bolǵan.

«Hackerrank.com degen alań bar. Booking.com sol jerde baıqaý uıymdastyrdy. Qatysýshylarǵa qıyndyq deńgeıi ár túrli tapsyrmalardy sheshýge belgili bir ýaqyt berildi. Oǵan álemniń ár elinen 500 shaqty úmitker qatysty. Men de solarmen birge berilgen tapsyrmalardy sátti oryndadym. Úsh kúnnen keıin maǵan Booking.com kompanıasyna jumysqa ornalasý úshin Skype arqyly áńgimelesýge shaqyrǵan hat keldi. Maǵan tórt bólikten turatyn úı tapsyrmasyn jáne ony sheshýshe 75 mınýt berdi. Ol tapsyrmany oıdaǵydaı oryndaǵan soń, meni Amsterdamdaǵy Booking.com-nyń keńsesinde ótetin bes saǵattyq qorytyndy áńgimelesýge shaqyrdy», - deıdi Álibek Datbaev.

Tórt kúnge barǵan Álibektiń jol júrý, jatyn orny men tamaǵynyń shyǵynyn kompanıa kótergen. Qorytyndy áńgimelesýden de sátti ótken baǵdarlamashy jigitke kompanıa jumys usynǵan. Alǵashqy aıdaǵy páteraqysyn da Booking.com esebinen tólegen. Buǵan deıin Álibek ınternet jobalarmen kóp áýre-sarsańǵa túskenin aıtady. Qazir kompanıadan kelinshegine de jumys qarastyryp jatqan kórinedi.

«Meni Amsterdam tań qaldyrdy. Munda birinshi bolýym. Keńseleri keremet jáne munda jumys kestesine qadalyp otyrǵan eshkim joq. Saǵan tapsyrma qoıady, sol tapsyrmany berilgen ýaqytta oryndaýyń kerek. Bul kompanıada álemniń ár túkprinen 800 baǵdarlamashy jumys isteıdi. Birneshe qazaqstandyq ta bar eken», - deıdi Álibek Datbaev.