Ranking.kz sarapshylarynyń habarlaýynsha bıyl elimizdiń eńbek naryǵyndaǵy ahýal birshama shıelenise túsken. Ekonomıkalyq ósim kórsetkishteriniń tómendeýi jumys oryndary men eńbekaqy mólsherin qysqartýǵa alyp kelýde. Statısıkalyq málimetter ázirge jumyssyzdyqtyń óskenin kórsetpese de, sońǵy segiz aıdaǵy jumyspen qamtý kórsetkishi rekordtyq deńgeıge deıin quldyraǵan.

Ótken jyldyń tórtinshi toqsanynda elimizdegi jumyspen qamtylǵandardyń naqty sany 3 mıllıon 629 myń adamdy quraǵan. Bul sandardyń 2014 jylǵy mejeden bar bolǵany 0,3 paıyzǵa nemese 10,4 myń adamǵa ǵana artyq ekenin eskergen jón. Iaǵnı, jumyspen qamtý kórsetkishteriniń artýy jyldan jylǵa kemip keledi.

Daǵdarystyń taǵy bir belgisi retinde ortasha jalaqy kóleminiń de kemýin aıtýǵa bolady. Ótken jyldyń sońǵy toqsanynda bul kórsetkish 136100 teńgeni quraǵan. Al, 2015 jylǵy ınflásıa kólemi 13,6 paıyzǵa jetken.

Budan bólek, statısıkalyq málimetter óńirlerge qatysty da birqatar problemalardyń qulaǵyn qyltıtyp otyr. Atap aıtqanda, óndiristi óńirlerde ótken jyldyń sońynan beri jaldanbaly jumysshylardyń qysqarýy baıqalady. Mysaly, Qostanaı oblysynda 3 paıyz, Qaraǵandy oblysynda 2,4 paıyz, Soltústik Qazaqstan men Aqmola oblystarynda 2 paıyz, Shyǵys Qazaqstanda 1,9 paıyz shtattyq qysqartýlar oryn alǵan.

Esesine, ońtústik óńirlerde agrarlyq mamandarǵa suranys artqan. OQO-da bul kórsetkish 4,3, Almaty oblysynda 3,6, Qyzylorda oblysynda 1,8 paıyzǵa artqan.

Astana men Almatynyń eńbek naryǵyndaǵy ahýal da qaıshylyqqa toly bolyp otyr. Máselen Astanada jańa jumys oryndarynyń sany 5,2 paıyzǵa (13,6 myń orynǵa) ósti delinse, Almatyda kerisinshe bul kórsetkish 4 myń adamǵa nemese 0,1 paıyzǵa kemigen.

Sarapshylar taý-ken ónerkásibi salasynda jumysshylardyń 4,6 paıyzy qysqartýǵa ushyraǵanyn aıtady.

Osy jerde elimizdiń birde bir oblysynda eńbekaqynyń ósýi ınflásıanyń resmı kórsetkishine jetpegenin aıta ketý qajet. BQO-da eńbekaqy 11,5 paıyzǵa, Astanada 8,4 paıyzǵa, Pavlodarda jáne 6,8 paıyzǵa, Atyraý oblysynda 6,7 paıyzǵa jalaqy óskenimen, bul ósim ınflásıa deńgeıinen tómen bolyp otyr.

Al, eki oblysta (Mańǵystaýda 2 paıyzǵa, Aqtóbe oblysynda 1,1 paıyzǵa) eńbekaqy qysqarǵan. Alaıda, Mańǵystaý oblysyndaǵy ortasha jalaqy respýblıka boıynsha joǵarǵy kórsetkishke ıe bolyp otyr.

Osylaısha bir-birine kereǵar statısıkalyq derekterdiń ózi eldiń áleýmettik ahýalynyń ońalý ornyna, keri ketkenin jasyra almaı otyr.

Ázirlegen: Jomart Abdollauly

Muhamedıuly múzıkl janryna den qoımaq

Mádenıet jáne sport mınıstri aldaǵy ýaqytta múzıkl janryn jandandyrýdy qolǵa alatyn bolady, - dep habarlaıdy «Qamshy» portaly QazAqparatqa silteme jasap.

Bul týraly búgin Parlament Senatyndaǵy kezdesý barysynda QR Mádenıet jáne sport mınıstri Arystanbek Muhamedıuly málimdegen.

Sóz arasynda mınıstr aǵymdaǵy jyldan bastap «Ortalyq konsert zaly» vedomstvonyń qaramaǵyna ótkenin alǵa tartyp, aldaǵy ýaqytta «Qazaqkonsert» brendin  Astanaǵa kóshirý týraly sheshim qabyldanǵanyn jetkizdi.

«Bizdiń aldaǵy ýaqytta atqaratyn basty maqsatymyzdyń biri - janrlardy ashý, damytý. Sonyń ishinde qazaq kórermenderine tańsyq bolyp keletin múzıkl janryna jan bitirý kerek. Óıtkeni, bizde jańa teatrlar bar, fólklorlyq janrlar  bar. Degenmen, Qazaqstanda múzıkl sekildi janr joq.  Osy baǵytta qazir «Múzıkl Astana» ujymyn qurýdy qolǵa alýdamyz», - dedi mınıstr A. Muhamedıuly.