Óńirimizde alma baý sharýashylyǵyn damytý, onyń keleshegin kemeldi etý maqsatynda Túlkibas aýdanynda semınar-keńes ótti. Oǵan oblystyq aýyl sharýashylyǵy basqarmasynyń jaýapty mamandary, aýdandar men qalalar ákimderiniń orynbasarlary, baý sharýashylyǵymen aınalysýshy baǵbandar qatysty. Tańdaýdyń osy aýdanǵa túsýi de tegin emes. Óıtkeni, buryn almasymen Keńes odaǵyna ataǵy shyqqan aımaqtyń dańqyn qaıta oraltý jolynda búgingi tańda kóptegen ıgi ister atqarylýda.
Semınardy aýdan ákimi Á.Turǵymbekov ashty. Oblystyq aýyl sharýashylyǵy basqarmasynyń basshysy S.Turbekov bul basqosý ár aımaqtyń óz ereksheligin eskere otyryp, osy mańyzdy salany damytý úshin ózara tájirıbe almasý, jemis kóshetterin egý, oǵan kútim jasaýdyń jańa tehnologıalary men ozyq ádisterin úırený maqsatynda uıymdastyrylyp otyrǵanyn tilge tıek etti. Atalmysh aýdanda alma baýy sharýashylyǵynyń qarqyndy túrde damyp kele jatqany ras.
Semınarǵa qatysýshylar aldymen Mıchýrın aýyldyq okrýgine qarasty «Móldir» jaýapkershiligi shekteýli seriktestiginde bolyp, jumysymen jete tanysty. Jergilikti baǵbandar Túrkıanyń «Iaýla Fılıs» kompanıasymen birlesip, osy merzimde 110 gektar alqapta qarqyndy baý jáne 5 gektar tanapta tuqym baq ósirýde.
Sonymen qatar, aýdanda «Kóktal», «Kentaý» JSHS, «Túlkibas transservıs» jaýapkershiligi shekteýli seriktestikteri de qarqyndy baý ósirýdi qolǵa alypty. Túlkibastyq baǵbandardyń tynys-tirshiligimen tolyq tanysqan semınarǵa qatysýshylar ózderin tolǵandyryp júrgen suraqtaryn qoıyp, pikir almasty, ońdy tájirıbelerimen bólisti. Keńeste sala boıynsha atqarylyp jatqan jumystar men kezdesetin kedergiler de ortaǵa salyndy.
Jalpy taýly aımaqta ornalasqan, aýa raıy qońyrsalqyn Túlkibas aýdany jemis aǵashtaryn ósirýge óte qolaıly. Búgingi tańda baýdyń kólemi 3115 gektardy qurap otyr. Ótken 2007–2015 jyldar aralyǵynda memlekettik baǵdarlamaǵa sáıkes alma baýy men júzimdik kólemi ulǵaıtylyp,
1 429 gektar alqapqa jańa alma aǵashynyń kóshetteri otyrǵyzyldy. Osylaısha oblys ákiminiń Túlkibas aýdanyn jemis-jıdekti aımaqqa aınaldyrý týraly bastamasyna sáıkes kóptegen jumystar atqaryldy. Alma aǵashtaryn ósirýge nıet bildirgen aýyl sharýashylyǵy taýarlaryn óndirýshilerge qosymsha jer telimderi berilip, alma baýdyń kólemi jyldan-jylǵa kóbeıip keledi.
Serikqalı JEKSENBAEV «Ońtústik Qazaqstan». http://okg.kz/
