Reseı premer-mınıstri Dmıtrıı Medvedevtiń Eýrazıalyq Odaqta ortaq valúta qoldanyp, keıbir reseılik depýtattardyń orys tilinen ortaq til jasaý týraly ıdeıalary qazaqstandyq depýtattar arasynda qoldaý tabýda. Májilis depýtaty, Qazaqstan halyqtyq komýnıstik partıasy fraksıasynyń múshesi Jambyl Ahmetbekov ortaq valúta qajettigin aıtyp, al ortaq til orys tili bolsa, qarsy emestigin bildirdi.

 - Eýrazıalyq Odaq keńistiktiginde qyzmet etý - óte durys sharýa. Reseı, Belarýs, Qazaqstannyń burynnan kele jatqan dástúri, ekonomıkalyq qana emes, áleýmettik tyǵyz baılanysy, dostastyǵy bar. Odaqqa qosylǵysy keletin Qyrǵyzstan, kórshi Ózbekstanmen de ekonomıkalyq baılynysymyz burynnan myǵym bolǵan. Sondyqtan, birden osy baılanystardy úzip jiberip, jahandaný kezinde jalǵyz ómir súrý - qıyn jaǵdaı. Ekonomıkalyq, ıntegrasıalyq prosester júrmeı, halyqtyń ál aýqatyn da kótere almaımyz. Táýelsizdigimizdi saqtaı otyryp, basqa eldermen kelisim-shart jasasyp, óz múddemizdi qorǵap, basqalardyń múddesine tıispeı, ortaq sheshimge kelýge tıispiz. Bul – Eýrazıalyq odaq qurý. Al odaq qurǵannan keıin shekaralarymyz ashyq, vızasyz kirip‑shyǵyp júrsek, onda nege ortaq valúta qoldanbasqa?! Sonda bir elden ekinshisine kirer kezde valúta aıyrbastap áýrege túspeımiz. Biraq ortaq valúta reseılik rúbl, qazaqstandyq teńge, belarýs aqshasy emes, osy yntymaqtastyq ishinde júretin ortaq valúta bolýy tıis. Al shekaralar ashyq bolǵanymen, ony alyp tastaý kerek degen pikirmen kelispeımin. Ár memlekettiń shekarasy eshqashan buzylmaı, turýy kerek.

Ortaq til máselesin Qazaqstan óte durys sheship qoıǵan. Bizdiń memlekette resmı til – orys tili. Eger basqa da memleketterde halyq qaı tilde kóbirek sóılese, ortaq til orys tili bolsa da, eshteńe etpeıdi. Óıtkeni bizde ortaq til, resmı til - orys tili. Basqa memleketter de orys tilin resmı til retinde qabyldasa, bul ımperıanyń kórinisi bolyp sanalmaıdy. Bul qaıta ortaq máselelerimizdi sheshýge, qarym-qatynasymyzdy nyǵaıtýǵa kóp áser etedi. Eger ortaq til retinde qazaq nemese belarýs tilin alaıyq desek, bári japatarmaǵaı olardy úırene bastaýy degen másele emes qoı?! Ózimizde daıyn turǵan jaǵdaıdy qurtpaı, soǵan aqyryndap, jaılap, bappen kelip, qoldansa, alǵa jyljýy tıis. Jeke júrsek, daǵdarys jep qoıýy múmkin, al ózara baılanysty buzý qıyn bolmaq.

 Árıne, «táýelsizdigimizden aıyrylyp qalýymyz yqtımal» degen pikirler ár kimniń qorqynyshy men úreıin bildirse kerek. Kostıtýsıamyz, zańdar, memleket basshysy anyqtap bergen, táýelsizdigimizdi nyǵaıtatyn baǵdarlamalar onyń bárine qaıshy keledi. Qorqatyn eshteńe joq! Bılik, zańnama deńgeıinde óziniń múddesin qorǵaı almaı, isterin júzege asyra almaǵan tájirıbesiz adamdar iritki salǵysy keletin shyǵar. Oǵan qarsy turýymyz kerek. Sebebi 21 ǵasyr - jabaıy kapıtalızm!

"Arasha-aqparat"