Qarqyndy baý ósirýmen «Kentaý» JSHS, «Zerde agro» SHQ, «Túlkibas transservıs» JSHS belsendi aınalysýda. Sharýashylyqtar jemis aǵashtaryn kútip-baptaýda órkenıetti elderdiń, onyń ishinde Túrkıa, Polsha memleketteriniń sońǵy úlgidegi ozyq tájirıbelerin paıdalanady. Bul ıntensıvti baýlarǵa negizinen tamshylatyp sýarý tehnologıasy keńinen qoldanylady. Barlyq qajetti tehnıkasy bar sharýashylyq qyzmetkerleriniń eńbegi aıtarlyqtaı jeńildetilgen. Agrotehnıkalyq sharalardy ýaqtyly ári sapaly júrgizýge yńǵaıly. Memleket tarapynan jeńildikter kórsetilýde. Qarqyndy baý úshin kóshetter otyrǵyzǵan kezde ınvestısıalyq jobalardy sýbsıdıalaý baǵdarlamasy boıynsha alǵashqy jyly árbir gektaryna ketken shyǵynnyń 40 paıyzy qaıtarylyp beriledi.
Bul aımaqtyń kezinde almanyń «Aport» sortyn ósirýmen de aty shyqqany málim. Belgilengen talap boıynsha aport ósirý úshin tańdalyp alynǵan jer alqaby teńiz deńgeıinen 900 metrden joǵary bıiktikte bolýy kerek. Qazirgi kezde almanyń osyndaı sortyn ósirip júrgen sharýashylyqtardyń sany jyldan-jylǵa kóbeıip kele jatqany kóńilge qýanysh uıalatady. Aýdan boıynsha onyń kólemi 200 gektarǵa jetti. Bul sort qysqa meılinshe tózimdi, 7-8 jyldan keıin ónim beredi. Jemisi iri, bir almanyń salmaǵy 500-600 gramǵa deıin tartady. Al, túsi alqyzyl bolyp kóz súısintedi. Ol qyrkúıek aıynda pisedi. Demek, aport almalardy kelesi jyldyń qańtar, aqpan aılaryna deıin saqtaýǵa bolady.
2020 jylǵa deıin Túlkibas aýdanynda alma baý kólemi 3 600 gektarǵa jetkizilmek. Osylaısha qarqyndy baý ósirý damytylyp, ónim kólemin ulǵaıtý josparlanýda. Aldaǵy merzimde almany Túlkibas aýdanynyń brendine aınaldyrý jolynda jumystar atqarylatyn bolady.
Serikqalı JEKSENBAEV, «Ońtústik Qazaqstan». http://okg.kz/
