Ádebıet – adam óneriniń ishindegi eń uzaq jasaıtyndarynyń biri!

Ǵabıden Mustafın

Almaty qalasy OKJ-niń 4-kitaphanasynda qalyń oqyrmanǵa esimi belgili kórnekti qalamger, jýrnalıs, synshy, ádebıettanýshy ǵalym Nurdáýlet Aqyshtyń ónegeli ómir belesteri men shyǵarmashylyǵyna arnalǵan «Taý tulǵaly qalamger, kórnekti ǵalym» atty shyǵarmashylyq benefıs keshi ótti, - dep habarlaıdy «Qamshy» portaly.

Nurdáýlet Babıhanuly – ádebıettiń birneshe janrynda kósile qalam terbep júrgen segiz qyrly, bir syrly qalamger. Nurdáýlet Aqysh óz shyǵarmalarynda týǵan jer, tabıǵat, balalyq shaq, pák mahabbat, bıik adamgershilik, azamattyq paryz, adamı qundylyqtar, qazaq halqynyń darhandyǵy, óz zamandastarynyń jan dúnıesi, ómir shyndyǵy týraly azamattyq oı tolǵaıdy. Al, ádebı zertteý, syn kitaptarynda ádebıettiń eń ózekti máselelerin qozǵap, óz túıgenin tereń oımen, zerdeli sózben, sheshen tilmen oqyrmanǵa jetkizetin talǵampaz da taldampaz ádebıetshi ǵalym.

«Úndemeıtin ul», «Kúrmeýi qatty túıinder», «Synyq dombyranyń sazy», «Tórge shyqqan kim?», «Burynǵy bastyqtyń áıeli», «Jataqhana qyzdary», «Uly ǵashyqtar urpaǵy», «Tań aldyndaǵy dabyl», «Beıýaqta janǵan ot», «Jumbaq izder» sıaqty kórkem oımen órnektelgen shyǵarmalarynyń qaı-qaısysy bolsa da, talǵampaz oqyrmannyń súıip oqıtyn shyǵarmalarynyń qataryna endi. Jazýshynyń osy shyǵarmalary jóninde Ábish Kekilbaev: «Ómir tanytqysh parasaty, kisi tanytqysh pátýasy, jiger qaıraıtyn rýhanı ýyty mol kitaptar jazdyń» degen bolatyn.

Ekrannan arnaıy daıyndalǵan «Sańlaq sýretker» atty slaıd-prezentasıa, qalamgerdiń ómir belesteri men shyǵarmashylyq sheberhanasy týraly «Taý tulǵaly qalamger, kórnekti ǵalym» atty vırtýaldy kitap prezentasıasy kórsetilip, mýzykalyq áýenmen kórkemdelgen ádebı sholý tyńdaldy. Oqý zalynyń tórine «Kórkemsózdiń kórnekti sheberi» atty kitap jaımasy uıymdastyrylyp, oǵan qarymdy qalamgerdiń shyǵarmalary, ǵylymı ujymdyq zertteý eńbekteri, merzimdi basylymdarda jaryq kórgen maqalalary qoıyldy.

Shyǵarmashylyq benefıstiń basty keıipkeri: jazýshy, synshy, fılologıa ǵylymdarynyń doktory, Qazaqstan Jazýshylar Odaǵynyń, Qazaqstan Jýrnalıser Odaǵynyń múshesi, Halyqaralyq «Jambyl» syılyǵynyń laýreaty, M.Áýezov atyndaǵy Ádebıet jáne óner ınstıtýtynyń Táýelsizdik dáýiri ádebıeti bóliminiń meńgerýshisi – Nurdáýlet Bábıhanuly Aqysh bolsa, al benefıs qonaqtarynyń qatarynda M.Áýezov atyndaǵy Ádebıet pen óner ınstıtýtynyń ǵylymı qyzmetkerleri, fılologıa ǵylymdarynyń kandıdaty, ál-Farabı atyndaǵy QazUÝ-niń dosenti – Joldasbek Mámbetov, jazýshy, aýdarmashy, Qazaqstan Jazýshylar Odaǵynyń múshesi – Nurlan Qamı boldy. Almaty Ýnıversıteti, Qazaq Memlekettik Qyzdar pedagogıkalyq ýnıversıteti, Almaty Polıgrafıalyq kolejiniń stýdentteri men kitaphananyń turaqty oqyrmandary qatysty.

Benefıstiń «Qalamger kelbeti» kezeńinde Nurdáýlet Bábıhanulynyń ǵıbratty ómir joly men shabytty shyǵarmashylyǵy jaıly jazýshynyń ózi jáne áriptesteri syr shertti. «Oqyrman kútken áserli sát» kezeńinde oqyrmandar qalamgerlerge ár túrli ádebı taqyryptar aıasynda suraqtar qoıyp, pikir almassa, al «Oqyrman oljasy» atty kezeńde qalamgerdiń shyǵarmashylyǵy men «Alasa taýlar aıasynda» jańa týyndysy týraly oqyrmandar ózderiniń aq tilek, pikir-lebizderin bildirdi.

Uly danyshpan Abaı: «Kitap – jazýshynyń júreginen oqyrmannyń júregine jiberilgen aınymas dos» dep kórkem týyndylardyń bizdiń ómirimizdegi ornyn aıryqsha atap kórsetken edi. Balalyq dáýren – ár adamnyń qımas shaǵy, qaıta kelmes kóktemindeı. Jazýshynyń «Alasa taýlar aıasynda» atty jańa týyndysy – oqyrman qaýymdy sol qıada qalǵan balalyq shaǵy men jalyndaǵan jastyq dáýrenimen tabystyryp, ótken kúnderdi eriksiz eske túsiredi. Shyǵarmany oqı otyryp, ushqany bilinbeıtin ushqyr zamannyń zymyrap bara jatqanyn amalsyz moıyndaımyz. Atalmysh roman talǵamy bıik, zerdeli oqyrmandardy túrli sezimge bólep, erekshe áser qaldyrý ústinde.

Kitaphananyń daryndy oqyrmandary osyndaı tálimdik, tárbıelik mańyzy zor mádenı shara uıymdastyryp, súıikti jazýshylarymen tabystyrǵan kitaphana ujymyna alǵystaryn bildirdi. Qalamgerge ózderin qyzyqtyrǵan suraqtaryn qoıyp, talǵampaz oqyrmannyń júregine jol tapqan jańa shyǵarma jaıly oılaryn bildirdi. Súıikti jazýshylaryna atalmysh shyǵarmanyń jalǵasyn asyǵa kútetindikterin, keleshekte «Alasa taýlar aıasynda» týyndysy úlken ǵumyrnamalyq romanǵa ulassyn dep óz usynys-tilekterin bildirip jatty.

Kitaphananyń daryndy oqyrmandary Almaty Polıgrafıalyq kolejiniń stýdentteri: İlıas Aıdyn, Arǵymbekov Baqtıar jáne kitaphana qyzmetkerleri Jıdebaeva Aıaýlym men Hametova Aıgerim «Alasa taýlar aıasynda» týyndysynan úzindiler oqydy. Án besiginde terbelip ósken daryndy ónerpazdar: P.Chaıkovskıı atyndaǵy mýzykalyq kolejdiń stýdentteri Ádil Dosmuhamed, Qabyl Arnat, Toıshybaev Maǵjan jáne Almaty Polıgrafıalyq kolejiniń stýdenti Turanov Bekarys án men kúıden shashý shashyp, kópshilik qaýymǵa kóktemgi kúnniń shýaǵyndaı jaqsy lep syılady.

Elbasymyz Nursultan Ábishuly: «Adam máńgi jasamaıdy, máńgi jasaıtyn onyń isi»  degen edi. Árıne, máńgilik qalatyn nárse – bizdiń júrip ótken jolymyzda qaldyrǵan ónegeli izderimiz. Búgingi qazaq ádebıetindegi talǵamy bıik, tanymy tereń qalamger, salıqaly synshy Nurdáýlet aǵamyzdyń ádebıetimizdiń altyn qoryna qosylar jańa týyndylaryn oqyrman qaýym asyǵa kútetin bolady.