Islamtanýshy ǵalym Qaırat Joldybaıuly ózine qarsy teris aǵym ókilderi qıturqy áreketterin jalǵastyryp jatqanyn málimdedi, - dep habarlaıdy Qamshy.kz. Ol bul týraly óziniń áleýmettik jelidegi paraqshasynda jazyp otyr.
«Men Gúlenshimin be?» degen suraqqa jaýap bergen ǵalym ózine salafıtter tarapynan jala jabylyp jatqanyn aıtady.
«Salafıtter maǵan qarsy nebir qıturqy áreketterin jasaýda. Ásirese Qazaqstan musylmandary Dinı basqarmasynda apparat jetekshisi bolǵan kúnnen bastap jalǵan avtorlardyń atymen maǵan túrli jalalaryn jaýyp keledi. Sebebi – belgili. Men salafıtterge túbegeıli qarsymyn. «Din men dil» atty eki tomdyq kitabymda salafıtterdiń qatelikterin áshkerelep, hanafı mázhaby men mátýrýdı aqıdasynyń durystyǵyn, Qoja Ahmed Iasaýıdiń sopylyq jolynyń sharıǵatqa qaıshy emes ekendigin dáleldeýge tyrystym. Bul olarǵa aýyr tıdi», - deıdi ǵalym.
Qaırat Joldybaıuly adasqan aǵym ókilderiniń dinı kitapty joıýǵa árekettengenin de jaıyp saldy.
«Tipti, Elbasynyń tikeleı qoldaýymen ashylǵan «Islam jáne bilim» qorynyń qarjylandyrýymen neshe ret basylyp, tegin taratylǵan osy kitabymdy kórgen jerlerinde joıýǵa tyrysqandyqtaryna da kýá boldym», - deıdi ol.
Ashýǵa mingen salafıtter Qaırat Joldybaıulynan basqa da ǵalymdarǵa kún kórsetpeı jatqan kórinedi.
«Olardyń negizsiz qaralaý áreketteri menimen shektelip otyrǵan joq. Búginde salafıttermen belsendi kúresip júrgen Ersin Ámire men Arman Qýanyshbaev, Sansyzbaı Shoqanov, Rızabek Battalov sekildi bilikti mamandardy da qaralap, olardy shııt, habashıt jasap júrgender de osy salafıtter. Meni birese, Mysyrdaǵy kóterilisti uıymdastyrǵan Iýsýf Qardaýıdiń shákiriti, memleketke qarsy adam dese, endi birde Nurshy-Gúlenshi dep aıyptady. Eshbir dálelsiz arnaıy tapsyryspen jazylǵan bul súıkemelerdiń avtorlarynyń kim ekenin de, qaı aýyldan esip turǵanyn da jaqsy bilemin. Ras, doktorlyq dısertasıamdy jazyp jatqan sońǵy úsh jylda bulardyń meni qaralaýy báseńsidi. Alaıda. keshegi Aqtóbedegi oqıǵadan keıin salafıtterdi zańmen tyıym salý kerek degen usynystarymnan soń bulardyń maǵan shabýyly qaıta bastalyp ketti», - dep jazady ol.
«Biraq bul joly aıtarǵa eshnárse taba almaǵannan keıin burynǵy jazdyrǵan shımaılaryn jelilerge kúmpildetip qaıta salyp jatyr. Ashyǵyn aıtaıyn men Fethýllah Gúlen jamaǵatynyń Qazaqstandaǵy kósemi de, belsendi múshesi de emespin. Biraq olar jaıly obektıvti pikirdemin. Quranda: «Qandaı bir qaýymǵa (topqa, rýǵa, jamaǵatqa, ultqa) degen dushpandyqtaryń senderdi olarǵa qarsy ádiletsizdikke ıtermelemesin» delinedi. Islamdy balaq pen saqaldyń deńgeıine túsirip, dindi syrtqy pishinmen ǵana shektep, dindarlyqty jattandy shablondarmen sóıleý dep túsinetin, eldiń ishine iritki salýdan basqa maqtanatyn isteri joq sáláfıler men Sibirden bastap, Afrıkaǵa deıin, jańylyspasam álemniń 160 memleketinde myńnan asa mektep ashyp, aǵartýshylyqpen aınalysyp jatqan Gúlen jamaǵatyn bir deńgeıge qoıa almaımyn. Gúlenniń aqıdasy mátýrýdı, mázhaby hanafı ekendigi málim. Al onyń jamaǵaty bolashaqta memleketimizge qaýipti me? Ony memleketimizdiń quryǵy uzyn quzyrly oryndary anyqtaýy tıis. Meniń osyndaı obektıvti kózqarasym úshin meni Gúlenshi deıtinder de tabyla keter. Kimniń aýzyna qaqpaq bolasyń?!», - degen Qaırat Joldybaıuly ózine taǵylǵan aıyptardyń negizsizdigin aıtady.
Al, F. Gúlenge qatysty daý beıtarap komısıa arqyly qaralýy tıis dep sanaıdy.
«Keshegi Túrkıada bolǵan memlekettik tóńkeriske umtylý áreketi Gúlenmen baılanystyrylyp jatyr. Al, Gúlen: «Meniń eshqatysym joq. Halyqaralyq deńgeıde beıtarap komısıa qurylyp, tóńkeris áreketine meniń qatysymnyń bar-joqtyǵy anyqtalsyn, nátıjesi nendeı bolsa da, men oǵan rızamyn. Eger meniń qatysymnyń bar ekendigi anyqtalsa, bul jerden meni eshkimniń alyp ketýiniń qajeti joq, ózim bılet alyp, óz aıaǵymmen baramyn» degen usynysyn aıtty. Gúlenniń usynysy boıynsha halyqaralyq komısıa qurylyp, onyń qatysy bar ekendigi rasymen de dáleldenip jatsa, onda eshkimniń kóz jasyna qaramastan Qazaqstandaǵy lıseılerin jabý kerek. Jastarymyzǵa keremet bilim berip jatqandyqtary olardy aqtap ala almaıdy. Memleketimizdiń qaýipsizdigi birinshi orynda bolýǵa tıis!», - deıdi Qaırat Joldybaıuly.
